[1] T'aqasqa kaqkunapaq chay yanapaykuymantaqa yanqañan qelqamuykichisman.
[2] Serbiy munaqllapuni kasqaykichistaqa yachanin. Chaymi Masedonia probinsiapi kaqkunaq ñawpaqenkupi qankunamanta hatunchakurqani. Hinan nirqani: ‘Akaya probinsiapi kashaq wawqe-pananchiskunaqa qayna watamantaraqmi wakichisqaña kashanku,’ nispay. Chay hinapin, k'uchi kayniykichisqa, askha wawqe-panakunapaq kallpachaq karqan.
[3] Ichaqa qankunamanta rimarikuyniyku mana yanqa- paqchu kananpaqmi chay wawqekunata kachamurqani. Imaynan nishaykichisña, chayman hina wakichisqallapuni kashanaykichispaqmi kachamurqani.
[4] Masedonia probinsiamanta wakinkunaqa, imaynapipas ñoqawan hamunkumanmi. Sichus qankuna mana wakichisqachu kashaqta tarisunkichisman chayqa, ñoqaykuqa p'enqachisqan kaykuman. Ñoqaykun qankunamanta hatunchakurqayku, chaymi mana p'enqachisqa kaytaqa munaykumanchu. Manallataqmi qankunapas p'enqachisqa kanaykichistaqa munaykumanchu.
[5] Chaymi, ñoqaykumanta ñawpaqta qankunaman hamuq wawqekunata kallpachayniyqa allin kasqanta yuyaykurqani. Ñawpaqmantapachan prometisqaykichis qoykukuyniykichista wakichinankupaq paykunataqa kachamurqani. Chay hinapin, chay qoykukuyniykichisqa sonqomanta kanqa. Manataq tanqasqallachu kanqa.
[6] Kaytataqmi nini: ‘Pisillata tarpuqqa, pisillatan kosechanqa. Hinallataqmi askhata tarpuqpas, askhatapuni kosechallanqataq,’ nispay.
[7] Diosqa, kusisqa qoqtan munakun. Chayrayku, sapanka hukpas imaynatachus sonqonpi yuyaykusqanman hina, ama llakisqachu, nitaq tanqarisqa hinachu qochun.
[8] Tukuy allinpaq qokuypi askhayachinasunkichispaq Diosqa ancha atiyniyoqpunin. Paymi qankunataqa tukuy imaymanakunapipas manapuni hayk'aqpas imallatapas pisichisunkichischu. Chay hinapin tukuy allin ruwaykunapi askhayankichis.
[9] Qelqapas ninmi: ‘T'akarimuspanmi wakchakunaman qorqan. Chanin kaynintaqmi wiñay-wiñaypaqpuni takyan,’ nispa. (Sal. 112:9)
[10] Tarpuqpaq muhuta qoq, hinallataq mikhunanpaq t'antata qoqpas Diospunin. Payllataqmi chay muhunta qoykunqa, hinallataq askhayachinqa. Pay kikillantaqmi qankunaq chanin kay ruruyniykichista yapaykunqa.
[11] Tukuy mana hark'asqa ofrendakuyniykichiswan tukuypi qhapaqyachisqa kanaykichispaq chaytaqa ruwanqa. Chaytaqmi ñoqaykuq chawpiykuta Diosman grasiasta qonankupaq kanqa.
[12] Chay llank'asqaykichispi serbiyqa, t'aqasqakunaq pisisqantapas hunt'aykunmi. Manan chayllatachu ruwan, aswanpas Diosman anchatapuni grasiasta qonankupaqwanmi kanqa.
[13] Chay llank'asqaykichis serbiypa chawpintataqmi Diosta yupaychanqaku. Paykunapaq, hinallataq llapapaqpas qoykukuq kasqaykichisraykun, hinallataq willasqaykichis Cristoq allin willakuyninta kasukusqaykichisraykun Diostaqa yupaychallanqakutaq.
[14] Chaymantapas paykunaqa qankunapaqmi mañakunqaku. Chay hinapin paykunaqa qankunata munakusqankuta rikuchikunku. Diospa allinpaq qokuynin ancha askhallaña qankunapi kasqanrayku munakusunkichis.
[15] ¡Rimariyta mana atinaraq may hatun qokuyninmanta Diosman grasiasqa kachun!