[1] وُمَ یَعْࢼُوبَ وُولُودِ اللَّهیٜیَ کْمَ عِیسَى أَلْمَسِیوُیٜیَدْ جِرِیَ مٜوُࢽْ یِࢽْدِࢽْ دُࢽِیَرُو تَتَرْغَادَدْرُو: سَلَمْ!
[2] کْرَمِیَࢽِ، بُوࢽٜ جِرِ جِرِ ࢽَیِیَ ࢽجَوَࢽْدِیَ، أَوُو جَوْرُو کَرْوُکْجِیٜرُو ࢽغُوࢽُواْ،
[3] أَوُووَ رِجَࢻْتُ کَمْبْرْسٜࢽْدُویٜدْ ࢽجَسَکّٜ ࢽٜدُّوِرُو ࢽُوࢽُوَّ؞
[4] أَمَّ ࢽٜتُّدْ کِدَࢽْجُ ثُوتُّو ثْدُو، ࢽغَیْࢽِࢽْ أَوِمَ مَوْࢽْجَࢽِّࢽْ وُرَࢽُوٜ کَلْکَلُّو وَلُّوِ؞
[5] تُو، کَمْࢽْدُو لَا ࢽَࢽْرَشِدُ تِیَ مَوْجْࢽَرُو وَلْیٜࢽُووَ، اللَّه دُوُوࢽْ جْکَّدْࢽِّࢽْ أَمْ سَمَّرُو ࢽَࢽْجَیْجَالَࢽْ ثِمَدَ ثُوُورُو، کُورُو تِرُو ثِ؞
[6] أَمَّ کَمْبْرْسٜلَࢽْ شٜکُّ ثَکّْࢽِّࢽْ ثُوُورُو، أَوُووَ شٜکُّمَدْ تْمْبَرِ تٜکُیٜ کَرُوَیٜ کَࢽْجِ کَࢽْجِرُو تْمْبَلْجِییَ ثَمُࢽْ؞
[7] کَمْ أَدْ بَرٜ ࢽَ کْمَࢽْدٜىٰࢽْ أَوُو لَا ثُوَࢽْدِرُو تْمَجْࢽِّ،
[8] تِ کَمْ حَࢽْغَلْ یِࢽْدِیَ، أَوُو ثْدِ سَمَّࢽْ ࢽَ تِلُوࢽْ دْغَࢽِّ؞
[9] کْرَمِ تَلَادْ دَرَجَࢽْجُدْرُو أَوُلُو جُوُو،
[10] تِ غَرِوُدْ یٜ ࢽَࢽْغُࢽْجُدْرُو أَوُلُو جُوُو، ࢻْرٜ کَجِمْبٜ غَیْ بَوُورُو وَلْجِ ࢽَࢽْغَرُو؞
[11] أَوُووَ کْࢽْغَلْ کَࢽُّࢽْجُوَ جَوْ ࢻِتْ ثُلُوٜ کَجِمْ ࢽغَمْجِ، ࢻْرٜࢽْجُ یٜ رِمْجٜ ࢻِدِ، ࢽَࢽْشَوَࢽْجُ یٜ بَوُورُو وَلْجِ؞ جِرِ أَدْغَیْࢽِࢽْ غَرِوُدْ یٜ دَوُ کْࢽْدُوࢽْجُیٜࢽْ بَوُورُو وَلْجِ؞
[12] بَرْغَࢽْجُ کَمْ ثُرُو جَرَࢻْتُیٜࢽْ ࢽٜثِّدْ، أَوُووَ تِیَ جَرَࢻْثَࢽٜ ࢽَسَرْدِیَ، أَرِیَوُ رُویٜ ثُوَࢽْدِ، أَرِیَوُ دُوُوࢽْ اللَّه أَمْ تِیَ ثَرَاࢽَرُو ثِ ثْࢽٜ وَدُ ࢽغُوجْࢽَدْ؞
[13] بَرٜ وُࢽْدُمَ سَ جَرَوَیٜ تِیَ ࢽغُوجِیَ، «اللَّه وُوَ جَرَمْسُو،» وُلْجْࢽِّ، أَوُووَ اللَّه أَوُو دِوِلَࢽْ جَرَࢻْتِوَوُو، کُورُو تِ کْلَࢽْجُ وُࢽْدُمَا جَرَࢻْثِوَوُو؞
[14] أَمَّ کَمْ ࢻِ یَیٜ مَࢽْغَرْࢽْجُ تِیَ ثْدَࢽٜ جَمْبَجِیَ، جَرَࢻْتِ؞
[15] دَجِ مَࢽْغَرْدْ ثُرُو ࢽغُوجِیَ، بِوُ ثَمْبِ، کُورُو بِوُدْ یٜ وُرَجِیَ، کَرْمُو ثُوُدِ؞
[16] کْرَمِیَࢽِ ࢽجَرَاکّْࢽَسُو، بَرٜ وُࢽْدُمَ ࢽَیِیَ جَمْبَࢽْجَࢽِّ!
