[1] أَدْ ࢽَࢽْغَرُو، شٜدَوُ کَدَ کَدَمِ أَࢽْدِیَ دِرِسَࢽٜ کْلْسَࢽَدْ، أَࢽْدِ یٜ تَکَّلْ سَمَّا بِوُ بُدُلَࢽْ أَࢽْدِیَ سَدَیْیَ وَࢽِیُو، ࢽٜتُّلَࢽْ ࢽغْرْمْ أَࢽْدِرُو غْࢽَسَاࢽَدَ دِیُو،
[2] سِمْࢽْدٜ عِیسَى تِمَ کَمْبْرْسٜࢽْدٜىٰ ࢻْرْدُࢽْجُ یٜ، کَلْکَلْدُمَࢽْجُ یٜدْرُو ࢻِغْیْیُو، تِ دُوُوࢽْ کَرْوُکْجِ ࢻُوُࢽْجُࢽْ غْࢽَادَ ࢽَࢽْغَرُو کْسْکَ کَرْمُویٜدَ ࢽٜثّٜ ࢽَࢽْغُࢽْجُدَ أَوِمَرُو ࢽغُوجْࢽِّࢽْ کْمْبُورَمْ کُرِسْ کْرْمَیْیٜ اللَّهیٜࢽْ ࢽَࢻْثْࢽَدْ؞
[3] بَرٜ یِمْبَرُوٜ تْمَ کُولُّوِّرُو، تِ دُوُوࢽْ مُکُّو بِوُوُیٜࢽْ ࢽَࢽْکْلَدُو ثَࢽَدَ تَࢽْغُواْ؞
[4] مْلْدُࢽْدُو کْلَ بِوُیٜࢽْ کُورُو یَیٜ حَرْ بُࢽْدُو ࢻِدُرُو ثَدْࢽِّ؞
[5] کُورُو مَࢽَ دُࢽُو ࢽجُومَ ࢽَیِرُو تَدَوَ غَیْرُو ࢽجَدّْࢽَدَ ࢽغٜسُّوَّ: «تَدَࢽِ، بَرٜ ࢽجَرْغَرُو کْمَࢽْدٜىٰ کْسْکٜرُو ࢽغُوࢽْمِّ، کُورُو ࢽِرُو ࢽجْکَّدِیَ، بَرٜ تْمَ کُولّْمِّ؞
[6] أَوُووَ کْمَࢽْدٜ کَمْ ثْرَاࢽَدَ ثَرْغَرِ، کُورُو کَمْ ࢻِ یَیٜ تَدَࢽْجُرُو ثْمُویِدَ کُواْجِ؞»
[7] ࢽجَرْغَرُودَ ࢽٜدُّواْ، اللَّه تَدَوَࢽْجُ غَیْرُو ࢽجَدَیْ؞ تَدَ ࢻِ غْلٜ بَوَࢽْجُ تِیَ ثَرْغَرِوَوُودْ؟
[8] ࢽجَرْغَرُو دُوُوࢽْ وُࢽْدُ یَیٜ تِلَࢽْ ࢽُوَࢽْجُوَدْ ࢽَࢽْدُوࢽْ بَوُووَ، ࢽَیِدْ تَدَوَ غْࢽِ، ࢽغْرِوُوَ؞
[9] کُورُو بَوَوَࢽْدٜ سَسَمْبْࢽَیٜ أَࢽْدِیَ ثَرْغَرْسَࢽٜ تَیِیَ بْرْسْمِّیٜࢽَدْ، بَلّٜ بَوَ رُحُوَیٜدْرُو دَوْࢽْدٜ کُولْغْیْیٜ رُو ࢻَࢽْدِیٜ، غْࢽَ؟
[10] تَیِدْ أَࢽْدِیَ کَوُ غَࢽَرُو جِرِ ࢽغْلَرُو ثَرُࢽَ غَیْࢽِࢽْ ثَرْغَرْسَࢽَ، أَمَّ اللَّه ࢻَیْدَࢽْدٜرُو ثَرْغَرْسَیْ، ࢽُوَࢽْدٜ ࢽَࢽْتَیِرْࢽْجُࢽْ ࢻَࢽْدِیُورُو؞
[11] ࢽجَرْغَرُو سَمَّ سَࢽْجُࢽْ کْجِ غْࢽِ، کُتُّرُو تُرُیْ، أَمَّ ࢽغَوُو أَدْیٜࢽْ تَیِ تِلَࢽْ أَلَمْغَدَدْیٜ ࢽُوَࢽْجَدْ ࢽَࢽْلٜوَ سُو، ࢽَࢽْجِرٜ سُو؞
[12] أَدْ ࢽَࢽْغَرُو مُکُّوࢽْدُو ثْمْبَرْࢽَا ࢽغُرُمْࢽْغُرُمْࢽْدُو دُࢽُو بَوُووَا دُࢽُووَرُو دٜوُو؞
[13] کُورُو سِࢽْدُورُو جَوَلْ ثْکُّو یِدُّواْ، ࢽغَیْࢽِࢽْ ࢽغُرْدِیدْ جَوْ ࢻَࢽْجِوَوُو، ثُجُࢽْجُرُو ࢽغَجِ؞
[14] أَمْ سَمَّا ࢽَࢻْتُ ࢽَࢽْلٜوَیٜ دِیُووَ ࢽَࢽْتَیِرَّ مَࢽُواْ، أَوُووَ ࢽَࢽْتَیِرْدْ بَوُووَ، وُࢽْدُمَ کْمَࢽْدٜیَ ثُرُیْوَوُو؞
