[1] کَمْبْرْسٜدْ، تِمَ أَوُو تْمَدْࢽَدَ تَبَّتُّو ࢽغُودُ، أَوُووَ تَرُیْوَوُودَ تَرْتِࢻُّو کَسَتُّ؞
[2] تِلَࢽْ کَارِیَࢽْدٜ شٜدَ ࢽغْلَ اللَّهیٜࢽْ ثَوَࢽْدْࢽَ؞
[3] کَمْبْرْسٜلَࢽْ أَࢽْدِ یٜ دُࢽِیَ مَࢽَ اللَّهیٜࢽْ أَلَکْتْࢽَ، وُوتّٜ أَوُو تُرُیْدْ أَوُو تُرُیْوَوُولَࢽْ تْدْࢽَرُو أَسُیٜیْیٜ؞
[4] کَمْبْرْسٜلَࢽْ ࢽَوِ حَابِلَ سَدَا دُوُوࢽْ کَابِلَیٜدَ کُوجْࢽَا اللَّهرُو کِکُّدُو؞ کَمْبْرْسٜࢽْجُ ࢽَࢽْغَرُو تِیَ جِرٜمَرُو ࢽغُوجَࢽٜ شٜدَ ࢽغْلَ کِوَࢽْدُو، اللَّه کْࢽْجُوࢽْجُدَ أَرْدِجْࢽَدْرُو؞ کُورُو تِ ࢽُࢽَمَ، کَمْبْرْسٜࢽْجُ ࢽَࢽْغَرُو کُورُو یَیٜ مَࢽَ ثْدِ؞
[5] کَمْبْرْسٜࢽْجُ ࢽَࢽْغَرُو ࢽَوِ إِدْرِسَ بَرٜ کَرْمُو ثُرُࢽِّرُو تِیَ سَمٜرُو سَࢻْکٜرَ، دَجِ تُوَࢽْدْࢽِّ، اللَّه تِیَ سَࢻْثْࢽَ ࢽَࢽْغَرُو؞ أَوُووَ کَوُ سَࢻْتُࢽْجُدْرُو، اللَّه تِیَ أَرْدِجْࢽَرُو شٜدَجَࢽَ؞
[6] کَمْبْرْسٜ بَوُووَࢽْ أَرْدِدُ اللَّهیٜیَ ࢻَࢽْدُودْ یُوجِوَوُو، أَوُووَ کَمْ اللَّهَ کَرْࢽْجِدْ دُولٜ اللَّه مبٜجِ یٜ، مَدُوُࢽْجُرُو مُکُووَ ثِ یٜدَ کَسَثُّو؞
[7] کَمْبْرْسٜلَࢽْ ࢽَوِ نُوحُ سَ اللَّه تِرُو کْلَ أَوُووَ کُوَ یَیٜ تَرُیْوَوُویٜࢽْ غَلَ ثِࢽَدْࢽْ اللَّه رِدَلَࢽْ أَمْ ࢻَࢽّجُیٜیَ ࢽجْکَّوُورُو مَارَ دَبَّرْیٜࢽُو؞ ࢽغَیْࢽِࢽْ دُࢽِیَرُو وُواْمْ غْࢽَجِیٜ وَرَسَمَ ࢽَࢽْجِرٜ دُوُوࢽْ کَمْبْرْسٜلَࢽْ تُوَࢽْدِدْیٜرُو وَلْیٜࢽُو؞
[8] کَمْبْرْسٜلَࢽْ ࢽَوِ إِبْرَاهِیمْ، سَ اللَّه تِیَ ࢽَ وَرَسَجِدْرُو لٜدُرُو بُواْجْࢽَدْࢽْ، اللَّهَ غِیَ، کُورُو ࢽَ لٜجِمَا ࢽُوجْࢽِّ یَیٜ، لٜىٰࢽُو؞
