<Жьмар 32

[1] Һ'әйwанед зар'ед Р'убен у зар'ед Гад гәләк бун. Wана ә'рде Йазер у ә'рде Гилә'де дит ва йә әw ә'рдәки р'ьнд бу бона һ'әйwен.

[2] Һьнге зар'ед Р'убен у зар'ед Гад һатьн ль щәм Муса, Елазаре к'аһин у сәрwеред щьвине у готьн:

[3] «Ә'рде Ә'т'әроте, Дибоне, Йазере, Нимрайе, Һ'әшбоне, Әлалейе, Сьваме, Нәбойе у Бьһоне

[4] кӧ Хӧдан бона щьвина Исраел зәфт кьр, әw ә'рдәки р'ьнд ә бона һ'әйwен у һ'әйwанед ә'вдед тә һәнә».

[5] Wана диса гот: «Һәгәр мә ль бәр ч'ә'вед тә к'әрәм дит, бьра әв ә'рде һане ә'вдед тәр'а чаwа мьлк' бе дайине. Мә ль Урдӧнер'а дәрбаз нәкә».

[6] Муса готә зар'ед Р'убен у зар'ед Гад: «Бьрайед wә һәр'ьнә шер', һуне жи ль вьр бьминьн?

[7] Чьма һун дьле зар'ед Исраел сьст дькьн кӧ дәрбаз нәбьнә ль ә'рде кӧ Хӧдан да wан?

[8] Бавед wә ӧса кьрьн, гава мьн әw жь Qадеш-Барнеайе шандьнә щә'сусийа ви ә'рди бькьн.

[9] Әw гьһиштьнә нәwала Әшк'оле, әw ә'рд дитьн у дьлед зар'ед Исраел сьст кьрьн кӧ дәрбаз нәбьнә ль ә'рде кӧ Хӧдан дьдә wан.

[10] У wе р'оже һерса Хӧдан р'абу, wи сонд хwар у гот:

[11] ‹Т'ӧ кәсе жь wан, йед кӧ жь Мьсьре дәрк'әтьнә, жь бистсалийе жортьр, wи ә'рде кӧ мьн сонд хwар кӧ бьдьмә Бьраһим, Исһаq у Аqуб набиньн. Чьмки wана т'ам гӧр'а мьн нәкьр.

[12] Хенщи К'алебе кӧр'е Йьфунәһейе qьнизи у Йешуйе кӧр'е Нун, чьмки wана т'ам гӧр'а Хӧдан кьр›.

[13] Һьнге һерса Хӧдан ль Исраел р'абу у Хӧдан әw чьл сали бәр'ийеда гәр'андьн, һ'әта qьр'а т'әмамийа wи ньсьле кӧ хьраби ль бәр ч'ә'ве Хӧдан кьр нә һат.

[14] Ва йә, һун, ньсьле гӧнәк'ар, дәwса бавед хwә р'абунә кӧ һерса Хӧдан һе зә'ф ль сәр Исраел р'акьн!

[15] Һәгәр һун жь р'ийа Хӧдан дагәр'ьн, һьнге әwе Исраел диса ль бәр'ийеда бьһелә у һуне т'әмамийа ви мьләти ӧнда кьн».

[16] Әw незики Муса бун у готьне: «Әме ль вьр ахьла бона һ'әйwанед хwә у бажара бона зар'ед хwә чекьн,

[17] әме хwәха жи ч'әкед хwә гьредьн, һазьр бьн кӧ пешийа зар'ед Исраелва һәр'ьн, һ'әта әм wан нәбьнә ль щийед wан. Зар'ед мә жи бьра ль бажаред суркьрида бьминьн, бона бехофийе жь бьнәлийед ви ә'рди.

[18] Әм вәнагәр'ьнә малед хwә, һ'әта зар'ед Исраел һәр кәс ль мьлк'е хwә wар нәбә.

[19] Әм т'әви wан ль wи али Урдӧне у wеда щи wар набьн, чьмки wаре мә ль ви али Урдӧне, алийе р'оһьлате йә».

