Жьмар 3
[1] Әв ьн зӧр'әтед Һарун у Муса, wе р'оже гава Хӧдан т'әви Муса ль ч'ийайе Синайе хәбәрда.
[2] Әв ьн наве кӧр'ед Һарун, ньхӧрийе wи Надаб пәйр'а Абиһу, Елазар у Ит'амар,
[3] әw к'аһинед р'ункьри йед кӧ Һарун әw к'аһинтийер'а qәwин-qәдим кьрьн.
[4] Надаб у Абиһу ль бәр Хӧдан мьрьн, гава wан бәр'ийа Синайеда шаш агьр ль бәр Хӧдан дан у әw безӧр'әт бун. Елазар у Ит'амар ль бәр ч'ә'ве Һаруне баве хwә к'аһинти дькьрьн.
[5] Хӧдан Мусар'а хәбәрда у гот:
[6] «Qәбила Леwи бинә у ль бәр Һаруне к'аһин бьдә сәкьнандьне кӧ бәрдәстийа wи бькьн.
[7] Бьра әw борще нобәдарийе бона wи у һ'әму щьвине ль бәр Коне Щьвине бьqәдиньн, хьзмәтк'арийа пирозгәһе бькьн.
[8] Хwәйитийа һәр тьштед Коне Щьвине у борще зар'ед Исраел бькьн аwа готи хьзмәтк'арийа пирозгәһе бькьн.
[9] Тӧ гәрә леwийа бьди Һарун у кӧр'ед wи. Әw wир'а һатьнә дайине жь нава зар'ед Исраел.
[10] Тӧ гәрә Һарун кӧр'ава к'ьфш ки бона кӧ әw qӧльхе к'аһинтийа хwә бьqәдиньн. Ле гава йәки дьн незики пирозгәһе бә, гәрә бе кӧштьне».
[11] Хӧдан Мусар'а хәбәрда у гот:
[12] «Аwа мьн Леwи жь нава зар'ед Исраел һьлдан, дәwса wан һ'әму ньхӧрийед кӧ бәт'ьне вәдькьн жь нава зар'ед Исраел. Аwа леwийе бона мьн бьн
[13] чьмки һәр ньхӧри п'ара мьн ә. Wе р'ожа кӧ мьн һ'әму ньхӧрийед wәлате Мьсьре хьстьн һьнге мьн һ'әму ньхӧрийед Исраелда жь мерьв һ'әта һ'әйwен хwәр'а бӧһӧрти-жьбарә кьрьн. Әwе п'ара мьн бьн, әз Хӧдан ьм».
[14] Хӧдан диса т'әви Муса ль бәр'ийа Синайеда хәбәрда, гот:
[15] «Зар'ед Леwи анәгори олк'ед wан, малбәтед wан бьжмьрә. Һәр qьсьме нерини жь йәкмәһе бьжмьрә».
[16] Муса анәгори хәбәра Хӧдан, чаwа кӧ wир'а һатьбу готьне әw жьмартьн.
[17] Әв бун наве зар'ед Леwи: Гершон, Qоһат' у Мерари.
[18] Әв жи наве зар'ед Гершон ә, малбәтед wанва: Либни у Шими.
[19] Зар'ед Qоһат' жи малбәтед wанва әв ьн: Ә'мрам, Исһар, Һеброн у Узиел.
[20] Зар'ед Мерари малбәтед wанва әв ьн: Маһ'ли у Муши. Әвана малбәтед леwийа нә анәгори олк'ед wан.
[21] Малбәта либни у малбәта шими дьгьһижьнә Гершон. Әвана малбәтед гершонийа нә.
[22] Һ'әсабе wан, аwа готи һ'әсабе һәр qьсьме нерини жь йәкмәһе 7500 нәфс бун.
[23] Малбәтед гершонийа бьра пьшт пирозгәһе, аwа готи алийе р'оавайе, зома хwә лехьн.
[24] Сәрwере олк'а гершонийа Әлйасафе кӧр'е Лайел бу.
[25] Борще зар'ед Гершон ль Коне Щьвинеда хwәйитийа Пирозгәһ, сәргьра сәр гьртьне у сәрк'еша wе у п'әр'да бәр дәре Коне Щьвине йә,
[26] п'әр'дед һ'әwше у п'әр'да бәр дәре һ'әwше кӧ дора пирозгәһ у горигәһе йә, ӧса жи һәбьнед wе, ӧса жи һ'әму шьхӧле wе йә.
