[1] Kay kutitawanqa, kinsa kutitañan qankunaman hamusaq. Iskay testigokunaq, otaq kinsa testigokunaq rimasqankuwanmi, tukuy ima kaqkunapas allintapuni sut'inchakunqa.
[2] Chaytaqa, iskay kaq hamuyniypi qankunawan kashaspallayraqmi nirqani. Kunan mana chaypi kashaspaypas, ñawpaq huchallikuqkunamanmi qelqamuni. Hinallataqmi llapan wakinkunamanpas nini: ‘Sichus huktawan hamusaq chayqa, manan pitapas pampachasaqchu,’ nispay.
[3] Qankunaqa, ñoqapi Cristoq rimashasqan pruebata maskhashasqaykichisraykun, anyaykuykichis. Qankunapaq Cristoqa manan pisi-kallpayoqchu, aswanpas qankunapi atiyniyoqpunin kashan.
[4] Ñoqaykupas Cristopiqa pisikallpayoqtaqmi kayku. Ichaqa Diospa atiyninwanmi qankunapaq Cristowan kuska kawsasaqku. Chaymi, hinaña pisi-kallpayoq kaypi Cristota chakatarqanku chaypas, payqa Diospa atiyninwanmi kawsashan.
[5] Iñiypi qaqa sayasqachus kashanchis, icha manachus, chayta yachanaykichispaqqa qankuna kikiykichispa sonqoykichista t'aqwikuychis. Hinallataq qankuna kikiykichista pruebakuychis. Sichus Diosqa pruebaspa mana wikch'upurqasunkichischu chayqa, Jesucristoqa qankunapi kashanpunin. ¿Icha, manachu qankuna kikiykichista reqsikunkichis?
[6] Ichaqa Diospa mana wikch'urpariwasqanta yachanaykichistan suyakushani.
[7] Hinalla- taq ima mana allintapas ama ruwanaykichispaqmi Diosmanta mañakushayku. Manan ñoqayku aprobasqa hina rikhurinaykupaqchu, aswanpas ñoqaykuña wikch'upusqa hinaña kaqtiykupas, qankuna allin kaqta ruwanaykichispaqmi mañakushayku.
[8] Chay hinaqa, manan imatapas cheqaq kaqpa kontranpi ruwaytaqa atisunmanchu. Aswanpas cheqaq kaqllapaqmi imatapas ruwaytaqa atisunman.
[9] Chaymi ñoqayku, pisi-kallpayoq kaqtiyku, qankunataq kallpasapa kaqtiykichis kusikuyku. Hinallataq qankuna k'apakchasqa kanaykichispaqwan mañakushayku.
[10] Chay hinaqa, manaraq hamushaspaymi kay kartata qelqamuykichis. Hinan chaypi kaspayqa, manaña k'araktañachu nisaykichis. Señorqa, manan qankunata wañuy ñak'ariyman churanaypaqchu kamachikuyniyoq kayta qowarqan. Aswanpas wiñachinaypaqmi qowarqan.
[11] Chay hinaqa, wawqe-panaykuna, q'ochukullaychispuni. K'apakchanakuychis, sonqochanakuychis, ch'ulla yuyaylla kaychis, hinallataq thak kaypi kawsakuychis. Hinan thak kay qoq, hinallataq munakuq Diosqa qankunawanpuni kashanqa.
[12] Ch'uya much'aykuywan, hukkuna-hukkunawan napaykunakuychis.
[13] Llapallan t'aqasqakunapas napaykamusunkichismi.
[14] Señor Jesucristoq allinpaq qokuynin, Diospa munakuynin, hinallataq Santo Espírituq sumaq rimaykukuynin llapallaykichiswanpuni kachun. Ahinapuni kachun.