<Жьмар 16

[1] Qорахе кӧр'е Исһаре кӧр'е Qоһат'е жь зӧр'әта Леwи, хwәр'а Дат'ан у Абираме кӧр'ед Әлйаб у Оне кӧр'е Пәләте жь зӧр'әта Р'убен һьлдан

[2] у т'әви дӧсьд пенщи мәрьвед жь зар'ед Исраелә сәрwеред щьвине, бьжартийед щьвине у мәрьвед нав у дәнг мьqабьли Муса р'абун.

[3] Ль сәр Муса у Һарун к'ом бун у готьнә wан: «Бәс ә иди wәр'а! Т'әмамийа щьвине, һ'әму жи пироз ьн у Хӧдан ль нава wанда йә. Ле чьма һун хwә ль сәр щьвина Хӧданр'а дьгьрьн?»

[4] Муса бьһист у дәвәр'у к'әт.

[5] Муса Qорах у т'әмамийа щьвина wир'а хәбәрда у гот: «Сьбе Хӧдан wе ә'йан кә, к'и п'ара wи йә у к'и пироз ә, әwе незики хwә кә. К'ижани кӧ әw бьбьжерә, wи жи wе незики хwә кә.

[6] Ньһа ве йәке бькьн: Qорах у т'әмамийа щьвина wи хwәр'а агьрданга һьлдьн,

[7] сьбе агьр wанда дайньн у бьхуре ль сәрда кьн дайньнә ль бәр Хӧдан. Әw мәрьве кӧ Хӧдан бьбьжерә әw ә пироз. Бәс ә wәр'а иди, зар'ед Леwи!»

[8] Муса готә Qорах: «Ньһа бьбьһен зар'ед Леwи,

[9] Гәло әв йәк wәр'а һьндьк ә, кӧ Хwәдейе Исраел һун жь щьвина Исраел башqә кьрьн у һун незики хwә кьрьн, бона хәбата Пирозгәһа Хӧдан бькьн у ль бәр щьвине бьсәкьньн, хьзмәтк'арийа wан бькьн?

[10] Тӧ у һ'әму бьрайед тәйә кӧр'ед Леwи т'әви тә незики хwә кьрьн, ле һун ньһа дә'wа к'аһинтийе жи дькьн?

[11] Ләма тӧ у һ'әму щьвина хwәва мьqабьли Хӧдан щьвийан нә, Һарун к'и йә, wәки һун бина хwә ль wи тәнг дькьн?»

[12] У Муса шанд кӧ гази Дат'ан у Абираме зар'ед Әлйаб кьн. Ле wана гот: «Әм найен!

[13] Гәло бәс нинә, тә әм жь wәлате кӧ шир у һьнгьв же дьк'ьшийа дәрхьстьн, кӧ мә бәр'ийеда qьр' ки, сәрда жи һе дьхwази сәрwерийа мә бьки?

[14] Тә әм нә бьрьнә ль ә'рде кӧ шир у һьнгьв же дьк'ьшә, нә жи әм кьрьнә хwәйе wаре к'әwшән у бахе тьрийа. Тӧ дьхwази ч'ә'вед ван мәрьва дәрхи? Әм найен!»

[15] Һьнге һерса Муса р'абу у готә Хӧдан: «Дина хwә нәдә дийарийа wан! Мьн qәт к'әрәк жи жь wан һьлнәда йә у хьраби жь ль wан т'ӧ кәси нәкьрийә».

[16] Муса готә Qорах: «Тӧ у т'әмамийа щьвина хwәва сьбе ль бәр Хӧдан бьсәкьньн, тӧ, әw у Һарун.

[17] Һәр кәс бьра агьрданга хwә һьлдә, бьхуре дайнә ль сәр у бинә ль бәр Хӧдан. Һәр кәс агьрданга хwә, аwа готи дӧсьд пенщи агьрданги, ӧса жи тӧ у Һарун һәр кәс бь агьрданга хwә».

[18] Wана һәр кәси агьрданга хwә һьлдан агьр wанда данин, бьхур сәр wанда кьрьн у ль бәр дәре Коне Щьвине т'әви Муса у Һарун сәкьнин.

[19] У Qорах ль бәр дәре Коне Щьвине, мьqабьли wан т'әмамийа щьвине т'оп кьр. Һьнге р'умәта Хӧдан т'әмамийа щьвинева хӧйа бу.

[20] Хӧдан Муса у Һарунр'а хәбәрда у гот:

[21] «Жь нава ве щьвине хwә хәwлә кьн, кӧ әз ньшкева к'әwа wан биньм».

[22] Ле әwана дәвәр'у к'әтьн у готьн: «Йа Хwәде, Хwәдейе р'ӧһ'е һәр бәдәне! Мәрьвәки гӧнә кьр һерса хwә һ'әму щьвине р'адьки?»

[23] Хӧдан Мусар'а хәбәрда у гот:

[24] «Ве щьвинер'а хәбәр дә у беже: ‹Жь дора коне Qорах, Дат'ан у Абирам дур к'әвьн›».

[25] Муса р'абу чу щәм Дат'ан у Абирам, р'успийед Исраел жи пәй wи чун.

