[1] مَلْکِسَدَکَ أَدْ، تِ مَیْ بْرْࢽِ سَلَمْبٜ یٜ، رِمَࢽْ اللَّه مَیْ سَمٜمَیٜ یٜ، تِ دُوُوࢽْ ࢽَوِ إِبْرَاهِیمْ مَیْیَدَ کْرِوُࢽْ جُوٜ وَلْدِدْࢽْ تِیَ کَࢻْثِیٜ تِرُو بَرْغَ دْࢻْثِیٜ،
[2] کُورُو ࢽَوِ إِبْرَاهِیمْ تِرُو جَکَّ أَوِسُویٜیَ ثِࢽَدْ، بُرْوُوࢽْ، مَاࢽَ ثُࢽْجُیٜ مَیْ ࢽَࢽْجِرٜىٰ، کُورُو تِ مَیْ سَلَمْبٜ، مَاࢽَࢽْجُ مَیْ ࢽَࢽْلٜوَیٜ؞
[3] تِدْ بَوَ، بِ یَ، بِ کَارِیَ ثْدَࢽِّ، بَدِدُرَمْ کَوُیٜ بِ ࢽجٜرُورَمْ رُویٜ ثْدَࢽِّ، أَمَّ تَدَ اللَّهیٜیَ ثَمُࢽُّو وَلْجْࢽَ، کُورُو سَوِسُورُو رِمَࢽْ دْغَیْ؞
[4] تُو، ࢽَࢽْکُرَ کَمْ أَدْیٜدَ رُیْوُو، تِ دُوُوࢽْ کَارِࢽْدٜ ࢽَوِ إِبْرَاهِیمْ تِرُو جَکَّ غَࢽِمَدْیٜ ثِࢽَدْ؞
[5] کْلَ أَتَّوْرَیٜࢽْ تَیِ کَدُوُ لٜوِیٜ کَالَ ࢽَࢽْرِمَࢽّٜ ثَوَࢽْدْࢽَدْ وَدَ مُکُّو جَمَیٜࢽْ جَکَّ مُواْیٜ ثَدَࢽَ؞ جَمَدْ ࢽَوِ إِبْرَاهِیمْبٜࢽْ تَسَمْبْࢽَ، وُوتّٜ کْرَمِیَࢽْجَ یَیٜ، مُکُّوࢽْجَࢽْ جَکَّ ثَمُویِ؞
[6] أَمَّ مَلْکِسَدَکَ تِ دُوُوࢽْ ࢻْرْدُࢽْجُ تَیِلَࢽْ بَوُودْ مُکُّو ࢽَوِ إِبْرَاهِیمْبٜࢽْ جَکَّ ثْمُویٜ تِ وَدُوَدَ ثْمُواْࢽَدْرُو بَرْغَ دْࢻْکٜىٰࢽُو؞
[7] شٜکُّمَ بَوُو غَࢽَ کُرَیٜࢽْ بَرْغَ ثُوَࢽْدِ؞
[8] کُرُو لَایٜࢽْ أَمْ ࢽُووُ جَکَّ ثَمُویِ، أَمَّ کُرُو غَدٜىٰࢽْ تِ رُووَرُو شٜدَجَࢽَدْ جَکَّ ثْمُویِ؞
[9] کُورُو ࢽغَیْ وُلْدُرُو، لٜوِ جَکَّ مُواْمَدْ ࢽَوِ إِبْرَاهِیمْبٜࢽْ جَکَّ بِیَجْࢽَ،
[10] أَوُووَ سَ مَلْکِسَدَکَ ࢽَوِ إِبْرَاهِیمْبَ کَࢻْثْغْࢽَیٜࢽْ، تِدْ کُورُو یَیٜ ثُرُو تِیے کَارِࢽْجُیٜࢽْ؞
[11] تُو، جَمَدْ کَالَ ࢽَࢽْرِمَࢽْ لٜوِیٜࢽْ أَتَّوْرَا ثَمُواْࢽَ، أَمَّ کَلْکَلُّو وَلْدُ تِلَࢽْ إِسْࢽِّ؞ أَدْ ࢽَࢽْغَرُو رِمَࢽْ غَدٜ کَالَ ࢽَوِ هَـٰرُوࢽَیٜࢽْ غْࢽِ، کَالَ مَلْکِسَدَکَیٜࢽْ ثُلُوِلَࢽْ مْرَدُوَ؞
[12] ࢽَࢽْرِمَࢽْدْ ࢻَلْدِیَ، دُولٜ وَدَدْ یٜ ࢻَلْدِ؞
[13] أَوُووَ تِ کْلَࢽْجُࢽْ أَوُو أَࢽِ وُلْدْࢽَدْ جِرِ لٜوِیٜ غْࢽِ، جِرِ غَدٜىٰ، جِرِ دُوُوࢽْ وُࢽْدُࢽْجُمَ کِدَ لَیَ دُوَدُرَمْبٜ ثْدْࢽِّدْ؞
