[1] أَدْ ࢽَࢽْغَرُو أَوُو ࢻَࢽِّیٜࢽَرُو ࢽغْلَرُو حَࢽْغَلْ غْࢽَࢽِیُو، بَرٜ سْرْࢽِیٜࢽْدٜرُو؞
[2] تُو، مَࢽَ مَلَیْیَوَیٜࢽْ وُلْدْࢽَدْ کِبُّ یٜدْ، کُورُو بِوُ سُو، غَࢽَمْبُ سُو سَمَّ وُواْمْࢽْجَ جُسّْࢽَدَ کْلَࢽْجَرُو غْرْجَاࢽَ یٜدْ،
[3] أَࢽْدِ ࢽجْکَّوُو کُرَدَ وَࢽِیٜیَ، ࢽدَیِࢽْ غْلٜ کَدِیٜ؟ ࢽجْکَّوُو أَدْ، کْمَدْ بُرْوُوࢽْ تِیَ مَوُوجْࢽَ، أَمْ ࢻَࢽْجَࢽَدْ یٜ أَࢽْدِرُو تَبَّࢽْسَاࢽَ،
[4] کُورُو اللَّه کْلَࢽْجُ یٜ أَلَمَ سُو، أَوُو أَجَبَّ سُو، کْࢽْدُوُو جِرِ جِرِ سُو، کْࢽْجُووَ رُحُࢽْجُیٜ رَوُوࢽْجُࢽْ دَغَرْدْࢽَ سُویٜࢽْ تِیَ شٜدَجْࢽَ؞
[5] لٜیْرَ کْلَࢽْجُࢽْ مَࢽَࢽِیٜدْ، ثِدِیَ سِ مَلَیْیَوَیٜرُو غْࢽِ اللَّه تِیَ کٜکُّو،
[6] أَمَّ کَمْ لَایٜ ࢽَ لَاࢽْ شٜدَجٜ: «أَوِ کَمْ دُوُوࢽْ تِیَ تَࢽْغْمِدْ بِ تَدَ کَمْبٜ تِرُو کِسْکْمِدْ؟
[7] تِیَ سَ غَࢽَرُو ثِدِیَ مَلَیْیَوَیٜرُو کِسَغْمْ، تِرُو أَرِیَوُ دَرَجَا مَرْتَوَایٜیَ یَکّْمٜ
[8] أَوُو سَمَّا ثِدِیَ سِࢽْجُیٜرُو کٜکّْمْ؞» أَوُو سَمَّا ثِدِیَࢽْجُرُو ࢽجَکُّودْ، اللَّه أَوُو ثِدِیَࢽْجُرُو ثَکّْࢽَ ࢻَلْمَا کُولْجْࢽِّ؞ کْرْمَدْ أَوُو سَمَّا ثِدِیَࢽْجُࢽْ کُورُو یَیٜ رُیْیٜوَوُو،
[9] أَمَّ عِیسَىٰ رُیْیٜ، کَمْ دُوُوࢽْ سَ غَࢽَرُو ثِدِیَ مَلَیْیَوَیٜرُو ثْسَاࢽَدْ؞ بُوࢽٜ کَرْمُویٜ ثَࢽَ ࢽَࢽْغَرُو اللَّه تِرُو أَرِیَوُ دَرَجَا مَرْتَوَایٜیَ ثَکّْࢽَ؞ ࢽغَیْࢽِࢽْ کَرْمُوࢽْجُدْ، سٜرْ اللَّهیٜࢽْ أَمْ سَمَّ ࢽَࢽْغَرُو ࢽُࢽَ؞
[10] اللَّه دُوُوࢽْ أَوُو سَمَّ تِ ࢽَࢽْغَرُو یٜ، تِیٜࢽْ یٜ دْغَࢽَدْ، تَدَوَ کَدَا دَرَجَرُو کُدُورُو، ࢻُوُمَ ࢽجْکَّوُوࢽْجَیٜدَ بُوࢽٜ ࢽجَلَࢽْ کَلْکَلُّو دِیُوࢽْجُدْ جُسّْࢽَ؞
[11] أَوُووَ تِ تَیِرُّو کَلَکْثِدَ تَیِ تَیِرُّو وَلْجَیْدَ سَمَّ بَوَࢽْجَ تِلُو؞ أَدْمَ ࢽَࢽْغَرُو تَیِیَ کْرَمِیَلَࢽْ بُواْدُرُو ࢽَࢽْغُجْࢽِّ،
[12] تِیٜ: «ثُࢽْمْ کْرَمِیَࢽِرُو وُلْغْکِّ، دَوُ جَمَیٜࢽْ ࢽِیَ ࢽجُࢽْغُورْکِّ،»
[13] کُورُو: «تِرُو تْمَࢽِ یَکّْکِّ،» کُورُو وَلْدٜ: «أَکُّوࢽِ تَدَوَ اللَّه سِࢽَا رُوکُّو،» یٜࢽُو؞
[14] تَدَوَدْ تِییَ بُوَادْ، عِیسَى یٜ أَوُو أَࢽِلَࢽْ ࢽُوَࢽْجُوَ؞ ࢽغَیْࢽِࢽْ کَرْمُوࢽْجُیٜࢽْ تِ دُوُوࢽْ کْࢽْدُوُو کَرْمُویٜ ثْدَࢽَ وُوتّٜ إِوُلِیسْدْ یٜیَ بَوُورُو ثْدٜ
[15] أَمْ دُوُوࢽْ رِدُ کَرْمُویٜ ࢽَࢽْغَرُو کْࢽْدْغَیْࢽْجَ سَمَّࢽْ ࢽَࢽْکَرٜیَࢽْ دَسَاࢽَدْ یٜرُو ࢽَࢽْکَمْ کْلَیٜ ثِࢽَ؞
[16] أَوُووَ تَبَّتُّو مَلَیْیَوَا غْࢽِ، کَدُوُ ࢽَوِ إِبْرَاهِیمْبٜیَ بَࢽَجِیے؞
[17] أَدْمَ ࢽَࢽْغَرُو دُولٜ جِرِ ࢻِࢽْ یَیٜ کْرَمِیَࢽْجُدَ ثَمُࢽُّو وَلْجِ، ثُرُو کِدَ اللَّهیٜࢽْ رِمَࢽْ کُرَ کَࢽْجِمَرِمَ یٜ، أَمَࢽَّ یٜرُو وَلْجُو، بِوُوَ جَمَدْیٜ ثِࢽْجُورُو؞
[18] تِ کْلَࢽْجُ جَرَࢻْتْࢽٜ بُوࢽٜ ثَࢽَدْ، ࢽَࢽْجُࢽْ کْࢽْدُوُو تَیِ جَرَࢻْتَیْدَ بَࢽَدُوُیٜ مبٜجِ؞