[1] کْرَوُو ࢽَࢽْیَاࢽَیٜࢽْ دْغَیْوُو؞
[2] بَرٜ کُسُوتُّووَا سُوسَدُ کُولُّوِّ، أَدَ دِیُولَࢽْ أَمْ لَا ࢽُوجَࢽِّࢽْ مَلَیْیَوَا ࢻَࢽّجَࢽْ ثَسَاࢽَ؞
[3] أَمْ کُوسُولَࢽْ دَسَاࢽَدَ تَࢽْغُواْ، ࢽَیِ یٜ تَیِیَ رُوکُّو کُوسُولَࢽْ دْغَوَّ غَیْرُو، کُورُو أَمْ بَسَرْدَࢽَدْ یٜیَ تَࢽْغُواْ، ࢽَیِ یٜ بَسَرِ یَوَّ غَیْرُو؞
[4] لَرُسَدْرُو وُࢽْدُ یَیٜ دَرَجَ ثُو، کُورُو بَرٜ وُࢽْدُمَ أَمَࢽْ لَرُسَیٜ جُوُࢽِّ، اللَّه جَࢽٜوُوَ کْࢽْجْࢽَوُوَرُو شَرَ ثْدِّ ࢽَࢽْغَرُو؞
[5] حَلْ کُࢽْغُࢽَ رَوُویٜرُو کَدْࢽُواْ، کْلَ أَوُو تَوَّیٜࢽْ دَࢽُواْ، أَوُووَ اللَّه کْلَࢽْجُیٜ: «تْمَّرُو ࢽِیَ کُولْࢽْجْکِّوَوُو، تْمَّرُو ࢽِیَ وَࢽْجْکِّوَوُو،» یٜࢽُو؞
[6] أَدْ ࢽَࢽْغَرُو رِدُ بَوُووَرُو أَࢽْدِیٜ: «کْمَࢽْدٜدْ تِمَ بَࢽَمَࢽِ وُو، أَوِمَ رِکِّوَوُو؞ کَمْدْ أَوِ وُرُو سْدِّ؟» ࢽِیٜ؞
[7] ࢻُوُوُࢽْدُو ࢽَیِرُو مَࢽَ اللَّهیٜ وُلْࢽْجَاࢽَدَ تَࢽْغُواْ؞ ࢽجٜرُورَمْ ࢽَࢻْتُࢽْجَیٜیَ وُࢽُواْ، کَمْبْرْسٜࢽْجَ غَیْوُو؞
[8] عِیسَى أَلْمَسِیوُدْ بِکَّ یٜ، کُ یٜ، حَرْ أَبَدَرُو ࢻَلْدِوَوُو؞
[9] بَرٜ کُولُّوٜ أَلَمْدُ غَدٜ جِرِ جِرِ ࢽَیِیَ جَوَلَّࢽْ ࢽجَتُّلُوُࢽِّ؞ کَرْوُدْ کْمْبُو بُوسُولَࢽْ غْࢽِ، سٜرْلَࢽْ دُࢽُووَجِمَ ࢽغْلَ وُو؞ أَیْ، أَدَ کْمْبُوسُویٜدْ أَمْ دُوُوࢽْ تَیِیَ جَغَیْمَسُودْرُو ࢻَیْدَجَغَیْوَوُو؞
[10] أَࢽْدِدْ لَیَ دُوَدُرَمْ تَیْیٜࢽَ، تَیِ دُوُوࢽْ لٜیْمَ اللَّهَ تَدُورَمْࢽِࢽْ کِدَ ثَدِدْ أَمَرِ تِیَ بُویٜ ثَدَࢽِّ؞
[11] لْمَࢽَّ دُوُوࢽْ رِمَࢽْ کُرَ بُࢽْجَ ࢻِجٜ ࢽَ جَوْرُو دَرَجَادْرُو بِوُ ࢽَࢽْغَرُو ثُوُدِدْ، دَࢽْجَ ࢽغَوُو بْلَیٜࢽْ کَࢽُّࢽْ وَرْجَیْ؞
[12] أَدْ ࢽَࢽْغَرُو عِیسَى یٜ جَمَدَ بُࢽْجُ کْلَࢽْجُیٜࢽْ تَیِرُّو کَلَکْتُرُو ࢽغَوُو بْلَیٜࢽْ بُوࢽٜ کِیَࢽُو؞
