<Жьмар 13

[1] Хӧдан Мусар'а хәбәрда гот:

[2] «Хwәр'а мәрьва бьшинә кӧ щә'сусийа ә'рде Кәнане бькьн, к'ижани кӧ әз дьдьмә зар'ед Исраел. Жь һәр qәбиләкә бавед wан мәрьвәки бьшинә, аwа готи жь сәрwере нава wанда».

[3] Һьнге Муса әw анәгори готьна Хӧдан жь бәр'ийа Паране шандьн. Әw һ'әму мәрьв сәрwере зар'ед Исраел бун.

[4] Әв ьн навед wан: Жь qәбила Р'убен Шамуайе кӧр'е Зак'ур бу.

[5] Жь qәбила Шьмһ'ун Шафате кӧр'е Һ'ори бу.

[6] Жь qәбила Щьһуда К'алебе кӧр'е Йьфунәһ бу.

[7] Жь qәбила Исахар Игале кӧр'е Усьв бу.

[8] Жь qәбила Әфрайим Һошейайе кӧр'е Нун бу.

[9] Жь qәбила Бьнйамин Палтийе кӧр'е Р'афу бу.

[10] Жь qәбила Зәбулон Гаддийеле кӧр'е Соди бу.

[11] Жь qәбила Мьнашә (qәбиләкә жь Усьв) Гаддийе кӧр'е Суси бу.

[12] Жь qәбила Дан Ә'мийеле кӧр'е Гьмалли бу.

[13] Жь qәбила Ашер Сьт'уре кӧр'е Мьхайил бу.

[14] Жь qәбила Нәфтәли Наһ'бийе кӧр'е Вофси бу.

[15] Жь qәбила Гад Гәйуеле кӧр'е Махи бу.

[16] Әв ьн навед wан мәрьвед кӧ Муса шандьн щә'сусийа ә'рде бькьн. Муса наве Һошейайе кӧр'е Нун дани Йешу .

[17] Муса әw шандьн кӧ щә'сусийа ә'рде Кәнане бькьн у готә wан: «Р'абьн һәр'ьнә Нәщәфе у һ'әта ә'рде ч'ийа-банийа һьлк'ьшьн.

[18] Бьньһер'ьн ә'рд чаwа йә. Мәрьвед ль wи ә'рди дьжин qәwат ьн йан сьст ьн, п'ьр' ьн йан һьндьк ьн?

[19] Ә'рде кӧ әw ле нә чаwа йә, qәнщ ә йан хьраб ә? Бажаред әw ле дьжин вәкьри нә йан суркьри нә?

[20] Ә'рд чаwа йә, хwәйи дәрәмәт ә йан бе бәр ә, бах һәнә йан т'ӧнәнә? Сәрхwә бьн у жь бәре wи ә'рди биньн». (Әв wә'де тьрийед пешьн бу.)

[21] У әw р'абун щә'сусийа wи ә'рди кьрьн, жь бәр'ийа Сине гьрти һ'әта Р'ьһ'ове ль Льбо-Һамате.

[22] Әw р'абун һьлк'ьшийанә Нәщәфе у гьһиштьнә Һеброне у ль wьр Ахиман, Шешай у Т'алмай, зар'ед әнаqийа дьман. (Һеброн һ'әфт сала бәри Зойана мьсьрийа һатьбу чекьрьне).

[23] Әw гьһиштьнә нәwала Әшк'оле у ль wьр wана гушики тьрийе ч'ьqьлва чьнин дарәк навр'а кьрьн у дӧ мәрийа әw һьлдан, ӧса жи чәнд һ'ьнар у һежир һьлдан.

[24] Наве wи щийи данин нәwала Әшк'ол , бона гушийе ль wьр зар'ед Исраел чьнин.

[25] Пәй чьл р'ожир'а әw жь щә'сусийа wи ә'рди вәгәр'ийан.

[26] Әw һатьн у чунә ль щәм Муса, Һарун у тә'мамийа щьвина зар'ед Исраел ль бәр'ийа Паран, Qадеше. Wан у т'әмамийа щьвинер'а хәбәр анин у бәред wи ә'рди нишани wан кьрьн.

[27] Мусар'а сальх кьрьн у готьн: «Әм чунә wи ә'рде кӧ тә әм шандьне, бь р'асти шир у һьнгьв же дьк'ьшә, әвана жи бәре wи нә.

[28] Ле мьләте ль wи ә'рди дьжи, qәwат ә, бажар жи бь суред гәләки мәзьн ьн, ӧса жи мә зар'ед әнаqийа ль wьр дитьн.

[29] Амалеки ль Нәщәфе дьжин, һ'ити, йәбуси у әмори ль сәр ч'ийа-банийа дьжин, кәнани жи дәве бә'ре у к'еләка Урдӧне дьжин».

[30] Ле К'алеб щьмә'т ль бәр Муса да кәр'кьрьне у гот: «Р'абьн әм һәвраз һәр'ьн у wи бькьнә мьлк'е хwә, чьмки әме ә'сә wи зәфти хwә кьн».

[31] Ле мәрьвед кӧ т'әви wи һәвраз чубун дьготьн: «Әм нькарьн һәвраз һәр'ьн мьqабьли wан, чьмки әw жь мә qәwаттьр ьн».

[32] Wана щаб-саwед хьраб бәла дькьрьн нава зар'ед Исраел бона ә'рде щә'суси кьри, дьготьн: «Ә'рде кӧ әмә чубуне wәки щә'сусийа wе бькьн, әw ә'рд бьнәлийед хwә һ'уфи хwә дькә у һ'әму мәрьвед кӧ мә ль сәр wе дитьн мәрьвнә бәжьн-бьльнд ьн.

[33] Ль wьр мә ә'савә дитьн (зар'ед әнаqийа п'арәкә жь ә'сава бун) у әм ль бәр ч'ә'вед хwә мина кӧлийа бун ӧса жи ль бәр ч'ә'вед wан бун».