[1] Ñoqaykuqa, ¿kikiykuta wakmanta rekomiendakuytachu qallarisaqku? Wakinkunaqa qankunaman rekomiendakuy kartakunataraqmi nesesitanku. Hukkunataq qankunamanta rekomiendakuy kartakunataraq nesesitanku. ¿Chay hina kartakunataraqchu ñoqaykuqa nesesitayku?
[2] Sonqoykupi Diospa qelqasqan ñoqaykuq rekomiendakuy kartaykuqa qankunan kankichis. Hinan llapa runakuna reqsisunkichis, hinallataq ñawinchasunkichispas.
[3] Ñoqaykuq qosqayku Cristoq kartankunan qankunaqa kankichis. Manan tintawanchu, aswanpas kawsashaq Diospa Espiritunwan qelqasqan karqan. Manan p'alta rumipichu, aswanpas runakunaq aycha sonqonkupi qelqasqan karqan.
[4] Cristoq chawpintan, Diospa ñawpaqenpi, chay sonqo churayniykuqa kashan.
[5] Manan ima ruwasqaykupas ñoqaykuq kikiykumanta hamusqanta yuyaykuytaqa atiykumanchu. Aswanpas, imapas ruwayta atisqaykuqa, Diosmantan hamun.
[6] Kamachikuy Simi qelqaqa wañuchinmi. Espiritutaqmi ichaqa kawsachin. Chayraykun, Dios kikinpuni, mosoq rimanakuyninpi, llank'ay atiq kanaykupaq churawarqanku. Hinaqa, manan Kamachikuy Simi qelqapi llank'aqkunachu kayku. Aswanpas Espiritupi llank'aqkunan kayku.
[7] Rumipi Diospa qelqasqan qelqakunaqa k'ancharispan hamurqan. Hinan wañuypaq llank'ana karqan. Hinaqtinmi, Moisespa uyan k'ancharishaq kasqanrayku, Israelpa wawankunaqa mana uyanta rikuyta atirqankuchu. Chay k'anchariynintaqmi chinkaripushallarqan.
[8] Sichus chay hina kaqtinqa, ¿manachu espiritual llank'anari aswan k'anchariyniyoqraq kanman?
[9] Sichus huchachanapaq llank'ana ancha k'ancharishaq karqan chayqa, aswantaraqchá chaninman tukuchinapaq llank'anaqa k'ancharinqa.
[10] Chay kamachikuypa k'anchariyninqa, kunan kaq aswan k'ancharishaq kaqwan wakichachiqtinchisqa manan imanmanpas aypanchu.
[11] Sichus chay chinkaripuq kaqllapas sumaq k'anchariyniyoq karqan chayqa, mana hayk'aq chinkaripuq kaqqa, aswan k'anchariyniyoqraqmi kanqa.
[12] Hinaqa, chay suyakuyniyoq kaspaykun, ancha sonqo churaywanqa kawsashayku.
[13] Amayá Moisés hinaqa kasunchu. Payqa, uyanpa k'anchariynin chinkaripushasqanta, Israel llaqtaq wawankuna mana allintapuni rikunankupaqmi, uyanta qatakur- qan.
[14] Kunan p'unchaykaman ñawpa rimanakuytaqa ñawinchanku. Chaywanpas ichaqa, iman kaq uyanku qatarusqallan kashanku. Chay qatasqataqa, Cristoq chawpillantapunin q'alarakuyta atikun. Chayraykun paykunaq yuyayninkuqa tutayachisqallapuni kashan.
[15] Ichaqa Moisespa qelqasqanta sapa kuti ñawinchaqtinkupas, kunan p'unchaykamaraqmi, paykunaq sonqonkuqa qatanawan qatarusqa kashan.
[16] Ichaqa, pillapas Señorman kutirikuqtintaqmi, qatanaqa qechusqa kapunqa.
[17] Señorqa Espiritupunin. Maypichus Señorpa Espíritun kashan chayqa, chaypin kacharichisqa kayqa kashan.
[18] Llapallanchispa uyanchismantataqmi chay pakawaqninchis qatasqata Señorqa q'alarawanchis. Huk espejopi hinataqmi Señorpa k'anchariyninta k'ancharichinchis. Chay hinapin, chay k'anchariypa rikch'aynin aswan-aswan k'anchariyniyoq kapuwananchispaq, huk nirayman t'ikrawanchis. Chay k'anchariyqa Señorpan. Payqa, Espiritupunitaqmi kanpas.