[17] کْࢽْجُو ࢽغْلَ سُو، کَلْکَلْ سُو سَمَّ سَمٜࢽْ ࢽَ اللَّه بَوَ ࢽُرْ أَلَکْتُمَیٜࢽْ جْࢻْثِ، تِ دُوُوࢽْ ࢻَلْدِوَوُو یٜ، ࢽَࢽْجُࢽْ کَوْدِ سُوُورْدُمَ بَوُو یٜدْ؞
[18] رَوُوࢽْجُمَࢽْ اللَّه أَࢽْدِ ࢽٜمَ بُرْوُویٜ أَلَکْتُࢽْجُ سَمَّیٜ غَیْرُو وَلِّیُورُو، أَࢽْدِیَ مَࢽَ جِرٜىٰࢽْ سٜسَمْبُو؞
[19] کْرَمِیَࢽِ ࢽجَرَاکّْࢽَسُو، أَدَ أَسُࢽُواْ: وُࢽْدُ یَیٜ ࢻَࢽْدُرُو دُویْرُو وَلْجُو، بَرٜ دُوَࢽْ مَࢽَجْࢽِّ یٜ، غْرْغَجْࢽِّ یٜ،
[20] أَوُووَ غْرْغَدُ کَمْبٜدْ ࢽَࢽْجِرٜ اللَّهیٜیَ ثُوُدِوَوُو؞
[21] أَدْ ࢽَࢽْغَرُو أَوُو وَادَ سُو، دِوِ سُو سَمَّا وَࢽُواْ، مَࢽَ اللَّه کَرْوُࢽْدُورُو ثَکّْࢽَدَ رُوکُرَ بَوُووَلَࢽْ مُووُواْ، ࢽَࢽْجُࢽْ کْࢽْدُوُو ࢽَیِیَ ࢽجْکَّوُویٜیَ؞
[22] بَرٜ کْلَࢽْدُو جَمْبَࢽُوٜ مَࢽَ اللَّهیٜیَ کْرْࢽْدُوُ بَسُّو وَلُّوِّ، تِیَ غَوُرُو وَلُّواْ!
[23] أَوُووَ کَمْ لَا مَࢽَدَ کْرْࢽْجِ دُوُوࢽْ جْغَیْوَوُووَ، تِ کَمْ ࢻْکَّࢽْجُ کُدْرَمْلَࢽْ ثُرُࢽَا ثَمُࢽْ؞
[24] ࢻْکَّࢽْجُ ثُرٜ سَࢻْتِیَمَ، أَلَمَ ࢻْکَّࢽْجُیٜدَ ࢽغٜسِّ؞
[25] أَمَّ کَمْ دُوُوࢽْ وَدَ کَلْکَلْ ࢽَࢽْکَمْ کْلَیٜ ࢻَࢽْدُویٜدَ کْلَ حَࢽْغَلَّیٜࢽْ ثُرٜ تِلَࢽْ دْغَیْ، کُورُو أَوُو ࢻَࢽْجْࢽَا ࢽغٜسِّوَوُو أَمَّ کْࢽْدُو ࢽغْلَ ثْدِدْ، تِمَ کَمْ أَوُو ثْدِ سَمَّࢽْ بَرْغَارُو وَلْجِدْ وُو؞
[26] کَمْ لَا تِ أَدِࢽْمَ ثْࢽِ دُوُوࢽْ ثِࢽْجُ رُوجِوَوُووَ، کَرْوُࢽْجُ جَمْبَجْࢽَ، کُورُو أَدِࢽّجُ یٜ دٜ سُلْ؞
[27] أَدِࢽْ جِرٜىٰیَ أَوُو وَادَ بَوُووَا اللَّه بَوَࢽْدٜ أَرْدِجْࢽَدْ: ࢽغْࢽِیَا کَمُوَ کوَ ࢻَثَّاࢽَآرُو جْکْتُࢽْجَࢽْ کِسْتُوُ یٜ، جَرَوَ دُࢽِیَیٜرُو کَدُ یٜ؞