[1] أَدْ ࢽَࢽْغَرُو، کُوَ یَیٜ وَدُ تُسْتُࢽْجُرُو ࢽغَوُویٜ مبٜجِدْ، حَࢽْغَلْ غْࢽَࢽِیُو بَرٜ کَمْࢽْدُو لَا تِیَ ࢻُثّْࢽِّرُو؞
[2] أَوُووَ کَوُرِ کْجِدَ تَیِرُو وُلْجَاࢽَدْ غَیْ، أَࢽْدِ یٜرُو وُلْسَاࢽَ، أَمَّ مَࢽَ کَوُرِدْیٜ تَیِرُو ࢻَیْدَجْغْࢽِّ، تَیِدْ کَمْبْرْسٜلَࢽْ أَمْ ࢻَࢽْجَࢽَدْرُو کْلْدَغَࢽِّ ࢽَࢽْغَرُو؞
[3] أَࢽْدِ کَسَدِّیٜࢽَدْ تُسْتُدْرُو ࢽغَیِیٜ، کْلَࢽْجُࢽْ وُلْجْࢽَدْ غَیْ: «غْرْغَدُࢽِࢽْ کَࢽْسِ بُکّٜ: ‹تُسْتُࢽِدْرُو ࢽغَسَیِوَوُو!› یٜکُّو؞» أَدْسُوࢽْ، کِدَوَࢽْجُ کَوُ دُࢽِیَ أَلَکْتْࢽَمَࢽْ ثٜسٜرْࢽَ؞
[4] کِتَوُیٜ ࢽَ لَاࢽْ کْلَ کَوُ تُلُرْدْیٜࢽْ ࢽغَیْ وُلْجْࢽَ: «کَوُ تُلُرّٜدْࢽْ اللَّه کِدَࢽْجُ سَمَّࢽْ تُسْکٜࢽُو؞»
[5] کُورُو وَلْدٜ ࢽَ أَدْ یٜࢽْ: «تُسْتُࢽِدْرُو ࢽغَسَیِوَوُو!» ثْࢽَّ؞
[6] أَدْ ࢽَࢽْغَرُو، أَمْ لَایٜ تُسْتُدْرُو ࢽغَوُو غَࢻْثْࢽَدْ، کُورُو أَمْ بُرْوُوࢽْ تَیِرُو کَوُرِ کْجِ وُلْجَاࢽَدْ غَࢽَمْبُ ࢽَࢽْغَرُو تُسْتُدْرُو ࢽغَسَاࢽِّدْ،
[7] جَوْرُو تُسّْࢽَیٜ ࢽغَوُوࢽْ اللَّه کُورُو وَلْدٜ کَوُ لَا تِرُو کُ ثَࢽِ دَبَّرْجٜ ثِ ࢽَوِ دَاوُدَیٜࢽْ تِیٜ: «کُ کُواْࢽْجُ ࢻَࢽُّوِیَ، بَرٜ کَرْوُࢽْدُو جَࢽْغُوِّ،» ثْࢽَّ، ثَلَࢽْ وُلِّیٜࢽَدْ غَیْ؞
[8] ثَ یُوشُوَ تَیِرُو تُسْتُ ثِࢽَا، ࢽغَوُوࢽْ اللَّه مَࢽَ کْلَ کَوُ غَدٜىٰࢽْ ثْدْࢽِّ؞
[9] أَدْ ࢽَࢽْغَرُو جَمَ اللَّهیٜرُو یِمْ تُسْتُیٜ غَࢻْثْࢽَ مبٜجِ؞
[10] کَمْ تُسْتُدْرُو ࢽغَاࢽَدْ، اللَّه کِدَࢽْجُࢽْ تُسّْࢽَدْ غَیْ، تِ یٜ کِدَࢽْجُࢽْ تُسّْࢽَ؞
[11] أَدْ ࢽَࢽْغَرُو تُسْتُ أَدْرُو ࢽغَوُورُو کُواْرِ دِیُو، بَرٜ وُࢽْدُمَ غَࢽَمْبُ کَاࢽجَا ثَمُࢽْ ࢽَࢽْغَرُو یٜسّْࢽِّ؞
[12] ࢽُوࢽُواْ، مَࢽَ اللَّهیٜدْ رُووَ یٜ، ࢻَیْدَا یٜ، کَشَغَرْ تْلَمْ یِࢽْدِیَ ࢻِ یَیٜرُو تِمِیَ وُو، تِدْ رُووَ رُحُوَ کُورُو ࢽدْوُوَ بُرِیَ یَکْتَمَ، کُورُو تْمَا ࢽِیَا کَرْوُیٜ شَرَمَ؞
[13] أَلَوْ ࢻِمَ ࢻُوُ اللَّهیٜࢽْ غْرَادَ بَوُو، أَمَّ أَوِسُو ࢻَرَکُّو کَادَ ثُرُیْ، تِ دُوُوࢽْ أَࢽْدِیَ کْࢽْدُوࢽْدٜ سَمَّرُو سَوُورِدْ؞
[14] أَدْ ࢽَࢽْغَرُو، رِمَࢽْ کُرَ مَرْتَوَا سَمٜىٰࢽْ رٜجٜ کُوجْࢽَا تَیْیٜࢽَدْ، وُوتّٜ عِیسَى تَدَ اللَّهیٜدْ، ࢽجَسَرَیْࢽْدٜدَ رُوࢽِیُو!
[15] أَوُووَ رِمَࢽْ کُرَ ࢽَࢽْلَوُࢽْدٜࢽْ رَکْثٜ أَࢽْدِیَ ࢽجُࢽُوسَیْوَوُو غْࢽِ تَیْیٜ، أَیْ، جِرِ ࢻِࢽْ یَیٜ أَࢽْدِ غَیْ جَرَࢻْتْࢽَ، أَمَّ بِوُ ثْدْࢽِّ؞
[16] تُو، کُرِسْ اللَّه سٜرْمَیٜدَ رِدُ بَوُووَرُو کَرْࢽِّیُو، کَࢽْجِمَرِ یٜ ࢻَࢽْدِیُو، سٜرْ سَ جْکْتُیٜࢽْ بَࢽَ کُدُومَ یٜ مُویِیُو؞