<Жьмар 35

[1] Хӧдан ль дәштед Моwабеда, незики Урдӧне, пешбәри Әриһайе, Мусар'а хәбәрда у гот:

[2] «Ә'мьри зар'ед Исраел кә кӧ әw жь мьлк'е wаре хwә, бажара бьдьнә леwийа кӧ әw wанда бьжин. Ӧса жи ә'рде дора wан бажара бьдьнә леwийа.

[3] Бажарада әwе бьжин, ә'рде дора wан жи wе бона пәз-дәwаред wан, һәбука wан у һ'әму һ'әйwанед wан бә.

[4] Әw ә'рдед бажарайи кӧ һуне бьдьнә леwийа гәрә һәр чар алийава һ'әзар зәнд бә, жь сура бажер дәр.

[5] Жь бажер дәр алийе р'оһьлатева дӧ һ'әзар зәнди, алийе башурева дӧ һ'әзар зәнди, алийе р'оавайева дӧ һ'әзар зәнди у алийе бакӧрва дӧ һ'әзар зәнди чап кьн, бажаре бьк'әвә наве. Әве бона wан бьбьнә ә'рдед бажара.

[6] Жь бажаред кӧ һуне бьдьнә леwийа, шәш бажара бькьнә бажаред сьт'арбуне, бона кӧ меркӧж бьр'әвә ль wьр. Хенщи ван бажара чьл дӧ бажара жи бьдьнә леwийа.

[7] Т'әмам т'әви һәв һун гәрә чьл һ'әйшт бажара т'әви ә'рде wан бьдьнә леwийа.

[8] Һуне ван бажара жь wаре зар'ед Исраел һьлдьн. Һәр кәсе жь бажаред хwә анәгори wаре хwә, wе бьдә леwийа. Йед к'е зә'ф ьн, зә'фи һьлдьн, йед к'е һьндьк ьн, һьндьки һьлдьн».

[9] Хӧдан Мусар'а хәбәрда у гот:

[10] «Зар'ед Исраелр'а хәбәр дә у бежә wан: ‹Гава һун Урдӧнер'а дәрбази ә'рде Кәнане бьн,

[11] хwәр'а бажара башqә кьн, әwе бона wә бьбьнә бажаред сьт'арбуне, кӧ әw мәрьве кӧ йәки бе һ'әмде хwә бькӧжә бьр'әвә wьр.

[12] Әв бажаре бона wә бьбьнә сьт'ар жь йе кӧ һ'әйфа хуне wе һьлдә, бь ви аwайи меркӧже бәри диwана щьвине нәйе кӧштьне.

[13] Жь wан бажаред кӧ һуне бьдьн, шәш бажар бьра бона сьт'аре бьн.

[14] Се бажара ль алийе р'оһьлата Урдӧне бьдьн у се бажара жи ль ә'рде Кәнанеда бьдьн. Әwе бьбьнә бажаре сьт'арбуне.

[15] Әв һәр шәш бажар бона зар'ед Исраел, бона хәриба у бона wан йед кӧ нава wәда дьжин wе ле сьт'ар бьн. Һәр кәсе кӧ бе һ'әмде хwә йәки бькӧжә wе бьр'әвә ль wьр.

[16] Гава йәк бь һ'әсьнәки йәки дьн хwә бькӧжә, әw меркӧж ә, әw меркӧжа гәрә бе кӧштьне.

[17] Гава йәк пе кәвьре дәсте хwәдайи дәрба кӧштьне йәки хә бькӧжә, әw меркӧж ә, гәрәке бе кӧштьне.

[18] Йан гава йәк пе даре дәсте хwәдайи дәрба кӧштьне йәки хә бькӧжә, әw меркӧж ә, гәрәке бе кӧштьне.

[19] Йе кӧ һ'әйфа хуне wе һьлдә, хwәха гәрә меркӧж бькӧжә. Гава р'асти wи бе хwәха гәрә wи бькӧжә.

[20] Һәгәр йәк жь нәйартийе йәки дә'ф дә, йан тьштәки qәста бавежә wи у әw бьмьрә,

[21] йан һәгәр йәк бь дәсте хwә йәки дьн хә бькӧжә, чьмки әw дьжмьне wи буйә, йе лехьсти гәрә бе кӧштьне, әw меркӧж ә. Йе кӧ һ'әйфа хуне wе һьлдә гава р'асти wи бе, гәрә wи бькӧжә.

[22] Ле һәгәр йәк ньшкева йәки дьн дә'ф дә, йан бе һ'әмде хwә тьштәки бавежә wи, ле әw дьжмьне һәв нибунә,

[23] йан әw кәвьрәки дәрба кӧштьне бавежә wи, әw бьмьрә, ле wи әw нәдитьбә, дьжмьне wи жи нибуйә у хьрабийа wи нәхwәстийә,

[24] һьнге бьра щьвин диwана меркӧж у йе кӧ һ'әйфа хуне wе һьлдә бь ван qануна бькә.

[25] Щьвин бьра меркӧж жь дәсте йе кӧ һ'әйфа хуне wе һьлдә хьлаз кә у щьвин гәрә wи вәгәр'инә бажаре wийи сьт'арбуне, кӧ әw р'әви буйе. Бьра әw ль wьр һ'әта мьрьна сәрәкк'аһине кӧ бь р'уне пироз һатийә р'ункьрьне, бьминә.

[26] Ле һәгәр меркӧж жь wи синоре бажаре хwәйи ле сьт'арбуне дәрк'әвә,

[27] йе кӧ һ'әйфа хуне wе һьлдә, wи жь синоре бажаре wийи сьт'арбуне дәр бьбинә у бькӧжә, йе кӧ һ'әйфа хуне wе һьлдә, нә нәһәqә.

[28] Чьмки әw һ'әта мьрьна сәрәкк'аһин гәрә ль бажаре хwәйи сьт'арбунеда бьминә. Ль пәй мьрьна сәрәкк'аһинр'а меркӧж дькарә вәгәр'ә ә'рде wаре хwә.

[29] Бьра әв бона wә бьбә qәйдә-qануна һәqийе ль нава ньсьлед wәда, ль һ'әму щи-wаред wәда.

[30] Гава йәк мәрики бькӧжә, меркӧж гәрә анәгори хәбәра шә'да бе кӧштьне. Ле шә'дәк һьндьк ә кӧ мәри бе кӧштьне.

[31] Жь бәр ә'мьре меркӧжва, йе кӧ гәрә бе кӧштьне һәq нәстиньн. Чьмки әw гәрә бе кӧштьне.

[32] Нә жи жь мәрьве кӧ р'әвийә бажаре хwәйи сьт'арбуне һәq бьстиньн, кӧ әw бәри мьрьна сәрәкк'аһин вәгәр'ә ә'рде хwәда бьжи.

[33] Ә'рде кӧ һун ль сәр дьжин, нәһ'әр'ьминьн, чьмки хун ә'рде дьһ'әр'ьминә. Ә'рд нькарә жь хуна ль сәр р'ети бе афукьрьне, хенщи бь хуна йе кӧ хун р'етийә.

[34] Ә'рде кӧ һун ль сәр дьжин нәһ'әр'ьминьн, нава к'ижанида кӧ әз дьминьм. Чьмки әз, Хӧдан ль нава зар'ед Исраелда дьжим›».