[9] کَمْبْرْسٜلَࢽْ ثِدِ وَدُدْیٜلَࢽْ سِکُدُو غَیْ ࢽَࢻْکٜࢽُو، کُورُو ثُرُو لٜیْمَوَیٜࢽْ إِسْحَٰࢼُوَ یَعْࢼُوبَا رُوکُّو وَرَسَوُ وَدُ ࢻَلْدْیٜمَࢽْ کَسَرْغَ،
[10] أَوُووَ بْرْࢽِ ࢻْرْدُوَ دُوُوࢽْ کُرْدُمَࢽْجُوَ تَࢽْدُومَࢽْجُوَ اللَّه وُودَ کَرْوُࢽْجُ غُرٜجِ؞
[11] کَمْبْرْسٜلَࢽْ سَارَتُ کْلَࢽْجُ، تِ دُوُوࢽْ ثَمْبِوَوُو یٜ، جَوْرُو کْمُرْجُوجْࢽَ یٜدْ، کَدُوُ ثُوَࢽْدِرُو وَلْیٜࢽُو، دَلِلْࢽْجُدْ تِ وَدُ ࢽغُوجْࢽَدَ أَمَࢽَّرُو ࢽغُوجْࢽَ ࢽَࢽْغَرُو؞
[12] أَدْ ࢽَࢽْغَرُو کَمْ ࢻَلّٜࢽْ، تِ کُورُو ࢽُࢽَ غَیْ، کَدُوُ سِلُّووُوَ سَمٜىٰ ࢽغْوُ غَیْ، کُورُو سِمْ ثِدِ کٜسَ ثِ تٜکُیٜࢽْ کُومْدِوَوُو غَیْ کٜسَمْبُو؞
[13] أَمْ أَࢽِ سَمَّ أَوُو وَدُدْیٜ ثَوَࢽْدْࢽِّࢽْ کَمْبْرْسٜࢽْجَا سَࢽُࢽَ، أَمَّ أَوُودَ کُرُوُیٜࢽْ ثَرُࢽٜ کْجِ ࢻَࢽْجَࢽَ یٜ، تَیِ کْلَࢽْجَ دُࢽِیَࢽْ کُسُوتُّووَ سِکُدُووَرُو کَسَثَّࢽَ یٜ؞
[14] أَوُووَ أَمْ ࢽغَیْ مَࢽَجَیْدْ لَرْدُ غَدٜ کَاࢽجَ مَجَیْرُو ࢻْلٜجَیْ؞
[15] لَرْدُ کُولْجَࢽَدَ تَکْثَیْرُو وَلْیٜࢽُووَ، ثَ دَمَ وَلْدُیٜ ثَوَࢽْدْࢽَ،
[16] أَمَّ ثُجُ أَدْیٜرُو لَرْدُ ࢽغَلْوُو، وُوتّٜ سَمٜىٰرُو کَرْوُࢽْجَ ثَسَکّْࢽَ؞ أَدْ ࢽَࢽْغَرُو اللَّهدْ تِیَ اللَّهࢽْجَلَࢽْ بُواْجَیْدَ ࢽَࢽْغُجِوَوُو، أَوُووَ تَیِرُو بْرْࢽِ لَا دَبَّرْجْغْࢽَ؞
[17] کَمْبْرْسٜلَࢽْ ࢽَوِ إِبْرَاهِیمْ، سَ اللَّه تِیَ جَرَࢻْثْࢽَدْࢽْ، إِسْحَٰࢼُوَ بُ ࢻِدَرُو کَیْࢽُو؞ تِ وَدُدَ ثُوَࢽْدْࢽَدْ تَدَࢽْجُ تُوکْ تِلُودَ ثِࢽَ،
[18] تِ دُوُوࢽْ کْلَࢽْجُࢽْ اللَّهیٜ: «أَمْ إِسْحَٰࢼُیٜࢽْ تَسَمْبِدْمَا کَدُوُࢽْمْلَࢽْ بُواْجَیْ،» ثْࢽَّدْ؞
