<Жьмар 11

[1] У бу wәки щьмә'те тәнгасийеда һьндава Хwәдеда бина хwә тәнг кьр. Хӧдан бьһист, һерса wи р'абу у агьре Хӧдан нава wанда алав пек'әт у п'еша зоме һ'уфи хwә кьр.

[2] Һьнге щьмә'те һәwара хwә Муса ани. Муса бь дӧа хwә авитә Хӧдан у агьр весийа.

[3] Наве wи щийи Муса данин Т'авә'ра , чьмки агьре Хӧдан ль нава wанда алав пек'әт.

[4] Мьләтед башqәйә бе п'әргал нава wанда дьлһавьжи кьрьн. Зар'ед Исраел жи диса гьрийан у готьн: «К'е wе гошт бьдә мә әм бьхwьн?

[5] Те бира мә әw мә'сийед Мьсьреда кӧ мә бе һәq дьхwарьн. Ӧса жи хьйар, зәвәш, пивазок, пиваз у сир.

[6] Ле ньһа нәфса мә ч'ьла буйә, т'ӧ тьшт т'ӧнә, т'әне манайә ль бәр ч'ә'вед мә».

[7] (Мана жи мина жь к'ома т'охьме мехьке бу, р'әнге wе жи мина бьдолахе бу.

[8] Щьмә'т дьгәр'ийа, т'оп дькьрьн у бь дәстар' дьһеран, йан жи щонида дьк'ӧтан, бәрошда дьк'әландьн у жь wе к'атә чедькьрьн. Тә'ма wе мина тә'ма к'ате р'ун бу.

[9] У гава шәв qьр'авийе ль нава зоме дадани, манайе жи сәрда датини).

[10] Муса бьһист wәки щьмә'т нәфәред хwәва, һәр кәс ль бәр дәре коне хwә, дьгьри. Һьнге һерса Хӧдан гәләки р'абу, кьрьна ван ль сәр Муса жи гьран р'уньшт.

[11] Муса готә Хӧдан: «Тә чьма ә'вде хwә авитә нава охьрмед гьран? Чьма мьн к'әрәм ль бәр ч'ә'вед тә нә дит? Тә чьма нире һ'әму ви мьләти авитә стуйе мьн?

[12] Дьбә әз ви мьләтида пе мамә, йан әw жь мьн дьне к'әтьнә, wәки тӧ мьнр'а дьбежи: ‹Wан һ'әмеза хwәда бьбә›, чаwа дәстдәргуш зар'а ширхӧр дьбә, һ'әта wи ә'рде кӧ тә бавед wанр'а сонд хwарийә?

[13] Әзе гошт жь кӧ биньм wәки бьдьмә т'әмамийа ви мьләти? Чьмки әw ль бәр мьн дьгьрин, дьбежьн: ‹Гошт бьдә мә әм бьхwьн!›

[14] Әз нькарьм т'әне т'әмамийа ви мьләти бьбьм, чьмки гьран ә бона мьн!

[15] Wәки тӧ ӧса тини сәре мьн, дьһа р'ьнд ә мьн бькӧжә, һәгәр мьн ль бәр ч'ә'вед тә к'әрәм дитийә. Әзе бәләнгазийа хwә нәбиньм!»

[16] Хӧдан готә Муса: «Жь нава р'успийед Исраел мьнр'а һ'әфте мәрьви бьбьжерә, йед кӧ тӧ зани әwә р'успи у сәрwеред мьләт ьн. Wана бинә ль Коне Щьвине у бьра әw ль wьр т'әви тә бьсәкьньн.

[17] Әзе жи пәйа бьм, ль wьр т'әви тә хәбәр дьм у жь Р'ӧһ'е кӧ ль сәр тә йә һьлдьм у дайньмә ль сәр wан. Wәки әw жи т'әви тә нире ви мьләти һьлдьбьн у тӧ т'әне һьлнәди.

[18] Мьләтр'а жи бежә: ‹Хwә паqьж кьн бона сьбе у һуне гошт бьхwьн, чьмки һун ль бәр Хӧдан гьрийан, wә гот: «К'е wе гошт бьдә әм бьхwьн? Чьмки ль Мьсьре мәр'а qәнщ бу». Хӧдане гошт бьдә wә һуне бьхwьн.

