[1] أَمَࢽْ بُرْوُویٜدْࢽْ وَدَوَ اللَّهرُو أَمْبْتُّوُیٜیَ ࢽَ دَرَجَا ثِدِیٜیَ مبٜجِ؞
[2] أَوُووَ لٜیْمَ کٜتَࢽْدُو، ثُرُو ࢽغِمْࢽْجُ بُرْوُویٜ تِرُو ࢽَ دَرَجَا ثَࢽِدْیٜࢽْ ࢻَتْلَدَ تٜوُرْدَ بُرُودِ سَدَایٜدَ مبٜجِ؞
[3] ࢽغَوُو جُوَ کْࢽْیِࢽْدِیٜدْࢽْ ࢽغِمْ کْࢽْیِࢽْدِیٜ تِرُو ࢽَ جَوْرُو دَرَجَا ثَࢽِ مبٜجِ،
[4] ࢽَدْࢽْ کَاجِ ࢽجَکُّورَمْ دِࢽَرّٜدَ سَࢽْدُوُ أَمَࢽّٜ تِیࢽْجُ سَمَّ دِࢽَرْلَࢽْ جَکَّدَدَ مبٜجِ؞ ثُرُو سَࢽْدُوُدْیٜࢽْ کَلْوُو دِࢽَرّٜ ثُرُوࢽْ کْمْبُو تِرُو مَࢽْ ثَࢽِدَا کَ ࢽَوِ هَـٰرُوࢽَیٜ ࢻْرٜ ثَکّْࢽَدَ أَلُّووَ أَمَࢽْدْیٜدَ مبٜجِ،
[5] سَمٜࢽْجُ یٜࢽْ مَلَیْیَوَ دَرَجَ اللَّهیٜ ࢽَ غْرْغَدُࢽْجُ ࢻَسْتُیٜدَ کَوْدِ ࢻٜࢻٜدُوࢽْجَیٜࢽْ جَکْثَیْ مبٜجِ؞ کْرْمَدْرُو دَمَ مَࢽَ أَࢽِ سَمَّا ࢻَلْ ࢻَلُّو بَیِࢽْدُیٜ بَوُو؞
[6] أَوُو أَࢽِ ࢽغَیْ دَبَّرْغَدَدْ، رِمَࢽَّ ࢽَشَ بُرْوُویٜدْرُو کُلُّمْ ࢽغَسَیٜ کِدَࢽْجَ ثَدِ،
[7] أَمَّ ࢽَشَ کْࢽْیِࢽْدِیٜدْرُو رِمَࢽْ کُرَ رُࢽْجُ سَاࢽْ ࢻَلُّو ࢽغَیِ، کُورُو بُ بَوُووَ ࢽغَیِوَوُو، بُ دُوُوࢽْ کْلَࢽْجُوَ بِوُوَ جَمَیٜ ࢽُودُࢽَمْبُࢽْجَࢽْ ثَدْࢽَا ࢽَࢽْغَرُو ثُوُدِدْ؞
[8] رُحُ اللَّهیٜ ࢽغَیْࢽِࢽْ سَ لٜیْمَ بُرْوُویٜ کُوَ یَیٜ مبٜجِدْ، جَوَلْ ࢽَ جَوْرُو دَرَجَایٜدْ کُورُو یَیٜ إِسَࢽُودْࢽِّرُو ࢻَرَکُّو ࢻْلٜىٰࢽُو؞
[9] أَدْ مِسَلْ جَمَࢽْ کُیٜرُو، أَوُووَ سَدَآ بُ ࢻِدَآ رِمَࢽَّ ثَدِدْ رَکْثَࢽٜ کَرْوُ أَمْبْتُّوُمَیٜدَ کَلْکَلُّو کَلَکْثَیْوَوُو؞
[10] تَیِدْ وَدَوَ تِییٜ، کْمْبُووَ کْࢽْجَا کَسَلَ جِرِ جِرِیَا وُجَࢽَ، حَرْ أَوُو سَمَّ بْرِࢽُّو وَلْجِرُو غْࢽَادَ؞