[27] Малбәта ә'мрамийа, малбәта Исһарийа, малбәта һебронийа у малбәта узиелийа дьгьһижьнә Qоһат'. Әвана малбәтед qоһат'ийа нә.
[28] Һ'әсабе һәр qьсьме нерини жь йәк мәһе 8600 нәфс бун. Вана хwәйитийа щийе пироз дькьр.
[29] Малбәтед зар'ед Qоһат' бьра зомед хwә алийе башура пирозгәһе лехьн.
[30] Сәрwере олк'а малбәтед qоһат'ийа Әлисафане кӧр'е Узиел бу.
[31] Борще хwәйитийа wан: сьндоq, сьфьрә, шәмдан, горигәһ у һащәтед пироз бона хәбата wан, ӧса жи п'әр'дә у һ'әму шьхӧле wе нә.
[32] Сәроке сәрwеред леwийа Елазаре кӧр'е Һаруне к'аһин бу. Әw сәрwере wан бу йед кӧ хwәйитийа щийе пироз дькьрьн.
[33] Малбәта маһ'лийа у малбәта мушийа дьгьһижьнә Мерари. Әвана малбәтед меарийа нә.
[34] Һ'әсабе һәр qьсьме нерини жь йәкмәһе 6200 нәфс бун.
[35] Сәрwере олк'а малбәтед Мерари Сурийеле кӧр'е Абихайил бу. Әw бьра алийе бакӧра пирозгәһе зоме хwә лехьн.
[36] Борще хwәйитийа кӧр'ед Мерари: Читед пирозгәһе, дәстуйе wе, стунед wе, бьнгәһед wе, һ'әму һащәтед wе у һ'әму шьхӧле wан,
[37] ӧса жи стунед дора һ'әwше, бьнгәһед wан, сьнгед wан у һәбьнед wан ә.
[38] Муса, Һарун у кӧр'ед wи зомед хwә бьра алийе р'оһьлата пирозгәһе, пешбәри Коне Щьвине лехьн. Әw гәрә хwәйитийа щийе пироз бькьн бона бехофийа зар'ед Исраел. Гава йәки дьн незик бә, гәрә бе кӧштьне.
[39] Муса у Һарун анәгори хәбәра Хӧдан һ'әму леwи анәгори малбәтед wан жьмартьн. Һ'әсабе һ'әму qьсьме нерини жь йәкмәһе 22000 нәфс бун.
[40] Хӧдан готә Муса: «Һ'әму ньхӧрийед qьсьме нерини зар'ед Исраел жь йәкмәһе бьжмьрә. Р'әqәма навед wан чекә.
[41] У леwийа дәwса һ'әму ньхӧрийе зар'ед Исраел мьнр'а к'ьфш кә ӧса жи һ'әйwане леwийа дәwса һ'әму ньхӧрийе һ'әйwане зар'ед Исраел. Әз Хӧдан ьм».
[42] Муса һ'әму ньхӧрийед зар'ед Исраел жьмартьн, чаwа кӧ Хӧдан т'әми ль wи кьрьбу.
[43] Һ'әсабе һ'әму ньхӧрийе qьсьме нерини йәк мәһи у жор анәгори р'әqәма навед wан 22273 нәфс бун.
[44] Хӧдан Мусар'а хәбәрда у гот:
[45] «леwийа дәwса һ'әму ньхӧрийе зар'ед Исраел к'ьфш кә ӧса жи һ'әйwане леwийа дәwса һ'әйwане wан. У леwийе п'ара мьн бьн, әз Хӧдан ьм.
[46] У бона ван 273 ньхӧрийед зар'ед Исраел кӧ жь леwийа зедәтьр ьн,
[47] жь бәр wан һәр кәсива пенщ шекьли һьлдә, анәгори шекьле пирозгәһе кӧ бист гер ә.
[48] У әw п'әре бәр йед зедәва дайи бьдә Һарун у кӧр'ед wи».
[49] Муса п'әре жь бәрвадайи бона йе жь леwийа зедәтьр һьлдан,
[50] аwа готи әwи жь ньхӧрийед зар'ед Исраел 1365 шекьл анәгори шекьле пирозгәһе һьлдан.
[51] Муса әв п'әред бәрвадайине анәгори хәбәра Хӧдан, чаwа кӧ Хӧдан т'әми дабу Муса, данә Һарун у кӧр'ед wи.