[26] Әwи щьвинер'а хәбәрда гот: «Жь конед ван мәрьвед һанә нәһәq дур к'әвьн у дәст нәдьнә т'ӧ тьштед wан, wәки р'уйе гӧнәйед wанда нәйенә р'аqәтандьне».

[27] Әw жь дора коне Qорах, Дат'ан у Абирам дур к'әтьн. Дат'ан у Абирам жи дәрк'әтьн у ль бәр дәре конед хwә т'әви жьнед хwә, зар'ед хwә у бьч'укед хwә сәкьнин.

[28] Муса гот: «Бь ве йәке һуне бьзаньбьн кӧ Хӧдан әз шандьмә һ'әму ван кьрьна бькьм, кӧ әз хwә сәре хwә накьм.

[29] Һәгәр әвана бь мьрьна кӧ һ'әму мәрьв дьмьрьн бьмьрьн у фәләка wан мина фәләка һ'әму мәрьва бә, wәки ӧса нә Хӧдан әз нә шандьмә.

[30] Ле һәгәр Хӧдан тьштәки нәбуйи бинә сәре wан: Ә'рд дәве хwә вәкә wан у һ'әму тьштед wан һ'уфи хwә кә у әw сахә-сах бьк'әвьнә Дийаре Мьрийа. Һьнге һуне бьзаньбьн wәки ван мәрьвана Хӧдан т'әхсир кьрьн».

[31] Гава Муса әв һ'әму хәбәр сәр һәвда анин, ә'рде бьн wанда qәльши.

[32] Ә'рде дәве хwә вәкьр у әw, малед wан, һ'әму мәрьвед Qорах у һ'әму һәбука wан һ'уфи хwә кьр.

[33] Әw у һ'әму тьштед wан сахә-сах к'әтьнә Дийаре Мьрийа, ә'рде әw ньхамт у әw жь нава щьвине һатьнә һьлдане.

[34] Т'әмамийа Исраелә дор-бәре wан жь дәнге wан р'әви, гот: «Нәбә кӧ ә'рд мә жи һ'уфи хwә кә!»

[35] Ӧса жи агьр жь Хӧдан дәрк'әт у әw дӧсьд пенщи мәрьвед кӧ бьхур анибун шәwьтанд.

[36] Һьнге Хӧдан Мусар'а хәбәрда у гот:

[37] «Бежә Елазаре кӧр'е Һаруне к'аһин бьра агьрданга жь нава егьр һьлдә у к'озийе жи бьр'ежә, чьмки әw һатьнә пирозкьрьне.

[38] Агьрдангед ван кәсед кӧ р'уйе гӧне хwәда мьрьн, бьра бькьнә бәлгед пә'нкьри бона кьраскьрьна горигәһе, чьмки wана әw незики Хӧдан кьрьбу у әw пироз бьбун. Әwе бьбьнә нишан бона зар'ед Исраел».

[39] Елазаре к'аһин әw агьрдангед сьфьрә кӧ wан мәрьвед шәwьти дабун, һьлдан у әw пә'н кьрьн бона кьраскьрьна горигәһе,

[40] чаwа биранин зар'ед Исраелр'а, бона әwе хәриб, йе кӧ нә жь р'ьк'ьнйата Һарун ә незик нәбә кӧ бьхуре ль бәр Хӧдан вехә. Wәки ӧса нәйе сәре wи чаwа кӧ һатә сәре Qорах у щьвина wи, чаwа кӧ Хӧдан бь дәсте Муса готьбу wи.

[41] Р'ожтьра дьне т'әмамийа щьвина зар'ед Исраел бина хwә ль Муса у Һарун тәнг кьрьн, готьн: «Wә щьмә'та Хӧдан кӧшт».

[42] У гава щьвин мьqабьли wан щьвийа Муса у Һарун бәре хwә данә Коне Щьвине, ва йә ә'wр әw ньхамтийә у р'умәта Хӧдан хӧйа буйә.

[43] Муса у Һарун һатьнә ль бәр Коне Щьвине,

[44] Һьнге Хӧдан Мусар'а хәбәрда у гот:

[45] «Жь нава ве щьвине дәрен у әзе ньшкева к'әwа wан биньм». Әw дәвәр'у к'әтьн.

[46] Муса готә Һарун: «Агьрданге һьлдә, агьре ль сәр горигәһе бьдә сәр, бьхуре сәрда кә у зу һәр'ә нава щьвине у бона wан к'әwандьне бькә. Чьмки һерса Хӧдан р'абу, хәзәбе дәстпекьр!»

[47] Анәгори хәбәра Муса, Һарун агьрданг һьлда у р'әви нава щьвине, ва йә хәзәбе нава мьләтда иди дәстпекьрийә. Әwи бьхур кьрә сәр у бона мьләт к'әwандьн кьр.

[48] Һарун ль нава мьрийа у зендийа сәкьни у хәзәб сәqьр'и.

[49] Жь дәст хәзәбе 14700 мәри мьрьн, хенщи әwед кӧ р'уйе Qорахда мьрьн.

[50] Пәй wе йәкер'а кӧ хәзәб сәqьр'и, Һарун вәгәр'ийа ль щәм Муса ль бәр дәре Коне Щьвине.