[1] أَوُو وُلِّیٜ سَمَّیٜ أَسُدُرَمْ مَࢽَࢽْدٜىٰدْ: رِمَࢽْ کُرَ أَدْ غَیْ سَمٜࢽْ کْمْبُورَمْ کُرِسْ کْرْمَیْیٜ مَرْتَوَمَیٜࢽْ ࢽَࢻْکَدَا تَیْیٜ،
[2] وُوتّٜ کِدَمَ ࢽَ تَیِرْ لٜیْمَ جِرٜىٰ کَمْ غْࢽِ، کْمَࢽْدٜ کُوکْثْࢽَدْیٜ؞
[3] أَوُووَ رِمَࢽْ کُرَ ࢻِ یَیٜیَ سَدَآ بُ ࢻِدَا ثُورُو غَلَجَیْ، أَدْ ࢽَࢽْغَرُو تِ یٜرُو أَوُو ࢽجُویٜ ࢻَࢽْدُودْ وَجِࢻْثْغْࢽَ؞
[4] ثَ تِ دُࢽِیَࢽْ کْرْغَا، تْمَّرُو رِمَࢽُّو وَلْجِوَوُو، رِمَࢽَّ کْلَ أَتَّوْرَیٜࢽْ سَدَا ࢽجُووُ مبٜجِ ࢽَࢽْغَرُو؞
[5] تَیِدْ کِدَوُ کَوْدِ أَوُووَ سَمٜࢽْ دَسَاࢽَیٜ؞ اللَّه سَ ࢽَوِ مُوسَى لٜیْمَدَ ثْدَࢽْدِدْࢽْ سْمُوࢽْجُ کَسّْࢽَدْ غَیْ: «حَࢽْغَلْ غْࢽَࢽٜ، أَوِسُووَ کْلَ ࢻَسَلْࢽْجُ کَوْ کُرُوُࢽْ ࢻْلٜࢽْجْغْکّْࢽَدْیٜࢽْ تَࢽْدٜ!»
[6] أَمَّ کْرْمَ عِیسَى سُولُومَ أَمَࢽْ ࢽغَلْوُویٜ وَدُوَ ࢽغَلْوُویٜࢽْ تَبَّثّْغْࢽَدْیٜرُو وَلْجْࢽَدْ غَیْ، کِدَ تِرُو تِࢽَدْ یٜ ࢽغَلْوُو؞
[7] أَوُووَ ثَ أَمَࢽْ بُرْوُویٜ أَوِمَ تِلَࢽْ مَوْجْࢽَ بَوُورُو وَلْیٜࢽُووَ، دَلِلْ أَمَࢽْ کْࢽْیِࢽْدِیٜ لَآ مَدُیٜ بَوُو؞
[8] أَمَّ اللَّه جَمَࢽْجُرُو أَیَوْ غْࢽَجِیٜ: «أَکُّو سَ ثْدٜ، جَمَ إِسْرَاءِیلَیٜیَ جَمَ یَحُدَیٜیَ أَمَࢽْ بْرِࢽْ ࢽدْمِّیٜ،» یٜࢽُو کْمَࢽْدٜىٰ،
[9] «أَمَࢽْ دُوُوࢽْ کَارِیَࢽْجَا یِمْ تَیِیَ مُکُّویٜࢽْ تَکّٜ لَرْدُ مَسَرّٜࢽْ تُلُوُکّْࢽَلَࢽْ ࢽدْمِّیٜࢽَدَ ثَمُࢽْ غْࢽِ؞ کْلَ أَمَࢽِّیٜࢽْ دَسَاࢽِّ ࢽَࢽْغَرُو، وُ یٜ تَیِرُو کِسْکْکّْࢽِ،» یٜࢽُو کْمَࢽْدٜىٰ؞
[10] «أَکُّو أَمَࢽْ ࢽغَوُو یِمْ أَࢽِیٜࢽْ جَمَ إِسْرَاءِیلَیٜیَ ࢽدْمِّیٜدْ،» یٜࢽُو کْمَࢽْدٜىٰ، «وَدَوَࢽِ حَࢽْغَلْࢽْجَرُو یَکّْکِّ، کَرْوُࢽْجَ یٜࢽْ رُوُࢽْکِّ؞ اللَّهࢽْجَرُو وَلّْکِّ، تَیِ یٜ جَمَࢽِرُو وَلْجَیْ؞
[11] وُࢽْدُمَ کَمَࢽْجُرُو بِ کْرَمِࢽْجُرُو ‹کْمَࢽْدٜیَ ࢽُوࢽٜ!› ثْࢽٜ أَلَمْجِوَوُو، غَࢽَࢽْجَࢽْ تَمِیَ کُرَرُو کُدٜرُو تَیِ سَمَّ وُوَ ࢽُوسَیْ ࢽَࢽْغَرُو؞
[12] جِرٜࢽَمْبُࢽْجَ ࢽجُࢽُوࢽْکِّ، بِوُوَࢽْجَ یٜ غَدٜرُو تَࢽْغْکِّوَوُو،» یٜࢽُو؞
[13] أَمَࢽْ بْرِࢽْ وُلْدُࢽْجُدْ، بُرْوُویٜدَ دِࢽَرُو کَلَکْثْࢽَ؞ کُورُو أَوُو دُوُوࢽْ دِࢽَ یٜ، سَࢽْجُ کُوجْࢽَ یٜدْ، بَوُورُو وَلْدُࢽْجُ کَرْࢽْجْࢽَ؞