[19] Нә р'ожәке һуне гошт бьхwьн, нә дӧ р'ожа, нә пенщ р'ожа, нә дәһә р'ожа, нә жи бист р'ожи,

[20] ле хут мәһәке, һ'әта әw фьнщьке wәр'а нәйе у мә'де wә ль һәв нәк'әвә, чьмки wә Хӧдан т'әхсир кьр, йед кӧ нава wәда йә, ль бәр wи гьрийан, гот: «Чьма әм жь Мьсьре дәрк'әтьн?»›»

[21] Ле Муса гот: «Мьләте кӧ әз навда мә, 600000 мер ьн, тӧ дьбежи: ‹Гошт әзе бьдьмә wан у әwе мәһәке бьхwьн›.

[22] Һәгәр пәз-дәwар бе сәржекьрьне бона wан, гәло wе т'ера wан бькә? Йан һ'әму мә'сийед бә'ре бенә гьртьне бона wан, гәло wе т'ера wан бькә?»

[23] Хӧдан готә Муса: «Чьма жь дәсте Хӧдан найе? Ньһа те бьбини, хәбәра кӧ мьн готә тә, wе бе сери йан на».

[24] Муса дәрк'әт у хәбәред Хӧдан готә мьләт. Һ'әфте мәри жь р'успийед мьләт щьвандьн у әw ль дора Кон данә сәкьнандьне.

[25] У Хӧдан ль ә'wрда пәйа бу у т'әви Муса хәбәрда, жь Р'ӧһ'е ль сәр wи һьлда у дани ль сәр һ'әфте меред р'успи. Гава р'ӧһ' дани ль сәр wан, wана п'ехәмбәрти кьр, ле думайи нәкьрьн.

[26] У ль нава зоме дӧ мәри мабун, наве йәки Әлдад бу, наве йе дьн Мейдад бу. Р'ӧһ' дани ль сәр wан жи, чьмки әw жь wан бун йед кӧ һатьбунә ньвисаре, ле дәрнәк'әтьбунә бәр Кон. Wана зомеда п'ехәмбәрти дькьр.

[27] Хортәк бәзи, ә'лами Муса кьр, гот: «Әлдад у Мейдад зомеда п'ехәмбәртийе дькьн!»

[28] Һьнге Йешуйе кӧр'е Нун, кӧ жь щаһьлтийа хwәда бәрдәстийе Муса бу, гот: «Хwәйе мьн, Муса, wан һьле!»

[29] Муса готә wи: «Әw тӧ дәwса мьн һ'әвсудийе дьки? Хwәзи т'әмамийа мьләте Хӧдан п'ехәмбәр буна, кӧ Хӧдан Р'ӧһ'е хwә данийа ль сәр wан».

[30] Муса у һ'әму р'успийед Исраел вәгәр'ийанә зоме.

[31] Һьнге бь qьрара Хӧдан ба р'абу у qар'итк жь алийе бә'ре ажотьн анинә зоме, wәкә р'ийа р'ожәке ль дора зоме у дӧ зәнд жь ә'рде бьльндтьр дьфьр'ин.

[32] Мьләт р'абу у т'әмамийа wе р'оже, т'әмамийа wе шәве у т'әмамийа р'ожтьра дьн qар'итк дьданә һәв. Йе лапи һьндьк дәһә һомер т'оп кьрьн у wана әw ль дора зоме р'ахьстьн .

[33] Гошт һе бәр дьране wанда бу, һе нә щутьбун, гава һерса Хӧдан ль мьләт р'абу у Хӧдан бь бәлакә гәләки мәзьн ль мьләт хьст.

[34] У наве wи щийи данин Qиброт-Һат'аwа , чьмки ль wьр мәрьвед дьлһавьжи дәфьн кьрьн.

[35] Жь Qиброт-Һат'аwайе мьләт р'е к'әт чу Һ'асероте у әw ль Һ'асероте ман.