[15] حَࢽْغَلْ غْࢽَࢽُواْ، بَرٜ وُࢽْدُمَرُو سٜرْ اللَّهیٜ ࢻَࢽْدُو تِیٜرْࢽِّ، بَرٜ کَرْوُکُتَّ ࢻِمَ ثِجٜ سُوُولْجٜ تِلَࢽْ أَمْ کَدَ تَیِرْ غْࢽِرُو وَلْجَࢽِّ،
[16] بَرٜ وُࢽْدُمَ کْࢽْجْࢽَمَ بِ تَیِرْࢽَمْبُمَ یٜسَوُ غَیْرُو وَلْجْࢽِّ، تِ دُوُوࢽْ مَسْࢽَ تِلُورُو وَرَسَࢽْجُ ࢽَࢽْکَرُیٜ ثْلَدْࢽَدْ؞
[17] ࢽُوࢽُوَّدْ غَیْ، دَرْیٜ، سَ بَرْغَدَ وَرَسَدُرُو مَیٜࢽِّیَ، تِیَ وَیٜرَ؞ سِمَلُووَࢽْ مَجِمَ، دَمَ تْمْدُیٜ ثُوَࢽْدْࢽِّ؞
[18] ࢽَیِدْ أَوُو رَکْثٜ لٜدِرُو غْࢽِ کَدِوْ، بِ کَࢽُّ جَوْ ࢻِتْ سُو، دُوُ ثْلْمْ ࢻْتْ سُو، ࢽُرْࢽَمْبُ سُو، کٜىٰرَ کُرَ سُو،
[19] ࢽُکْتُ کَࢽْغَدِیٜ سُو، کُواْ مَࢽَیٜ سُو، کُواْ دُوُوࢽْ أَمْ ࢻَࢽْجَࢽٜ بَرٜ تَیِرُو مَࢽَ تْرْغَࢽِّرُو لُواْجَࢽَدْ؞
[20] أَیْ، وُواْمْ أَدَ رَکْثَࢽٜ مْرْجَࢽِّ: «لْمَࢽْمَ کَوْ کُرُوُدَ لٜجِیَ، دُوࢽْغُرْ کَوْیٜ غْغْࢻْتَلَࢽْ رُورُو ثٜىٰسِ،»
[21] کُورُو أَوُو ࢻْلٜدْࢽَدْ جَوْمَرُو رِدُیٜ، حَرْ ࢽَوِ مُوسَیٜ: «کَرْوُکَمْ سْدَࢽٜ لُولُوکِّ،» یٜࢽُو؞
[22] أَمَّ ࢽَیِدْ کَوْ کُرُوُ سِیُوࢽّٜرُو، وُوتّٜ بْرْࢽِ اللَّه کْࢽْدْغَیْمَیٜ، جٜرُجَلٜمْ سَمٜىٰرُو إِسُوَّ، کُورُو مَلَیْیَوَ کَدَ کَدَمِیَ ࢽغْمْرِیَ
[23] ثَمُّو جَمَ کَرُیٜ ثُࢽْجَ سَمٜلَࢽْ رُوُوَدَدَ اللَّه أَلْکَلِ أَمْ سَمَّیٜیَ رُحُوَ أَمْ جِرٜوُیٜ کَلْکَلُّو کَلَکْتَࢽَا
[24] ࢽَ عِیسَى سُولُومَ أَمَࢽْ بْرِࢽّٜیَ بُ جْجْرْغَدَ دُوُوࢽْ بُ حَابِلَیٜیَ ࢻَیْدَࢽْ کُوجْࢽَدَرُو إِسُوَّ؞
[25] حَࢽْغَلْ غْࢽَࢽُواْ، تِ مَࢽَ ثْدِدَ بَرٜ وَࢽُوِّ؞ تَیِ دُوُوࢽْ تِ دُࢽِیَࢽْ سْمُوࢽْجَ کَسّْࢽَمَا وَجَࢽَدْ کَجَࢽِّ أَدْ، تِ سَمٜلَࢽْ سْمُوࢽْدٜ کَسّْࢽَمَدَ وَࢽِیٜیَ، ࢽدَیِࢽْ غْلٜ کَࢽِیٜ؟
[26] سَدْࢽْ کُواْࢽْجُ ثِدِدَ جْجْکّٜࢽُو، أَمَّ کْرْمَ وَدُ ࢽغُوجٜ: «ࢻَلُّو کُورُو ثِدِ رُࢽْجُمَا غْࢽِ، سَمٜ یٜیَ جْجْࢽْغْکِّ،» ثْࢽَّ؞
[27] مَࢽَ أَدْ: «ࢻَلُّو کُورُو،» مَاࢽَࢽْجُدْ أَوُووَ جْجْکَّدَدَ بَوُورُو دِیُو، وُوتّٜ أَوُووَ أَلَکَّدَ، ࢽغَیْࢽِࢽْ أَوُووَ جْجْکْتَیْوَوُودْ دَسَیِ؞
[28] أَدْ ࢽَࢽْغَرُو، کْرْمَیْ جْجْکْتِوَوُو ࢻَࢽْدِیٜࢽَدْ، اللَّهَ وُسٜࢽِیُو، جِرِ أَرْدِجِدْࢽْ جَوْرُو دَرَجَآ رِدُوَالَࢽْ تِرُو أَمْبْتْکْیْیُو،
[29] «أَوُووَ اللَّهࢽْدٜدْ کَࢽُّ جُوُیْیَ کَلْ وُو؞»