[1] رِمَࢽْ کُرَ ࢻِ یَیٜ دَوُ أَمْبٜࢽْ کْرٜیَدَدْ جَمَ ࢽَࢽْغَرُو کْلَ أَوُووَ اللَّهیٜࢽْ غَلَادَ، سَدَا سُو، بُ ࢻِدَ بِوُوَ ࢽَࢽْغَرُو سُو ثْدِ؞
[2] کُورُو رَکْثٜ ࢽُودُࢽَمْبُوُوَ أَمْ جَوَلَّࢽْ ثَلُوُࢽَارُو کِسِّیے، تِ کْلَࢽْجُ ࢽَࢽْلَوُࢽْ دْغَࢽَدْرُو؞
[3] أَدْ ࢽَࢽْغَرُو، بِوُوَ جَمَیٜرُو بُ ࢻِدَ ثْدِدْ غَیْ، کَاࢽجُ یٜرُو دِیُو تِرُو وَجِࢻْثْغْࢽَ؞
[4] وُࢽْدُمَ کْلَࢽْجُرُو دَرَجَ أَدَ ࢽغُوجِیوَوُو، سَیْ اللَّه تِیَ بُواْجِیَ، ࢽَوِ هَـٰرُوࢽَا بُواْجْࢽَدْ غَیْ؞
[5] جِرِ أَدْغَیْࢽِࢽْ أَلْمَسِیوُدْ دَرَجَ رِمَࢽْ کُرَرُو وَلْدُیٜ کْلَࢽْجُرُو ࢽغُوجْغْࢽِّ، أَمَّ تِ دُوُوࢽْ تِرُو: «ࢽِ تَدَࢽِ، کُ بَوَࢽْمْبُو وَلّْکّْࢽَ،» ثْࢽَّدْ
[6] ࢽَ غَدٜࢽْ تِرُو: «ࢽِ رِمَࢽْ حَرْ أَبَدَرُو، کَالَ مَلْکِسَدَکَیٜࢽْ،» وُلْجْࢽَ؞
[7] ࢽَࢻْتُࢽْجُ دُࢽِیَیٜࢽْ عِیسَى کُواْ دُࢽُووَا سِمَلُووَا مُودُوَلَࢽْ تِ دُوُوࢽْ ࢽَࢽْجُࢽْ کْࢽْدُوُو تِیَ کَرْمُولَࢽْ ࢽجْکَّوُویٜیَدَ لُواْجِ، کُورُو ࢽَࢽْمُمِࢽّجُدْرُو اللَّه تِیَ ࢻَࢽْغٜࢽُو؞
[8] تِ تَدَ اللَّهیٜ یَیٜ، بُوࢽٜ ࢽجَࢽْجُیٜࢽْ غَ کِرُو؞
[9] ࢽَࢻْتُ کَلْکَلْدَ ࢽَیٜىٰࢽِّیَ، أَمْ تِیَ جَاࢽَ سَمَّرُو ࢻْرْدُ ࢽجْکَّوُو سَوِسُویٜرُو وَلْیٜࢽُو،
[10] کُورُو اللَّه تِیَ رِمَࢽْ کُرَرُو کَالَ مَلْکِسَدَکَیٜࢽْ غَلَیٜࢽُو؞
[11] کْلَ أَدْیٜࢽْ أَوُو وُلْدُیٜ ࢽغْوُ تَیْیٜࢽَ، أَمَّ بَیِࢽْدُࢽْجُدْ جَوْ، ࢽَیِدْ ࢻَࢽْدُرُو لُسُرُّو وَلُّوَّدْرُو؞
[12] تُسّْࢽَ مَلْمْبَرُو وَلْدُ ࢽَیِرُو وَجِمْࢽْجَاࢽَسُوࢽْ، ࢽَیِرُو أَلَمْدُ بُدُ مَࢽَ اللَّهیٜدَ ࢽَࢽْغَدٜمْبُو ࢽجِکّْرَلَࢽْ مْرَدُࢽْدُووَ؞ کْمْبُو کِبُّلَࢽْ غْࢽِ، کِیَمْلَࢽْ مْرَدُࢽْدُووَ؞
[13] وُࢽْدُ دُوُوࢽْ کِیَمْلَࢽْ دْغَࢽَدْ مَࢽَ ࢽَࢽْجِرٜىٰ أَسُجِوَوُو، تِ تَدَاࢽَ ࢽَࢽْغَرُو؞
[14] أَمَّ کْمْبُو کِبُّدْ أَمْ وُرَجَࢽَیٜ، تَیِ دُوُوࢽْ حَࢽْغَلْࢽْجَࢽْ کُلُّمْ ࢻَیْدَدَࢽٜ حَلْࢽْجَ أَوُو ࢽغْلَا دِوِیَ غَیِرْدُرُو أَلَمْغَدَدْ؞