[1] أَتَّوْرَدْ أَوُو ࢽغْلَ ࢽغْلَ ࢻُوُࢽْ إِسَیْدْیٜ ثَمُࢽُو جِرٜىٰ غْࢽِ، کَوْدِࢽْجَ بَسْ ࢽَࢽْغَرُو، تْمَّرُو رَکْثٜ بُ ࢻِدَࢽْجُ کُلُّمْ سَا ࢻِ یَیٜ ثَدِدْیٜࢽْ أَمْ أَمْبْتُّوُرُو کَرْࢽْجَیْدَ کَلْکَلُّو کَلَکْثِوَوُو؞
[2] أَدْ غْࢽِیَ، ثَ أَمْبْتُّوُوُدْ تِلُو لُوࢽِّࢽْ تَیِرُّو وَلْیٜرَا، بِوُوَࢽْجَ غَدٜرُو تَکْثَࢽِّدْ، بُ ࢻِدَ أَࢽِیَ دِیُو کُولْدْࢽَ، غْࢽَ؟
[3] أَمَّ بُ ࢻِدَ أَࢽِࢽْ سَا ࢻِ یَیٜ تَکْتُ بِوُوَیٜ مبٜجِ؞
[4] أَوُووَ بُ دَلُووَا دَلَّایٜࢽْ بِوُوَ ثِࢽْدُدْ تْمَّرُو یُوجِوَوُو؞
[5] أَدْ ࢽَࢽْغَرُو دُࢽِیَرُو کْࢽْدٜࢽْجُࢽْ أَلْمَسِیوُیٜ اللَّهرُو: «بُ ࢻِدَ سُو، سَدَا سُو رَامِّ، أَمَّ وُرُو تِیے دَبَّرْسٜىٰمْ؞
[6] لَیَ رْمْسُّو وَرْغَدَ بِ بُ ࢻِدَ بِوُ ࢽَࢽْغَرُو کَرْوُࢽْمْ ثْرَاࢽِّ؞
[7] دَجِ وُیٜ: ‹اللَّهࢽِ، أَکُّو رَوُوࢽْمْ دِیُورُو کَدِکُّو، کِتَوُلَࢽْ کْلَࢽِࢽْ رُوُوَدَدْ غَیْ،› یٜکُّو؞»
[8] تِیٜ: «بُ ࢻِدَ سُو، سَدَا سُو، لَیَ وَرْغَدَ سُو، بُ ࢻِدَ بِوُ ࢽَࢽْغَرُو سُو رَامِّ بِ أَرْدِࢽْمِّ،» وُلْجْࢽَیٜ ࢽغَوُوࢽْ، وُوتّٜ أَوُو کْلَ أَتَّوْرَیٜࢽْ تْدِدْ،
[9] کُورُو وَلْدٜ: «أَکُّو رَوُوࢽْمْ دِیُورُو کَدِکُّو،» ثْࢽَّ؞ أَوُو کْࢽْیِࢽْدِیٜدَ کُوکْتُرُو بُرْوُویٜدَ ثِࢽْجِ؞
[10] کُورُو رَوُو اللَّهیٜࢽْ أَࢽْدِ سَدَا تِیے عِیسَى أَلْمَسِیوُیٜࢽْ تِلُو لُوࢽُّو تَیِرُّو وَلِّیٜࢽَ؞
[11] رِمَࢽْ ࢻِ یَیٜ یِمْ ࢽغُسُوࢽْ دَادَ کِدَࢽْجُ بُ ࢻِدَ تْمَّرُو رَکْثَࢽٜ بِوُوَ ثِࢽْجَیْوَوُودَ ثْدِیَ ثْدِ،