[14] تَبَّتْ کْمَࢽْدٜ جِرِ یَحُدَیٜࢽْ کِلُوُو، کُورُو ࢽَوِ مُوسَى کْلَ رِمَࢽَّ جِرِ أَدْیٜࢽْ أَوِمَ وُلْجْࢽِّ؞
[15] أَدْ کُورُو ثَیٜمَا کُوجْࢽَرُو ࢻٜدٜرُو وَلْجِ، رِمَࢽْ غَدٜ مَلْکِسَدَکَا ثَمُࢽْ ࢻْلٜدِییَ،
[16] رِمَࢽْ دُوُوࢽْ کْلَ أَدَ کَاࢽْ کَارِࢽّٜࢽْ غْࢽِ، کْلَ کْࢽْدُوُو رُو ثٜرِوَوُویٜࢽْ رِمَࢽُّو وَلْجْࢽَدْ؞
[17] أَوُووَ شٜدَ أَدَ کْلَࢽْجُࢽْ ثَدِ: «ࢽِ رِمَࢽْ حَرْ أَبَدَرُو، کَالَ مَلْکِسَدَکَیٜࢽْ؞»
[18] وَدَ ثَیٜدْ دُࢽُوࢽَمْبُࢽْجُوَ ࢻَیْدَࢽَمْبُࢽْجُوَ ࢽَࢽْغَرُو بَوُورُو وَلْجْࢽَ،
[19] أَوُووَ وَدَدْ أَوِمَا کَلْکَلُّو کَلَکْثْࢽِّ، أَمَّ ثُجُࢽْجُرُو تْمَ ࢽغَلْوُو مبٜجِ، تِیٜࢽْ اللَّهَ کَرْࢽِّیٜ؞
[20] کُورُو أَوُو أَدْ کَࢽْسِ بَوُووَلَࢽْ غْࢽِ تْدُو؞ أَوُووَ ثَلَࢽْ أَمْسُو کَࢽْسِ بَوُووَلَࢽْ رِمَࢽَّرُو وَلْجَࢽَ،
[21] أَمَّ عِیسَدْ، اللَّهیٜ تِرُو: «کْمَࢽْدٜ کَࢽْسِ جُوُࢽَ، کُورُو تْمْدِوَوُو: ‹ࢽِ رِمَࢽْ حَرْ أَبَدَرُو،›» ثْࢽٜ کَࢽْسِیَلَࢽْ تِیَ رِمَࢽُّو کِدُو؞
[22] کْلَ أَدْیٜࢽْ عِیسَى أَمَࢽْ ࢽغَلْوُودَ تَبَّثِّیے؞
[23] کُورُو أَمْ ࢽغْوُ رِمَࢽُّو وَلْجَࢽَ، کَرْمُویٜ تَیِیَ کِدَࢽْجَࢽْ کُولْجٜ دَسَیِوَوُو ࢽَࢽْغَرُو،
[24] أَمَّ تِ سَوِسُورُو دْغَیْ ࢽَࢽْغَرُو، ࢽَࢽْرِمَࢽْ تْمَّرُو ࢻَلْدِوَوُو ثْدَࢽَ؞
[25] أَدْمَرُو کْࢽْدُوُو أَمْ دُوُوࢽْ تِیٜࢽْ اللَّهَ کَرْࢽْجَیْدَ سَوِسُورُو ࢽجْکَّوُویٜ ثْدَࢽَ، دَلِلْࢽْجُدْ تِ سَوِ یَیٜ تَیِرُو مُودُوَ ࢽجْدُّورُو دْغَیْ ࢽَࢽْغَرُو؞
[26] رِمَࢽْ کُرَ جِرِ أَدْ غَیْ تَیْیٜیَ، جُسّْࢽَ: مُمِࢽْ، بِوُبَوُومَ، تَیِرْ، بِوُوُوَ ࢻَیْدَࢽَ، سَمٜمَرُو کُرُوُࢽُّو سَࢻْثَࢽَ؞
[27] رِمَࢽَّ کُرَ غَدٜ غَیْ بُ ࢻِدَ یِمْبِ یَیٜ دِیُولَࢽْ مْرَدُࢽْجُ بَوُو، بُرْوُوࢽْ بِوُوَ کْلَࢽْجُیٜرُو، دَجِ بِوُوَ جَمَࢽْجُیٜرُو؞ أَدَ سَ کْلَࢽْجُ بُ ࢻِدَرُو ثِࢽَدْࢽْ تِلُو لُوࢽُّو کِدُو؞
[28] أَوُووَ وَدَدْ أَمْ دُࢽُو بَوُووَ رِمَࢽْ کُرَرُو غَلَجِ، أَمَّ وَدُ کَࢽْسِیٜ ࢽغَوُو وَدَدْیٜࢽْ إِسْࢽَدْ تَدَ حَرْ أَبَدَرُو کَلْکَلُّو وَلْجْࢽَدَ غَلَجِ؞