[1] کُرٜࢽْ اللَّه غْࢽَغْࢽِرُو جِرِ غَدٜغَدٜࢽْ ثِ ࢽَوِیَیٜࢽْ کَارِیَࢽْدٜرُو مَࢽَ ثْدّْࢽَ،
[2] أَمَّ جَمَࢽْ دَرْیٜىٰ أَدْࢽْ أَࢽْدِرُو تَدَࢽْجُیٜࢽْ مَࢽَ سٜدُّو؞ تِیَ وَرَسَمَ أَوُو سَمَّیٜرُو کِدُو، کُورُو تِیٜࢽْ دُࢽِیَا أَلَکّٜࢽُو؞
[3] تِ تَدَدْ یِیلْدُ دَرَجَ اللَّهیٜ، تِمَ ثَمُࢽُو کَلْکَلْ ࢽَࢻْتُࢽْجُیٜدْ وُو، کُورُو دُࢽِیَ ࢽغَسُووَ کْࢽْدُوُو مَࢽَࢽْجُیٜࢽْ رُوجِ؞ ࢽغَوُو أَدَمْغْࢽَا بِوُوَلَࢽْ تَیِرُّو کَلَکْثْࢽَیٜࢽْ، سَمٜࢽْ کْمْبُورَمْ مَرْتَوَمَیٜࢽْ ࢽَࢻْکٜࢽُو؞
[4] کَالَࢽْجُ ࢽَࢽْتَدَیٜ وَرَسَجْࢽَدْ ثُ مَلَیْیَوَیٜرُو ࢽغَلْوُودْ غَیْ، تِمَ تَیِرُو کُرَ وُو؞
[5] مَلَیْیَوَیٜ ࢻِࢽْجَ غْلٜ اللَّهیٜ ࢽغَلْتٜ تِرُو: «ࢽِ تَدَࢽِ، کُ بَوَࢽْمْبُو وَلّْکّْࢽَ،» ثْࢽٜ وُلْجُوُو، بِ کْلَࢽْجُࢽْ: «وُدْ بَوَࢽْجُرُو وَلّْکِّ، تِ یٜ تَدَࢽِرُو وَلْجِ،» ثْࢽٜ وُلْجُو؟
[6] کُورُو وَلْدٜ سَ کَرُࢽْجُ دُࢽِیَرُو ثُوُدِدْࢽْ تِیٜ: «مَلَیْیَوَ سَمَّ تِرُو أَمْبْثَّا!»
[7] کُورُو کْلَ مَلَیْیَوَدْیٜࢽْ تِیٜ: «مَلَیْیَوَࢽْجُوَ رُحُوَرُو ثْدِ، کِدَوُࢽْجُ یٜیَ تْلَمْ کَࢽُّیٜرُو ثْدِ،»
[8] أَمَّ کْلَ تَدَدْیٜࢽْ تِیٜ: «اللَّه، کُرِسْࢽْمْ کْرْمَیْیٜ سَوِسُورُو دْغَیْ، کُورُو کَࢽْمْ کْرْمَیْیٜدْ تِمَ ࢽَࢽْجِرٜ وُو؞
[9] ࢽَࢽْجِرٜ رَامَّ، جِرٜࢽَمْبُ وَࢽْمَّ؞ أَدْمَ ࢽَࢽْغَرُو اللَّه اللَّهࢽْمْدْ ࢽِیَ کْࢽْدَوُ کَرْوُکْجِیٜࢽْ أَمَࢽْمْبٜیَ کُوجْࢽَرُو سَمْࢽْغٜࢽُو؞»
[10] کُورُو تِیٜ: «ࢽِدْ، کْمَࢽْدٜ، بَدِدُرَمْࢽِࢽْ ࢻْرْدُ دُࢽِیَیٜ غْࢽَیٜمْ، کُورُو سَمٜدْ یٜ کِدَ مُکُّوࢽْمْبٜ؞
[11] تَیِدْ سِدَغَیْ، أَمَّ ࢽِدْ دْغَمِ؞ تَیِ سَمَّ کَجْمُ غَیْ دِࢽْجَیْ،
[12] بَرْمُسْ غَیْ تَیِیَ کْرِࢽْمِ، غْمَجٜ غَیْ ࢻَلْدَیْ، أَمَّ ࢽِدْ ࢻَلْدْمْبَوُورُو دْغَمِ، کُورُو کَوُࢽْمْ یٜ دَجِوَوُو؞»
[13] کُورُو مَلَیْیَوَیٜ ࢻِࢽْجَ غْلٜ اللَّهیٜ ࢽغَلْتٜ تِرُو: «ࢽَمّٜ کْمْبُورَمِّلَࢽْ دُوُوࢽْ، کْلَدُووَࢽْمْبَ سِ غْࢽَدُرَمّْمْبُو دِکِّ!» ثْࢽٜ وُلْجُوُو؟
[14] تَیِ سَمَّ وُولُودِیَ رُحُیٜ أَمْ دُوُوࢽْ ࢽجْکَّوُو وَرَسَجَیْدْرُو کِدَ ࢽجْدُّورُو جُوَادَ، غْࢽَ؟