[20] Муса готә wан: «Һәгәр һун ве йәке бькьн, бь ч'әк пешийа Хӧданва һәр'ьнә шер',

[21] һәр кәс жь wә ч'әк гьредайи ль бәр Хӧдан Урдӧнер'а дәрбаз бә, һ'әта Хӧдан жь бәр хwә дьжмьнед хwә р'анәqәтинә

[22] у ә'рд бь хwәстьна Хӧдан бе зәфткьрьне, паши һьнге пашда вәгәр'ьн. Һуне һьнге ль бәр Хӧдан у Исраел бе сущ бьн у әв ә'рде ль бәр Хӧдан бьбә wаре wә.

[23] Ле һәгәр һун ӧса нәкьн һун ль бәр Хӧдан гӧнә дькьн. Бьзаньбьн һуне бона ви гӧне хwә бенә щәзакьрьне.

[24] Бажара бона зар'ед хwә у ахьла бона пәзед хwә чекьн, ле чь жи кӧ жь дәве wә дәрк'әтийә бькьн».

[25] Зар'ед Гад у зар'ед Р'убен Мусар'а хәбәрдан у готьн: «Ә'вдед тә wе ӧса бькьн чаwа кӧ хwәйе мә ә'мьр дькә.

[26] Жьн-зар'ед мә, пәз-дәwаред мә у һ'әму һ'әйwанед мә wе ль wьр бьминьн, аwа готи ль бажаред Гилә'дда,

[27] ле ә'вдед тә, һ'әмуйед шер'р'а һазьр, wе ль бәр Хӧдан бона шер' дәрбаз бьн, чаwа кӧ хwәйе мә дьбежә».

[28] Муса бона wан ә'мьри Елазаре к'аһин, Йешуйе кӧр'е Нун у сәрwеред малбәтед qәбилед зар'ед Исраел кьр

[29] у Муса готә wан: «Һәгәр зар'ед Гад у зар'ед Р'убен т'әви wә Урдӧнер'а дәрбаз бьн, һ'әму ль бәр Хӧдан шер'р'а һазьр бьн у әw ә'рд дәстед wәда бә, һьнге ә'рде Гилә'д чаwа мьлк' бьдьнә wан.

[30] Ле һәгәр әw т'әви wә ч'әкед хwә гьредайи дәрбаз нәбьн, һьнге әwе мьлк' т'әви wә ль ә'рде Кәнанеда бьстиньн».

[31] Зар'ед Гад у зар'ед Р'убен вәгәр'андьн у готьн: «Чаwа кӧ Хӧдан готә ә'вдед тә әме ӧса жи бькьн.

[32] Әме ль бәр Хӧдан ч'әк гьредайи дәрбаз бьнә ль ә'рде Кәнане, т'әне бьра wаре мьлк'е мә ви алийе Урдӧне бә».

[33] Муса п'адшатийа Сихоне п'адше әморийа, п'адшатийа Оге п'адше Башане, ә'рд, бажаред wе синоре wанва аwа готи һ'әму ә'рд бажарава данә зар'ед Гад, зар'ед Р'убен у ниве qәбила Мьнашәйе кӧр'е Усьв.

[34] Зар'ед Гад Дибон, Ә'т'әрот, Ә'роһер,

[35] Ә'т'рот-Шофан, Йазер, Йогбоһа,

[36] Бет'-Нимра, Бет'-Һаран, бажаред суркьри чекьрьн, ӧса жи ахьлед пез.

[37] Зар'ед Р'убен Һ'әшбон, Әлале, Qирйатайим

[38] ӧса жи Нәбо у Баә'л-Мьһон, навед к'ижана һатьбунә гӧһастьне у Сивма чекьрьн. Навед ну данинә ль сәр бажаред кӧ чекьрьбун.

[39] Зар'ед Махире кӧр'е Мьнашә жи чунә Гилә'де, әw зәфт кьрьн у бәри әморийе кӧ ль wьр дьман, дан.

[40] Һьнге Муса Гилә'д да Махире кӧр'е Мьнашә у әw ль wьр щи-wар бу.

[41] Йаире кӧр'е Мьнашә жи чу гӧндед wе зәфт кьрьн у навед wан дани Һ'авот Йаир .

[42] Новаһ' чу Qьнат гӧндед wева зәфт кьр у наве хwә, Новаһ', дани сәр.