[12] أَمَّ أَلْمَسِیوُدْ، ࢽغَوُو بُ ࢻِدَ بِوُوَ ࢽَࢽْغَرُو تِلُو لُوࢽُّو حَرْ أَبَدَرُو ثْدْࢽَیٜࢽْ، کْمْبُورَمْ اللَّهیٜࢽْ ࢽَࢻْکٜࢽُو،
[13] کُورُو کُوَ أَدْࢽْ ࢻُوُࢽْ کْلَدُووَࢽْجُوَ سِ غْࢽَدُرَمْࢽْجُرُو ثَدِرُو غُرٜجِ؞
[14] أَوُووَ سَدَا ࢻَلْࢽِࢽْ أَمْ تَیِرُّو وَلْجَیْدَ سَوِسُورُو کَلْکَلُّو ثْدْࢽَ؞
[15] رُحُ اللَّهیٜدْ یٜ أَࢽْدِرُو کْلَ أَدْیٜࢽْ شٜدَ سَدِّ؞ تِیٜ:
[16] «أَکُّو أَمَࢽْ ࢽغَوُو یِمْ أَࢽِیٜࢽْ تَیِیَ ࢽدْمِّیٜدْ، یٜࢽُو کْمَࢽْدٜىٰ، وَدَوَࢽِ کَرْوُࢽْجَرُو یَکّْکِّ، حَࢽْغَلْࢽْجَ یٜࢽْ رُوُࢽْکِّ،» وُلْجْࢽَیٜ ࢽغَوُوࢽْ،
[17] کُورُو وَلْدٜ: «بِوُوَࢽْجَا ࢽَࢽْدِوِࢽْجَآ غَدٜرُو تَࢽْغْکِّوَوُو؞»
[18] غَوَرَ أَࢽِیٜ تْدْࢽَدْ، سَدَا بِوُ ࢽَࢽْغَرُو غَدٜرُو تْدِوَوُو؞
[19] تُو، کْرَمِیَ، بُ عِیسَیٜࢽْ جَوَلْ دُوُوࢽْ رِدُ بَوُووَرُو ࢽَ جَوْرُو دَرَجَارُو ࢽغَوُویٜدَ ࢻَࢽْدِیٜࢽَ،
[20] وُوتّٜ جَوَلْ بْرِࢽْ رُو ࢻَࢽْدُویٜ جُوَیٜࢽْ مَاࢽَࢽْجُ تِیࢽْجُیٜࢽْ أَࢽْدِرُو ࢻْرْمْسَاࢽَ،
[21] کُورُو رِمَࢽْ کُرَ ࢻُوُمَ جَمَ اللَّهیٜ یٜیَ تَیْیٜࢽَ؞
[22] أَدْ ࢽَࢽْغَرُو کَرْوُ تِلُووَࢽْ، کَمْبْرْسٜ تَرْتِࢻَّࢽْ، کَرْوُ یٜ بُلَࢽْ جْجْرْجَࢽٜ حَلْ دِوِࢽْ تَیِرْدْࢽَلَࢽْ، تِیے یٜ إِࢽْغِ تَیِرْ تُلْجْࢽَلَࢽْ کَرْࢽِّیُو!
[23] تِ وَدُ ࢽغُوجْࢽَدْ أَمَࢽَّدْرُو، ࢽجَسَرَیْ تْمَࢽْدٜىٰدَ دُࢽُووَرُو تَیْیُو،
[24] کُورُو کَتّٜࢽْدٜرُو کِسِّییُو، کْرَوُووَ کِدَ ࢽغْلَ ࢽغْلَا دِیُورُو کُواْرِࢽِیُو!