[19] إِبْرَاهِیمْدْ ࢽَ اللَّهیٜࢽْ کْࢽْدُوُو أَمْ کَرْمُولَمَࢽْ سَࢽْغُویٜ مبٜجِرُو تْمَیٜࢽُو، کُورُو مِسَلْ غَیْࢽِࢽْ تَدَࢽْجُدَ ࢽغَیْࢽِࢽْ کِوَࢽْدُو؞
[20] کَمْبْرْسٜلَࢽْ إِسْحَٰࢼُ یَعْࢼُوبَا یٜسَوُوَرُو کْلَ أَوُووَ ࢻُوُࢽْ إِسَیْیٜࢽْ بَرْغَ دْࢻْکٜىٰࢽُو؞
[21] کَمْبْرْسٜلَࢽْ یَعْࢼُوبَ سَ ࢽُو ثْدِدْࢽْ ثِ کَࢽْجُیٜرُو ࢽجُتْکَدَاࢽْ اللَّهرُو أَمْبْثِّیٜ تَدَ یُوسُࢻُیٜ ࢻِ یَیٜرُو بَرْغَ دْࢻْکٜىٰࢽُو؞
[22] کَمْبْرْسٜلَࢽْ یُوسُࢻُ کَوُࢽْجُ ࢽجٜرُو ثْدِدْࢽْ کْلَ لُوُو إِسْرَاءِیلَوُیٜࢽْ جَࢽْدٜجٜ وَدَ کْلَ سِلَّوَࢽْجُیٜࢽْ کَیْࢽُو؞
[23] کَمْبْرْسٜلَࢽْ، سَ ࢽَوِ مُوسَى تَمْبْࢽَدْࢽْ، یَࢽْجُوَ بَوَࢽْجُوَ تِیَ شَوَرُو ثَرُࢽٜ وَدَ مَیْیٜدَ رِجَࢽِّࢽْ کْࢽْدَوُ یَکُّرُو تِیَ غْرَیٜرَ؞
[24] کَمْبْرْسٜلَࢽْ ࢽَوِ مُوسَى سَ وُرَجْࢽَدْࢽْ تِیَ تَدَ ࢻٜرُو ࢻِرَعَوْࢽَیٜلَࢽْ بُواْجَیْدَ وَجٜ
[25] کْجِ ࢻَࢽْدَ بِوُیٜ تُسِّوَوُو یَیٜرُو جَمَ اللَّهیٜیَ رُوکُّو بُوࢽٜ ࢽجَ کْرٜىٰࢽُو؞
[26] سِمْࢽْجُ مُکُووَدْرُو ࢻِجْغْࢽَ ࢽَࢽْغَرُو، رُدُ دُوُوࢽْ کْلَ أَلْمَسِیوُیٜࢽْ ثَࢽَدَ أَرْسِیے مَسَرّٜرُو تَمَࢽَّ وُورُو ࢽغُویٜࢽُو؞
[27] کَمْبْرْسٜلَࢽْ غْرْغَدُ مَیْیٜ رِجْࢽِّࢽْ مَسَرْࢽِࢽْ کِلُوُو، کُورُو تِ تُرُیْوَوُودَ ثُرُࢽَ غَیْرُو دُࢽُووَرُو دَیٜࢽُو؞
[28] کَمْبْرْسٜلَࢽْ سَلَ بُرُودِ یِسْ بَوُووَدَ بُ جْجْرْدَدَ کِدُو، بَرٜ سِدُوُمَ تَدَوَ کَرُࢽْجَدَ لٜجْࢽِّرُو؞
[29] کَمْبْرْسٜلَࢽْ جَمَدْ بْرْمْ مَلِیَیٜدَ ثِدِ ࢽغَمْدُ غَیْ رٜجَࢽٜ کُویٜرَ، أَمَّ مَسَرْوُ ࢽغَیْ دِیُو مَیٜرَࢽِّیَ، تَیِیَ إِࢽْغِ غِوُو؞
[30] کَمْبْرْسٜ ࢽَࢽْغَرُو جَمَدْ کَوُ تُلُرُّو بْرْࢽِ جٜرِکُویٜیَ دِرِجَࢽَیٜ ࢽغَوُوࢽْ، غَرُ جٜرِکُویٜدْ وُرْغَدَ؞