[13] تُو، لُوِیُو تِیَ ࢽغَوُو بْلَیٜࢽْ ࢽَغْیْیُو، رُدُ ثَࢽَدَ یَیْیُو؞
[14] أَوُووَ دُࢽِیَ أَدْࢽْ بْرْࢽِ حَرْ سَوِسُورُو دْغَیْ تَیْیٜࢽْدٜ، أَمَّ بْرْࢽِ ࢻُوُࢽْ إِسِدَ مَࢽِیٜ؞
[15] أَدْ ࢽَࢽْغَرُو تِیٜࢽْ اللَّهرُو سَدَا ࢽجُࢽْغُورُویٜ سَوِسُورُو یِدِّیُو، وُوتّٜ ثِࢽْدٜࢽْ ثُࢽْجُ کَسَدِّیُو، تِرُو دَرَجَ یِیُو؞
[16] بَرٜ ࢽَࢽّغْلَا ࢽَࢽْکْرٜیَ دِیُو کُولُّوِّ، سَدَا جِرِ أَࢽِیٜ اللَّه کْجِࢽْجَ ࢻَࢽْجِ؞
[17] ࢻُوُوُࢽْدُورُو دَوْ کُولْغْࢽُواْ، تَیِیَ غَیْوُو، أَمْ تَیِیَ ثَوُورِ غَیْرُو رُوࢽْدُو ثَرِوِ؞ کَرْوُ کْجِیَ ثَدُو، ࢽجْمْجَیْیَلَࢽْ غْࢽِ، أَدْ ࢽَیِرُو ࢻَیْدَࢽْجَغَیْوَوُو ࢽَࢽْغَرُو؞
[18] أَࢽْدِرُو مُودُوَ سَدُّواْ؞ کَرْوُࢽْدٜࢽْ سَرِوُ بَوُووَ ࢽُوࢽِیٜࢽَ، ࢽَࢻْتُࢽْدٜ سَمَّࢽْ کَلْکَلْ دِیُو رَیِیٜ؞
[19] ࢽَیِیَ لُواْࢽْجَکِّ، دُوَࢽْ ࢽَࢽْدُورُو وَلْدْکّٜ إِسْکِّرُو مُودُوَ دٜوُو؞
[20] اللَّه ࢽَࢽْلٜوَیٜ، تِ دُوُوࢽْ بُ أَمَࢽْ سَوِسُویٜࢽْ کْمَࢽْدٜ عِیسَى سْࢽِ کُرَ دِمِیَیٜدَ کَرْمُولَࢽْ ثْسَࢽْغْࢽَدْ،
[21] رَوُوࢽْجُ دٜوُورُو ࢽَیِیَ أَوُو ࢽغْلَ سَمَّلَࢽْ دَبَّرْࢽْجَ، کُورُو أَࢽْدِلَࢽْ أَوُو تِرُو أَرْدِدُیٜ عِیسَى أَلْمَسِیوُیٜࢽْ ثْدُّو؞ تِرُو حَرْ أَبَدَرُو دَرَجَ تِیُو! أَمِࢽْ؞
[22] کْرَمِیَ، ࢽَیِیَ لُواْࢽْجَکِّ، مَࢽَ کَرْوُرُو دُࢽُو ࢽجُویٜ أَدَ کَسَدُّواْ، ࢽَیِرُو کَلْمَ غَࢽَࢽْ رُوُࢽْجَغَکّْࢽَ ࢽَࢽْغَرُو؞
[23] ࢽُوࢽُواْ، کْرَمِࢽْدٜ تِمُوتِیَ کُوسُولَࢽْ کُولْجَࢽَ؞ تُسّْࢽِّࢽْ إِسِیَ، تِیَ رُوکُّو ࢽَیِیَ ࢽجَرُیْیٜ؞
[24] ࢻُوُوُࢽْدُو سَمَّا مُمِࢽَّ سَمَّآ لٜوَࢽُواْ؞ کْرَمِیَࢽْدٜ لَرْدُ إِتَلِیَیٜدْ ࢽَیِیَ لٜوَࢽْجَیْ؞
[25] سٜرْ اللَّهیٜ ࢽَیِ سَمَّلَࢽْ دْغَ!