[25] بَرٜ أَدَ أَمْ لَایٜ غَیْرُو ثَࢻْتُࢽْدٜدَ کُولِّیٜࢽْدٜ، أَمَّ کَتّٜࢽْدٜرُو دُࢽُو یِیُو، مَسَمَّࢽُّو یِمْدْ کَرْࢽْدُ ثْدِ رُوِدْرُو؞
[26] أَوُووَ ࢽُودُ جِرٜدْیٜیَ ࢻَࢽْدِیٜࢽَ ࢽغَوُوࢽْ رَوُوࢽْدٜࢽْ بِوُ دِیٜیَ، بُ ࢻِدَ بِوُوَ ࢽَࢽْغَرُو غَدٜرُو بَوُو،
[27] سَیْ وُواْمْ جَوْرُو رِدُیٜ یٜ، کَࢽُّ جَوْ کْلَدُووَ اللَّهیٜیَ جُوُیْ یٜ غُرٜدُ؞
[28] کَمْ أَتَّوْرَ ࢽَوِ مُوسَیٜیَ وَجْࢽَمَدْ کْلَ مَࢽَ شٜدَمَ یِࢽْدِ بِ یَکُّیٜࢽْ کَࢽْجِمَرِ ثُوَࢽْدْࢽِّࢽْ ࢽُیْ؞
[29] تُو، کَمْ تَدَ اللَّهیٜیَ رُجٜ بُ أَمَࢽّٜ تِیٜࢽْ تَیِرُّو وَلْجْࢽَدَ تَیِرْ غْࢽِرُو ࢽغُوجٜ رُحُ سٜرّٜدَ رَجْࢽَمَدْ، وُواْمْ جِرِ ࢻِ تُودَ ࢽَࢽْدِوِࢽْ کُوجْࢽَ تِرُو غْࢽَجَغَیْیَ جُسّْࢽَرُو تْمَࢽُوْ؟
[30] أَوُووَ تِ دُوُوࢽْ: «وُواْمْ غْࢽَدُوُدْ کَکّٜ، وُمَ رْمْبْکِّ،» کُورُو: «کْمَࢽْدٜ جَمَࢽْجُوَ شَرَجِ،» ثْࢽَّدَ ࢽُوࢽِیٜࢽَ؞
[31] مُکُّو اللَّه کْࢽْدْغَیْمَیٜرُو ࢽغَوُودْ أَوُو جَوْرُو رِدُیٜ؞
[32] جَمَࢽْ ثَیٜ، سَ دُوُوࢽْ ࢽغَوُو کَرْوُࢽْدُو وَسّْࢽَیٜࢽْ بُوࢽٜ یَوٜ لَوَلَ کُرَلَࢽْ ࢽٜدُّوَّدَ تَࢽْغُواْ،
[33] سَ لَاࢽْ ࢻُوُ جَمَیٜࢽْ ثُرُو رُدُوَ بَسَرِیَیٜࢽْ دْغَوَّ، سَ لَاࢽْ کُورُو أَمْ تَیِرُو أَدْغَیْ ثَدّْࢽَرُو کْلْدْغْوَّ؞
[34] أَوُووَ کُوسُووُوَ ࢽجُࢽُوࢽُوَّ، کْࢽْدَࢽْدُو مُواْ یٜ کَرْوُکْجِیَلَࢽْ کَسَدُّوَّ، ࢽَیِ کْلَࢽْدُو کْࢽْدَ تِیَ کُوجْࢽَ یٜ، سَوِسُورُو تُسِّ یٜ تَوَّدَ ࢽُوࢽُوَّ ࢽَࢽْغَرُو؞
[35] تُو، أَدْ ࢽَࢽْغَرُو بَرٜ تَبَّتُّوُࢽْدُودَ کُولُّوِّ، تِࢽْ مُکُووَ جَوْرُو ࢻَࢽْدُوِ؞
[36] ࢽٜتُّلَࢽْ مْرَدُࢽْدُووَ، ࢽغَیْࢽِࢽْ، أَوُو اللَّه ثْرَاࢽَدَ دِوَّیٜ ࢽغَوُوࢽْ، أَوُو وَدُرُو ࢽغُوجْࢽَدَ ࢻَࢽْدُوِ؞
[37] «غَࢽَ جْمْ ثْدِیَ، تِ ࢻُوُࢽْ إِسِمَدْ تُسِّوَوُو إِسِ؞
[38] کُورُو جِرٜمَࢽِدْ کَمْبْرْسٜىٰࢽْ رُووَ دْغَیْ، أَمَّ ࢽغَوُورُو وَلْدِیَ، رُوࢽِ کْجِࢽْجُ ࢻَࢽْجِوَوُو؞»
[39] أَࢽْدِدْ تَیِ ࢽغَوُورُو وَلْدَࢽٜ ࢻَثَّغَیْدْیٜ غْࢽِ، تَیِ کَمْبْرْسٜلَࢽْ ࢽجْکَّوُو ثَوَࢽْدِدْیٜ؞