[1] أَدْ ࢽَࢽْغَرُو، کْرَمِیَ مُمِࢽَّ، ࢽَیِ بُواْدُ سَمٜىٰࢽْ ࢽُوَࢽْدُووَدْ، عِیسَىٰ وُࢽُواْ، تِمَ کْࢽْغَیَمْبَ رِمَࢽْ کُرَا ࢽجَسَرَیْࢽْدٜىٰدْ وُو؞
[2] ࢽَوِ مُوسَى ثُرُو جَمَ اللَّهیٜ سَمَّیٜࢽْ أَمَࢽَّدْ غَیْ، عِیسَى یٜ تِ دُوُوࢽْ تِیَ غَلَجْࢽَدْرُو أَمَࢽَّ؞
[3] ࢻَدُو تَࢽْدُومَ ࢻَدُودَ دَرَجَࢽْ کُوجْࢽَدْ غَیْ، عِیسَى یٜ ࢽَوِ مُوسَىٰ دَرَجَࢽْ کُودُیٜ مَرْتَوَࢽْجُوَ؞
[4] أَوُووَ ࢻَدُو ࢻِ یَیٜیَ کَمْ ثْدَࢽْدْࢽَ مبٜجِ، أَمَّ تِ أَوُو سَمَّا ثْدَࢽْدْࢽَمَدْ، تِمَ اللَّه وُو؞
[5] تُو، ࢽَوِ مُوسَدْ اللَّهیٜ وُولُودِ، ثُرُو جَمَࢽْجُ سَمَّیٜࢽْ أَمَࢽَّرُو وَلْجٜ ࢽَࢻْتُ شٜدَمَ أَوُو ࢻُوُࢽْ وُلْدِدْیٜ کِدُو،
[6] أَمَّ أَلْمَسِیوُدْ اللَّهیٜ تَدَ، کْلَ جَمَࢽْجُیٜࢽْ أَمَࢽَّ، کُورُو کَرْوُکِبَّࢽْدٜیَ ࢻْرْدُ تْمَࢽْدٜىٰیَا رُوࢽِیٜیَ، أَࢽْدِمَ جَمَࢽْجُدْ وُو؞
[7] أَدْ ࢽَࢽْغَرُو، رُحُ اللَّهیٜ وُلْجْࢽَدْ غَیْ: «کُ کُواْࢽْجُ ࢻَࢽُّوِیَ،
[8] بَرٜ کَرْوُࢽْدُو جَࢽْغُوِّ، جِرِ تُرُدْࢽْ یِمْ جَرَࢻْتُیٜیَ کَرَاࢽْ ثَدْࢽَدْ غَیْ،
[9] ࢽَ دُوُوࢽْ کَارِیَࢽْدُو سَا ࢻِدٜوُرُو کْࢽْدُوࢽِ ثَرُࢽَسُوࢽْ وُوَ رِجَمْسَࢽٜ جَرَمْسَࢽَدْ؞
[10] أَدْ ࢽَࢽْغَرُو أَمْ جَمَࢽْ تِلُووَ تُودْرُو غْرْغَغْکّٜ وُیٜ: ‹کُلُّمْ کَرْوُࢽْجَࢽْ ࢻَثَّغَیْ، جَوَلْࢽِدَ ࢽُوجَࢽِّ؞›
[11] دَجِ غْرْغَدُࢽِࢽْ کَࢽْسِ بُکّٜ: ‹تُسْتُࢽِدْرُو ࢽغَسَیِوَوُو!› یٜکُّو؞»
[12] کْرَمِیَ، حَࢽْغَلْ غْࢽَࢽُواْ بَرٜ کَمْࢽْدُو لَا کَرْوُ دِوِیَ کَمْبْرْسٜࢽَمْبُوَارُو وَلْجٜ اللَّه کْࢽْدْغَیْمَا کُولْجْࢽِّ؞
[13] یِمْ تِرُو کُ ثَࢽِسُوࢽْ کَتّٜࢽْدُوࢽْ دُࢽُووَدْࢽُواْ، بَرٜ جَمْبَ بِوُیٜ وُࢽْدُࢽْدُومَا ثَکّٜ کَرْوُࢽْجُ جَکْثْࢽِّرُو؞
[14] تْمَࢽْدٜ بُرْوُویٜدَ حَرْ ࢽجٜرُورَمْبُو ࢽغْلَرُو رُوࢽِیٜࢽَا، ࢽَ أَلْمَسِیوُیٜࢽْ ࢽُوَࢽْدٜیَ؞
[15] وُلْدْࢽَدْ غَیْ: «کُ کُواْࢽْجُ ࢻَࢽُّوِیَ، بَرٜ کَرْوُࢽْدُو جَࢽْغُوِّ، جِرِ تُرُدْࢽْ ثَدْࢽَدْ غَیْ؞»
[16] وُࢽْدُسُو کُواْࢽْجُ ࢻَࢽْجَࢽَسُوࢽْ تُرُ کٜدُو؟ تَیِ مُکُّو ࢽَوِ مُوسَیٜࢽْ مَسَرْلَࢽْ ثَلُوُࢽَ سَمَّ، غْࢽَ؟
[17] وُࢽْدُسُورُو اللَّه سَا ࢻِدٜوُرُو غْرْغَجْغْࢽَدْ؟ تَیِ بِوُ ثَدٜ کَمِࢽّجَ کَرَاࢽْ ثَسُرْࢽَدْ، غْࢽَ؟
[18] کُورُو تَیِ غَࢽَمْبُ ثَدْࢽَ غْࢽِیَ، وُࢽْدُسُورُو اللَّه تَیِ تُسْتُࢽْجُرُو ࢽغَسَیِوَوُورُو کَࢽْسِ جْبُّࢽَدْ؟
[19] تُو، کَمْبْرْسٜࢽَمْبُدْرُو رَکْثَࢽٜ ࢽغَسَاࢽِّرُو رُیْیٜࢽَ؞