[11] أَمَّ أَلْمَسِیوُ ࢻْلٜدْغْࢽَ، وُوتّٜ رِمَࢽْ کُرَ أَوُو ࢽغْلَ ࢽغْلَ إِسَࢽَیٜ؞ ثُرُو لٜیْمَ دُوُوࢽْ مُکُّوࢽْ غْࢽِ تْدَࢽْدْࢽَ، مَاࢽَࢽْجُ أَلَکْتُ أَدْیٜ غْࢽِ، لٜیْمَ بُرْوُویٜدْرُو کُرَا تَیِرَّ وُودْیٜرُو کُوجٜ
[12] تِلُو لُوࢽُّو ࢽَ جَوْرُو دَرَجَادْرُو ࢽغَیٜ بُ دَلْ سُو، کْࢽَّ سُویٜࢽْ غْࢽِ، بُࢽْجُیٜࢽْ مٜرُدُ سَوِسُویٜ کِمُواْ؞
[13] أَیْ، بُ دَلْ سُو، دَلُو سُویٜیَ بُوُ کْࢽَّ کَرْوُدِ وَرْغَدَیٜ کْلَ تَیِرْࢽَمْبُوُیٜࢽْ جْجْرْغَدَآ تِیے کَمْبٜ تَیِرْ غْࢽِدَ تَیِرُّو کَلَکْثَیْرُو وَلْیٜࢽُووَ،
[14] بَلّٜ بُ أَلْمَسِیوُیٜ، تِ دُوُوࢽْ رُحُ سَوِسُویٜࢽْ أَوِمَ وَادَ بَوُووَࢽْ اللَّهرُو کْلَࢽْجُ ثِࢽَدْ، کَرْوُࢽْدٜیَ کِدَ کَرْمُو کُدُومَࢽْ تُلْجِ، ࢽغَیْࢽِࢽْ أَࢽْدِ یٜ اللَّه کْࢽْدْغَیْمَرُو کِدَ یِدِّیٜ؞
[15] أَدْ ࢽَࢽْغَرُو أَلْمَسِیوُدْمَ سُولُومَ أَمَࢽْ بْرِࢽّٜ وُو؞ أَمْ بُواْوَدَدْ وَدُ وَرَسَ سَوِسُویٜیَ ثَوَࢽْدِ، دَلِلْࢽْجُدْ کَرْمُوࢽْجُ تَیِیَ بِوُوَ دُوُوࢽْ کْلَ أَمَࢽْ بُرْوُویٜࢽْ ثَدْࢽَدْلَࢽْ مٜرُجْࢽَ ࢽَࢽْغَرُو؞
[16] لَمَرْ أَمَࢽْ وَرَسَیٜدْ، سَیْ أَمَࢽْ دِیُومَدْ بَوُوجْࢽَرُو تَبَّتِّییَ دُوُوࢽْ،
[17] أَمَࢽْ وَرَسَیٜدْ کَرْمُو بَوُووَ، کْࢽْدُوُوࢽْجُ بَوُو، دَلِلْࢽْجُدْ أَمَࢽْ دِیُومَدْ رُوࢽْجُوَمَا أَمَࢽْ وَرَسَیٜدْ دُࢽُوࢽْجُ بَوُو ࢽَࢽْغَرُو؞
[18] أَدْ ࢽَࢽْغَرُو أَمَࢽْ بُرْوُویٜدْمَ بُ بَوُووَࢽْ ࢽدْࢻْتْࢽِّ؞
[19] ࢽَوِ مُوسَى، ࢽغَوُو وَدَ أَتَّوْرَیٜ ࢻِ یَیٜیَ جَمَ سَمَّرُو وُلْجْغْࢽَیٜࢽْ، بُ کْࢽَّ سُو، دَلْ سُویٜ إِࢽْغِیَ وُلُ کِمٜیَ کْسْکَ تْࢽْغْرِ إِسُوࢻْ ثَࢽِیَࢽْ کُࢽْدٜࢽُّو ࢽغُوجٜ کِتَوُ کْلَࢽْجُوَ جَمَ سَمَّارُو جْجْرْجِیٜ