[31] کَمْبْرْسٜلَࢽْ رَحَبْ جَوَرْدْ سِسِدُوُدَ کْلٜوَࢽْ کَࢻْثْغْࢽَ، غَࢽَمْبُوُوَ رُوکُّو سِدْغْࢽِّ؞
[32] تُو، أَوِ کُورُو وُلّْکِّ؟ ثَ مَࢽَ کْلَ غِدِیُوࢽْ، بَرَکْ، سَمْسُوࢽْ، جَࢻْتَ، مَیْ دَاوُدَ، سَمَیْلَ، ࢽَوِیَ سُویٜࢽْ دِکّْࢽَا، دَمَ ࢻَࢽْدْکِّوَوُو؞
[33] کَمْبْرْسٜلَࢽْ تَیِدْ لَرْدُوَا کْرِوُࢽْ غٜوُو، شَرَ کَمْغٜرَ، وَدُوَا کٜوَࢽْدُو، ثِ ࢽغَمْبَیٜیَ جَکّٜرَ،
[34] کْࢽْدُوُو کَࢽُّیٜیَ سَمْغٜىٰرَ، تِمِ کَشَغَرّٜرُو کَیٜرَ، دُࢽُوࢽَمْبُࢽْجَࢽْ دُࢽُووَرُو وَلْیٜرَ، کْرِوُࢽْ ࢽَࢽْکوَ کٜدُو، کْوُوَ کْرِوُیٜ لَرْدُوَ غَدٜىٰیَ دُیٜرَ؞
[35] کَمُوَ أَمْࢽْجَ سَࢽُࢽَ کَرْمُولَࢽْ رُووَرُو ثِجَࢽَدَ تَیِرُو کَلَکّٜرَ؞ أَمْ لَا أَجَوُ کُرَ کٜسَ، کَرْمُولَࢽْ ثِجَ رُو ࢽغَلْوُو ثَوَࢽْدُورُو أَࢻُ ࢻَࢽْدُو وَیٜرَ؞
[36] لَا یٜرُو رُدُ ࢻْلٜجَغَࢽٜ کِرْوُوࢽْ جَجَرْیٜرَ، کُورُو تَیِیَ سَرْغَلَࢽْ تُجَࢽٜ کُوسُورُو کٜسَکُّو؞
[37] تَیِرُو دُوࢽْغُرْ کَوْیٜ غْغْࢻْکٜىٰرَ، تَیِیَ یِࢽْدِرُو کَمْغٜرَ، کَشَغَرْلَࢽْ رُورُو کٜىٰسُو، کَرَوِ دِمِیٜیَ کَࢽِیٜیَ لُوَدَا ࢻُوࢻُومْغٜرَ، لَمْبِیَ جْکْتُوَࢽْ کَسَرْغَ، تَیِیَ بَسَرْیٜرَ؞
[38] دُࢽِیَدْمَ تَیِیَ رُودُرُو تِࢽِّ، کَلَࢽْغَسَ سُو، کَوْ کُرُوُ سُو، کُلْ کَوْیٜ سُو، بْلَا ثِدِیٜ سُولَࢽْ بَمْبَرَمْغٜرَ؞
[39] تَیِ أَࢽِ سَمَّ کَمْبْرْسٜࢽْجَیٜࢽْ شٜدَ ࢽغْلَ ثَوَࢽْدْࢽَ، أَمَّ أَوُو اللَّه تَیِرُو وَدُرُو ࢽغُوجْغْࢽَدَ ثَوَࢽْدْࢽِّ،
[40] اللَّه أَࢽْدِرُو أَوُو لَا ࢽغَلْوُو دَبَّرْسَاࢽَ ࢽَࢽْغَرُو، ࢽغَیْࢽِࢽْ أَࢽْدِ بَوُولَࢽْ ࢽَࢻْتُ کَلْکَلْدَ ࢽَجَغَیْوَوُو؞