[1] Chay hinaqa, ñoqaykupas qankunawan llank'aysikuqkuna hinapunin kayku. Chaymi Diospa allinpaq qokuyninta chaskisqaykichis, mana yanqapaqchu kananpaq kallpanchamuykiku.
[2] Diosqa ninmi: ‘Chaskiykuna tiempopin uyarirqayki. Qespichina p'unchaypin yanapaykurqayki,’ nispa. (Isa. 49:8) Chayrayku qhawariychis, kunanmi chaskikuna tiempoqa kashan. Hinallataq qhawariychis, kunanmi Diospa qespichinan p'unchayqa kashan.
[3] Diospaq llank'asqayku mana pisinchasqa kananpaqmi, mana pimanpas ima misk'anatapas churarqaykuchu.
[4] Aswanmi Diospaq llank'aqninkuna hina, tukuypi reqsichikuyku. Anchatapunitaqmi pasiensiakuyku. Runakunaq ñak'arichisqanmi kayku. Pisichikuykunapi, hinallataq llakikuykunapin tarikuyku.
[5] Waqtaykuwankun, hinallataq karselmanmi wisq'awanku. Runa ch'aqwaraykunapi, hinallataq sasata llank'aykunapin tarikuyku. Mana puñusqa, hinallataq yarqasqan tarikuyku.
[6] Ch'uya kaypin kawsashayku, yachayniyoqtaqmi kayku. Pasiensiayoqmi kayku, hinallataq allin kasqaykutapas, sumaq sonqo kasqaykutapas rikuchikuykun. Santo Espiritupi, hinallataq mana iskay-uya munakuypin kashayku.
[7] Cheqaq kaqtan rimayku, hinallataq Diospa atiyninpin llank'ayku. Paña makiykupi, hinallataq lloq'e makiykupipas chanin kay armakunatan hap'ishayku.
[8] Wakinkunaqa allinpaqmi qhawariwanku. Hukkunataqmi ichaqa, pisipaq qhawariwanku. Wakin runakunaqa ñoqaykumantan allinta rimanku. Hukkunataqmi ichaqa, ñoqaykumanta mana allinta rimanku. Wakinkunan q'otukuqkuna niwanku. Hukkunataqmi ichaqa, cheqaqta rimaq niwanku.
[9] Wakinkunapaqqa mana reqsisqan kayku. Hukkunapaqtaqmi ichaqa, allin reqsisqapuni kayku. Wañupuqkuna hinan kashayku. Ichaqa, qhawariychis, kawsashaykuraqmi. Soq'aykusqa hinan kashayku. Manataqmi ichaqa, wañuchisqachu kashayku.
[10] Khuyay hinaña kashayku chaypas, kusisqallapunitaqmi kashayku. Wakcha hinan kashayku. Askhatataqmi ichaqa qhapaqyachiyku. Mana imayoqpas kaykuman hinan kashayku. Ichaqa, llapan kaqniyoqtaqmi kayku.
[11] Yaw Korinto llaqtayoq runakuna, sonqoykuta kicharispaykun, ancha sut'itapuni rimaykurqaykiku.
[12] Qankunapaqqa manan sonqoykuta wisq'aykurqaykuchu. Qankunan ichaqa, sonqoykichista ñoqaykupaq wisq'aykurqankichis.
[13] Kikillantataq kutichinaypaqmi, wawaykunata hinapuni qankunamanpas rimaykuykichis: ‘¡Qankunapas sonqoykichista kichariykullawaykutaq!’ nispay.
[14] Mana wakiq yugupiqa amapuni mana iñiqkunawanqa masachakuychischu. Hinaqa, ¿imaynatataq chanin kaqwan, mana chanin kaqwanri hukllachakunman? ¿K'anchaywan laqha-tutayaqwanri, ima huk sonqolla kawsaytaq kanman?
[15] ¿Cristowan Belealwanri, imaynatataq sonqota tupachinkuman? ¿Iñiqkunawan mana iñiqkunawanri, ima ruwaytataq atinkuman?
[16] ¿Diospaq t'aqasqa cheqaswan idolokunawanri, imaynatataq tupanman? Ñoqanchisqa kawsaq Diospa t'aqasqan cheqasmi kanchis. Diosqa nirqanmi: ‘Paykunapurapin tiyasaq, hinallataq purisaqpas. Ñoqan Diosninku kasaq. Paykunataqmi llaqtay kanqaku,’ nispa. (Eze. 37:27)
[17] Chayraykun Señorqa nillantaq: ‘¡Paykunaq chawpinkumanta lloqsiychis, hinallataq t'aqakuychis! Qhelli kaqtaqa, ama tupaykullaychispaschu. Hinan ñoqaqa chaskisaykichis,’ nispan. (Isa. 52:11)
[18] Tukuy Atiyniyoq Señorqa nillantaqmi: ‘Qankunaq Yayaykichismi kasaq. Qankunataqmi churiykuna, hinallataq ususiykuna kankichis,’ nispan. (2 Sam. 7:14)