[20] تَیِرُو: «بُ أَدْ أَمَࢽْ دُوُوࢽْ اللَّه ࢽَیِرُو رُوࢽُواْرُو وُلْࢽْجَاࢽَدَ تَبَّثِّیے،» یٜࢽُو؞
[21] جِرِ أَدْغَیْࢽِࢽْ لٜیْمَدَ کَلْوُووَ أَمْبْتُّوُیٜ سَمَّارُو بُدَ جْجْرْیٜىٰࢽُو؞
[22] کْلَ أَتَّوْرَیٜࢽْ أَوُو ࢽغْوُوَ بُلَࢽْ تَیِرُّو کَلَکْثَیْ، کُورُو بُ ࢻِدَ بَوُووَ، غَوَرَ بَوُو؞
[23] أَدْ ࢽَࢽْغَرُو، کَوْدِ أَوُووَ سَمٜࢽْ دَسَاࢽَیٜدَ بُ ࢻِدَ أَࢽِلَࢽْ تَیِرُّو کَلَکْتُ وَجِࢻْثْࢽَدْ، دُولٜ أَوُووَ سَمٜىٰ کْلَࢽْجَدْ بُ ࢻِدَ أَࢽِیَ کُوجَࢽَلَࢽْ تَیِرُّو وَلْجَیْ؞
[24] أَوُووَ أَلْمَسِیوُ ࢽَ دَرَجَا مُکُّو کَمْبٜࢽْ تْدْࢽَ، وُوتّٜ کَوْدِ أَوُو جِرٜىٰرُو غْࢽِ، أَمَّ سَمٜدْمَرُو کْرْغَوُو، کْرْمَ ࢻُوُ اللَّهیٜࢽْ أَࢽْدِ ࢽَࢽْغَرُو ࢻْلٜدُوُورُو؞
[25] کُورُو سَمٜرُو ࢽغَوُوࢽْجُدْ، کْلَࢽْجُوَ ࢽغْوُرُو بُ ࢻِدَرُو ࢽجُورُو غْࢽِ کْرْغَوُو، جِرِ رِمَࢽْ کُرَ سَا ࢻِ یَیٜ بُ کَاࢽجُ غْࢽِیَࢽْ ࢽَ دَرَجَارُو ࢽغَیِدْ غَیْ؞
[26] أَدْغَیْرُو وَلْیٜࢽُووَ، دُولٜ تْࢽْ أَلَکْتُ دُࢽِیَیٜࢽْ سَیْ ࢽغْوُرُو بُوࢽٜ ثَیْیَ، أَمَّ أَکُّو تِلُو لُوࢽُّو ࢽجٜرُورَمْ جَمَࢽّٜࢽْ کْلَࢽْجُوَ لَیَ دِیُوࢽْجُلَࢽْ بِوُدَ بَوُورُو دِیُورُو ࢻْلٜدْغْࢽَ؞
[27] جِرِ کَمْ ࢻَلُّو ࢽُیْرُو کَدَرْغَدَ، کُورُو ࢽغَوُو أَدْیٜࢽْ سَیْ شَرَدْ غَیْ،
[28] ࢽغَیْࢽِࢽْ أَلْمَسِیوُ یٜ کْلَࢽْجُوَ بِوُ أَمْ ࢽغْوُیٜ ࢽغُودُرُو ࢻَلُّو ثِࢽَ، کُورُو ࢻُوُࢽْ وَلْدٜ کْࢽْیِࢽْدِیٜرُو بِوُ ࢽَࢽْغَرُو غْࢽِ، أَمْ تِیَ غَࢽْغَدَارُو غُرٜجَیْدْرُو ࢽجْکَّوُو کُدُورُو ࢻْلٜدِیے؞