<Жьмар 34

[1] Хӧдан Мусар'а хәбәрда у гот:

[2] «Ә'мьр ль зар'ед Исраел кә у бежә wан: ‹Әв ә ә'рде Кәнане кӧ синоред хwәва wе п'ара wә к'әвә. Гава һун бьк'әвьнә ә'рде Кәнане,

[3] п'ара wәйә башуре wе жь бәр'ийа Сине р'әх Әдомева һәр'ә. Алийе р'оһьлата синоре wәйи башуре wе жь хьлазийа Бә'ра Мьри дәстпекә.

[4] У синор wе жь башуре дагәр'ә һәвразе Әкрабиме, Синер'а дәрбаз бә у wе ль башура Qадеш-Барнеайева дәрк'әвә у бьгьһижә Һ'асар-Аддаре у wе дәрбази Әсмоне бә.

[5] Синор wе жь Әсмоне дагәр'ә һ'әта селафа Мьсьре у бьгьһижә бә'ре .

[6] Синоре р'оавайе wе Бә'ра Навбәре бә. Әwе бьбә синоре wәйи р'оавайе.

[7] Әве жи бьбә синоре wәйи бакӧре: Жь Бә'ра Навбәре һ'әта ч'ийайе Һор к'ьфш кьн.

[8] Жь ч'ийайе Һор һ'әта Льбо-Һамате к'ьфш кьн у жь wьр синоре бьгьһижә Сьдаде.

[9] Синор wе һ'әта Зифроне һәр'ә у ль Һ'асар-Әйнане хьлаз бә. Әwе бьбә синоре wәйи бакӧре.

[10] Синоре хwәйи р'оһьлате жь Һ'асар-Әйнане һ'әта Шьфаме к'ьфш кьн,

[11] жь Шьфаме wе бәржер һәр'ә һ'әта Рибьлаһе кӧ алийе р'оһьлата Ә'йине йә, паше wе бәржер һәр'ә у бьгьһижә дәве Бә'ра Хьннерете , алийе р'оһьлатева,

[12] паше синоре бәржер һәр'ә Урдӧне у Бә'ра Мьрида хьлаз бә. Әве бьбә синоре дора ә'рде wә›».

[13] Муса ә'мьри зар'ед Исраел кьр у гот: «Әв ә, әw ә'рде кӧ һуне бь п'әшкавитьне wар бьн, к'ижан кӧ Хӧдан ә'мьр кьр wәки нәһә у нив qәбилар'а бе дайине.

[14] Чьмки qәбила зар'ед Р'убен малбәтед хwәва у qәбила зар'ед Гад малбәтед хwәва у ӧса жи ниве qәбила Мьнашә, wаре хwә стандьнә.

[15] Әw һәр дӧ qәбил у нив wи али Урдӧне, пешбәри Әриһайе, алийе р'оһьлате, wаре хwә стандьн».

[16] Хӧдан Мусар'а хәбәрда у гот:

[17] «Әв ьн наве меред кӧ wе ә'рд бона wә п'арәвәкьн: Елазаре к'аһин у Йешуйе кӧр'е Нун.

[18] Ӧса жи жь һәр qәбиле сәрwерәки бона ә'рд п'арәвәкьрьне бьбьжерьн.

[19] Әв ьн навед wан мера: Бона qәбила Щьһуда, К'алебе кӧр'е Йьфунәһ бә.

[20] Бона qәбила зар'ед Шьмһ'ун, Самуеле кӧр'е Ә'миһуд бә.

[21] Бона qәбила Бьнйамин, Әлидаде кӧр'е К'ислон бә.

[22] Бона qәбила зар'ед Дан, Буqийе кӧр'е Йогли сәрwер бә.

[23] Бона зар'ед Усьв, ль qәбила зар'ед Мьнашә, Һ'анийеле кӧр'е Епод сәрwер бә.

[24] Бона qәбила зар'ед Әфрайим, Qьмуеле кӧр'е Шифтан сәрwер бә.

[25] Бона qәбила зар'ед Зәбулон, Әлисафане кӧр'е Парнах сәрwер бә.

[26] Бона qәбила зар'ед Исахар, Палтийеле кӧр'е Ә'зан сәрwер бә.

[27] Бона qәбила зар'ед Ашер, Ахиһуде кӧр'е Шьломи сәрwер бә.

[28] Бона qәбила зар'ед Нәфтәли, Пьдаһеле кӧр'е Ә'миһуд сәрwер бә».

[29] Әв ьн әwед кӧ Хӧдан ә'мьр кьр wәки зар'ед Исраелр'а ә'рде Кәнане п'арәвәкьн.