[1] Kay kuerponchis kay pachapi karpa hina pisi tiempollapaq kasqantaqa yachanchismi. Sichus chay karpa thunikapun chayqa, huk hatarichisqa wasin Diospa wakichipuwasqanchis kapuwanchis. Chay hanaq pachapi wiñay-wiñaypaq wasiqa, manan runakunaq makinwan ruwasqachu kashan.
[2] Chayraykun, kay karpapiqa llakipakuspa waqashanchis. Hinallataq hanaq pachapi kaq wasinchiswan, Diospa p'achachiwananchistaqa munashanchispuni.
[3] Chay hinaqa, sichus p'achachiwasunchis chayqa, manañan q'alallañachu tarikusunchis.
[4] Ñoqanchis kay karpapiraq kashaqkunaqa, ñak'arichisqa kasqanchisraykun llakipakuspa waqashanchis. Cheqaqtapunin q'alata ch'utisqa kaytaqa manapuni munasunmanchu. Aswanpas wañuyqa kawsaypa millp'usqan kananpaq mosoqmanta p'achachisqa kaytan munashanchis.
[5] Ichaqa, chaypaqpunin Diosqa wakichiwarqanchis. Paymi chaykuna hunt'akunanpaq, Espiritunta garantía kananpaq qowarqanchis.
[6] Sonqo churayniyoqpunin kawsashanchis. Hinallataq aycha kuerpopi kawsashaspa, manaraq Señorwan kuskaraqchu kashasqanchistaqa yachanchismi.
[7] Manan imapas rikusqanchisraykuchu purishanchis. Aswanpas iñisqanchisraykun purishanchis.
[8] Ichaqa, aycha kuerpota saqepuspa, Señorwan kuskallaña kawsakuytan aswantaqa munashanchis. Chayrayku, sonqo churayniyoqpuni kawsashasun.
[9] Chay hinaqa, kaypi kawsashaspapas, otaq aycha kuerpota saqepuspapas, Señorta kusichiqllapuni kashanapaq kallpachakusun.
[10] Llapallanchismi Cristoq chaninchana tiyanan qayllapiqa rikhurinanchispuni kashan. Aycha kuerpopi kawsashaspa, allin kaqtapas, otaq mana allin kaqtapas ruwasqanchisman hina chaskinanchispaqmi sapanka hukninchis rikhurinanchispuni kashan.
[11] Hinaqtinmi Señor manchakuna kasqanta yachaspayku, runakunataqa uyachiyku. Diostaqmi ichaqa, imaynachus kasqaykuta sut'ita reqsiwanku. Qankunaq konsiensiaykichispipas chay hina reqsiwayniykichisqa allinmi kanman.
[12] Manan ñoqaykuqa huktawanchu kikiykuta qankunaman rekomiendakuyku. Wakinkunan ichaqa, mana sonqopi kaqkunamantachu, aswanpas rikusqa kaqkunallamanta hatunchakunku. Chay hina kaqkunaman kutichinaykichispaqmi, ñoqaykumanta rimarikunaykichispaq tiempota qoykiku.
[13] Sichus waq'ayasqa kashayku chayqa, Diospaqmi chay hina kashayku. Sitaqchus chanin yuyayniykupi kashayku chayqa, qankunapaqmi chay hinaqa kashayku.
[14] Cristoq munakuyninmi tanqawanchis. Kay hina kasqantataqmi allintapuni entiendinanchis. Sichus ch'ulla runalla llapa runapaq wañurqan chayqa, llapallanmi wañupusqakuña karqan.
[15] Cristoqa, llapapaqmi wañurqan. Chaymi kawsaqkunaqa, manaña paykuna kikinkupaqchu kawsananku. Aswanpas pichus paykunarayku wañuq, hinallataq kawsarimpuq Cristollapaqña kawsananku.
[16] Hinaqa, kunanmanta ñawpaqmanqa, manan pitapas aychaman hinaqa reqsiykuchu. Ichaqa, sichus Cristota aychaman hina reqsirqayku chayqa, kunanqa manañan chay hinatañachu payta reqsiyku.
[17] Chay hinaqa, sichus pipas Cristopi kashan chayqa, mosoq kamasqa runañan kapun. Mawk'a kaqkunaqa tukukapunñan. Qhawariy, tukuy imaymanakunapas mosoqyachisqañan kapun.
[18] Tukuy chaykunataqmi Diosmanta hamun. Diosmi pay kikinwan Jesucristoq chawpinta allipunachiwanchis. Hinan allipunachiy llank'anata qowarqanchis.
[19] Huk niypiqa, Diosmi kay pacha runakunata pay kikinwan Cristopi allipunachirqan. Payqa, manan runakunata huchankumanta huchacharqanchu. Ñoqanchismantaqmi chay allipunachiy willakuytaqa saqewarqanchis.
[20] Chay hinaqa, Cristoq sutinpi rimariqkunan kayku. Ñoqaykuq chawpiykuta Diospas balikushasunkichisman hinan, Cristoq sutinpi balikuykiku: ‘¡Dioswan allipunapuychis!’ nispayku.
[21] Mana huchayoq Cristotan, Diosqa ñoqanchisrayku huchayoqman tukuchirqan. Chaytan, Cristopi chaninman tukuchiwananchispaq Diosqa ruwarqan.