Жьмар 20
[1] Мәһа йәке т'әмамийа щьвина зар'ед Исраел һатә бәр'ийа Сине у ль Qадеше мьләт щи-wар бу. Wьр Мәрйәм мьр у ль wьр жи һатә дәфьнкьрьне.
[2] Ав т'ӧнә бу бона щьвине у әw мьqабьли Муса у Һарун щьвийан.
[3] Мьләт бина хwә ль Муса тәнг дькьр у дьгот: «Хwәзи әм жи һьнге бьмьрана гава бьрайед мә ль бәр Хӧдан мьрьн!
[4] Чьма wә щьвина Хӧдан ани ль ве бәр'ийе? Wәки әм у һ'әйwане мә qьр' бьн?
[5] Чьма wә әм жь Мьсьре дәрхьстьн, wәки мә биньнә ль ви щийе һани хьраб? Нә щийе чандьне йә, нә щийе даред һежира, нә бахед тьрийа, нә һ'ьнара, һ'әта ав жи вьр т'ӧнә әм вәхwьн!»
[6] Муса у Һарун дури щьмә'те к'әтьн, чунә ль бәр дәре Коне Щьвине, дәвәр'у к'әтьн у р'умәта Хӧдан wанва хӧйа бу.
[7] Хӧдан Мусар'а хәбәрда у гот:
[8] «Шьвдаре һьлдә, тӧ Һаруне бьре хwәва щьвине бьщьвиньн, ль бәр ч'ә'вед wан qәйер'а хәбәрдьн кӧ әw жь хwә аве бьдә. У те бона wан аве жь qәйайе дәрхи кӧ щьвин у һ'әйwанед wан бьди вәхwарьне».
[9] Муса шьвдара кӧ ль бәр Хӧдан бу һьлда, чаwа кӧ Хӧдан ә'мьри ль wи кьр.
[10] Һьнге Муса у Һарун щьвин щьвандьнә ль бәр qәйайе у Муса готә wан: «Бьбьһен гәли р'абәрик'ара, дьбә кӧ әм жь ви qәйайи wәр'а аве дәрхьн?»
[11] Муса дәсте хwә бьльнд кьр у бь шьвдара хwә дӧ щара qәйе хьст у беһ'әсаб ав дәрк'әт, щьвине у һ'әйwане wан вәхwарьн.
[12] Хӧдан готә Муса у Һарун: «Чьмки wә баwарийа хwә ль мьн нә ани у пирозийа мьн зар'ед Исраелва ә'йан нә кьр, ләма һун ве щьвине набьнә ль ә'рде кӧ мьн да wан».
[13] Әва авед Мерибаһе бун к'идәре зар'ед Исраел Хӧданр'а к'әтьнә дә'wе у Хӧдан пирозийа хwә wанва ә'йан кьр.
[14] Жь Qадеше Муса qасьд шандьнә ль щәм п'адше Әдоме у гот: «Аһа дьбежә бьре тә Исраел: ‹Тӧ һаш жь һ'әму чәтьнайед кӧ р'асти мә һатьн һәйи,
[15] кӧ кал-бавед мә бәржери Мьсьре бун у әм ль Мьсьре wә'дәки дьреж ман. мьсьрийа хьраби ль мә у кал-бавед мә дькьрьн.
[16] Мә һәwара хwә ль Хӧдан дахьст, Хӧдан дәнге мә бьһист, qасьд шанд у әм жь Мьсьре дәрхьстьн. Ва йә әм ль Qадеше нә, бажаре ль сәр синоре тә.
[17] Жь к'әрәма хwә бьһелә әм ә'рде тәва дәрбаз бьн, әм ль дәште тәр'а у бахе тәр'а дәрбаз набьн, нә жи әме аве жь биред тә вәхwьн. Әме р'ийа п'адшева һәр'ьн, нә вәгәр'ьнә р'аст нә жи ч'әп, һ'әта синоре тә дәрбаз нәбьн›».
[18] Ле Әдом готә wи: «Тӧ ә'рде мьнва дәрбаз наби йан на әзе бь шур дәрк'әвьмә мьqабьли тә».
[19] Зар'ед Исраел готьнә wи: «Әме р'ийа сәрәкәва дәрбаз бьн, һәгәр әм йан һ'әйwане мә ава тә вәхwьн әме һәqе тә бьдьнә тә, т'әне изьне бьдә әм п'ийа дәрбаз бьн, һаqас тьшт».
[20] Ле әwи гот: «Тӧ дәрбаз наби». Әдом бь ордийа гьран у бь дәсте зор дәрк'әтә мьqабьли Исраел.
[21] Ӧса Әдом изьн нә да кӧ Исраел синоре wива дәрбаз бә. Исраел дури wи к'әт.
[22] Т'әмамийа щьвина зар'ед Исраел жь Qадеше р'е к'әт һатә ль ч'ийайе Һор.
[23] Ль ч'ийайе Һор ль сәр синоре т'опрахе Әдом Хӧдан Муса у Һарунр'а хәбәрда у гот:
[24] «Бьра Һарун һәр'ә бьгьһижә щьмә'та хwә. Әw начә ль ә'рде кӧ мьн да зар'ед Исраел, чьмки wә ль бәр авед Мерибаһе готьнед мьн инк'ар кьрьн.
[25] Һарун у Елазаре кӧр'е wи һьлдә у wан һьлк'ьшинә ль ч'ийайе Һоре.
[26] К'ьнщед Һарун же бехә у wан Елазаре кӧр'е wи кә. Бьра Һарун ль wьр бьмьрә у һәр'ә бьгьһижә щьмә'та хwә».
[27] Муса анәгори ә'мьре Хӧдан кьр у әw ль бәр ч'ә'вед т'әмамийа щьвине һьлк'ьшийанә ль ч'ийайе Һоре.
[28] Муса к'ьнщед Һарун же ехьстьн у ль Елазаре кӧр'е wи кьрьн. Ль wьр сәре ч'ийе Һарун мьр. Муса у Елазар жи жь ч'ийе һатьнә харе.
[29] Т'әмамийа щьвине фә'м кьр wәки Һарун мьрийә у си р'ожи т'әмамийа мала Исраел шина wи кьр.