<Жьмар 19

[1] Хӧдан Муса у Һарунр'а хәбәрда у гот:

[2] «Әв ә qәйдә-qануна wе һинкьрьна кӧ Хӧдан ә'мьр кьр, гот: бежә зар'ед Исраел бьра ногьнәкә сорә бе qӧсурә бе ләк'ә кӧ нә к'әтийә бьне нир биньнә ль щәм тә.

[3] Wе бьдьнә Елазаре к'аһин, бьра ногьн жь зоме бе дәрхьстьне у ль бәр ч'ә'вед wи бе сәржекьрьне.

[4] Паше бьра Елазаре к'аһин бь т'ьлийа хwә жь хуна wе һьлдә у һ'әфт щара хуна wе бьр'әшинә ль алийе дәре Коне Щьвине.

[5] Ногьн ль бәр ч'ә'вед wи гәрә бе шәwьтандьне. Ч'әрме wе, гоште wе, хуна wе у ә'дәба wе бьра бе шәwьтандьне.

[6] У бьра к'аһин һьлдә дара әрзе, зоха һусопе у р'исе соре гәвәз у бавежә ль нава агьре ногьне.

[7] Паше к'аһин бьра к'ьнщед хwә бьшо у аве хwә кә, һьнге әw дькарә бьк'әвә зоме. Ле к'аһин һ'әта еваре нә паqьж ә.

[8] Йе ногьн шәwьтанди жи бьра к'ьнщед хwә бь аве бьшо у аве хwә кә. Ле әw һ'әта еваре нә паqьж ә.

[9] У мәрьвәки паqьж бьра к'озийа ногьне т'оп кә у жь зоме дәр ль щики паqьж дайнә. Щьвина зар'ед Исраел гәрә wе хwәйи кә бона ава паqьжбуне. Әва һ'әдийа паqьжбуна жь гӧна йә.

[10] Ӧса жи йе к'озийа ногьне т'опкьри бьра к'ьнщед хwә бьшо, ле әw һ'әта еваре нә паqьж ә. Бьра әва бона зар'ед Исраел у хәрибе ль нава wәда бьбә qәйдә-qануна һ'әта-һ'әтайе.

[11] К'е дәст бьдә щьнйазе мерьв әwе һ'әфт р'ожа нә паqьж бә.

[12] Әw гәрә бь ава паqьжбуне ль р'ожа сьсийа у р'ожа һ'әфта хwә паqьж кә у wе паqьж бә. Ле һәгәр әw ль р'ожа сьсийа у р'ожа һ'әфта хwә паqьж нәкә әw паqьж набә.

[13] Һәр кәсе кӧ йе мьри к'әвә аwа готи щьнйазе мерьв к'әвә у хwә паqьж нәкә әw Пирозгәһа Хӧдан дьһ'әр'ьминә. Әw кәса гәрә жь нава Исраелда бе ӧндакьрьне чьмки ава паqьжбуне нә һатә р'әшандьне ль сәр wи, әw дьминә нә паqьж, нәпаqьжийа wи һе ль сәр wи йә.

[14] Әв ә qанун: Гава мәрьвәк ль конда бьмьрә һәр кәсе кӧ бьк'әвә кон у һәр кәсе кӧ иди конда йә һ'әфт р'ожа wе нә паqьж бә,

[15] һәр дәрдана вәкьри кӧ qалп'ах р'ьнд нә сәр ә, әw нә паqьж ә.

[16] Һәр кәсе кӧ ль дәште ль мәрьвәки бь шур кӧшти к'әвә йан ль йәки бь ә'мьре хwә мьри йан ль һәстуйед мерьв йан ль мәзәл к'әвә һ'әфт р'ожа wе нә паqьж бә.

[17] У бона йед нә паqьж бьра жь к'озийа ногьна бона паqьжбунейә шәwьтанди һьлдьн, бькьнә дәрдане у ава зәлал сәрда кьн.

[18] Мәрьве паqьж бьра зоха һусопе һьлдә, wе аведа кә у бьр'әшинә сәр кон, һ'әму һур-мур, һ'әму мәрьвед кӧ ль wьр бунә у йе кӧ ль һәсту, йе кӧшти, йе мьри у мәзәл к'әтийә.

[19] Мәрьве паqьж бьра р'ожа сьсийа у р'ожа һ'әфта бьр'әшинә сәр йе нә паqьж у ль р'ожа һ'әфта wи паqьж кә. Әwе к'ьнщед хwә бьшо, аве хwә кә у еваре wе паqьж бә.

[20] Ле һәгәр йәк нә паqьж бә у хwә паqьж нәкә әw кәса бьра жь нава щьвине бе ӧндакьрьне. Чьмки әw Пирозгәһа Хӧдан дьһ'әр'ьминә, ава паqьжбуне нә һатә р'әшандьне ль сәр wи әw нә паqьж ә.

[21] Бьра әва бона wан бьбә qәйдә-qануна һ'әта-һ'әтайе. Ӧса жи йе ава паqьжбуне р'әшанди бьра к'ьнщед хwә бьшо у йе кӧ ава паqьжбуне к'әвә wе һ'әта еваре нә паqьж бә.

[22] Йе нә паqьж чь жи к'әвә wе нә паqьж бә, кәсе кӧ wи тьшти к'әвә һ'әта еваре wе нә паqьж бә».