[1] أَدْ ࢽَࢽْغَرُو، أَلَمْدُ بُرْوُویٜ أَلْمَسِیوُیٜدَ کُولِّیُو، کْلَ أَوُو کَلْکَلْدْیٜࢽْ ࢻُوُرُو لٜࢽِیُو؞ بَرٜ کُورُو یَیٜ ࢻْرْدُ غْࢽَࢽِیٜ کِدَ کَرْمُو کُدُومَا وَࢽْمٜ تْمْدُ سُو، اللَّهَ مْرْسَدُ سُو،
[2] أَلَمْدُ کْلَ کَسَلَا مُکُّو غْࢽَدُوُوَ کَرْمُولَࢽْ ثِدُوَ وُواْمْ سَوِسُویٜیَیٜࢽْ کْلَࢽْ مَࢽَ دِیٜࢽْدٜ؞
[3] اللَّهیٜ ثْدِیَ، ࢻُوُ بُیْیٜ؞
[4] أَوُووَ أَمْ کْلَࢽْجَ ࢻْرْمْدٜ کْࢽْجُو سَمٜىٰ ثَسَمْبٜ رُحُ اللَّهیٜࢽْ ࢽُوَ ثَوَࢽْدٜ
[5] مَࢽَ اللَّهیٜ سُو، کْࢽْدُوُو دُࢽِیَ ࢻُوُیٜ سُووَ کْجِرُو ثَسَمْبْࢽَ دُوُوࢽْ
[6] جَوَلَّࢽْ ثَلُوُࢽَدْ، وَلْدْمٜ تَیِیَ تْمْدُرُو کَلَکْتُوُدْ یُوجِوَوُو، دَلِلْࢽْجُدْ کُورُو یَیٜ تَدَ اللَّهیٜدَ کْسْکَرُو جَجَغَࢽٜ ࢻَرَکُّو تِیَ ࢽَࢽْغُرُو ثَسَکِّ ࢽَࢽْغَرُو؞
[7] أَوُووَ ثِدِ دُوُوࢽْ إِࢽْغِ ࢽغْوُرُو تِلَࢽْ ثُدُرٜ ثَࢽٜ ࢽٜمَ بَرٜوُࢽْجُدْرُو ࢻَیْدَا ثَکِّدْ بَرْغَ اللَّهیٜ ثُوَࢽْدِ،
[8] أَمَّ کَرِیے سُو، کَجَیْ سُو ثَکِّیَ، ࢻَیْدَࢽْجُ بَوُو، بَسْکُدُرُو دَبَّرْغَدَ، کُورُو دَرْیٜرَمْࢽِࢽْ کَࢽُّ ثَتَّیْ؞
[9] کْرَوُووُࢽْدٜ، ࢽغَیْ وُلِّیٜ یَیٜ، کْلَࢽْدُوࢽْ أَوُووَ ࢽغَلْوُو مبٜجِرُو مْرْسَࢽِیٜࢽَ، وُوتّٜ أَوُووَ ࢽجْکَّوُویٜ؞
[10] اللَّه جِرٜࢽَمْبُمَ غْࢽِ، کْࢽْدُوࢽْدُو سُو، کِدَ مُمِࢽَّرُو یِدُّوٜ کْرَوُو ثُࢽْجُࢽْ ࢻْلٜࢽُوَّ یٜ، کُوَ یَیٜ ࢻْلٜࢽُوِ یٜ سُووَ ࢽغٜسِّوَوُو؞
[11] کُورُو تْمَࢽْدُو حَرْ ࢽجٜرُورَمْبُو تَبَّثِّیرُو وُࢽْدُࢽْدُو یَیٜ کُواْرِ أَدْمَا ثْدِیَ، رَیِیٜ؞
[12] بَرٜ لَوُرُو وَلُّوِّ، أَمَّ تَیِ دُوُوࢽْ کَمْبْرْسٜیَ کَࢽَدِیَیٜࢽْ وَدُ اللَّهیٜ وَرَسَجَیْدَ غَیْوُو؞
[13] سَ اللَّه ࢽَوِ إِبْرَاهِیمْبُو وَدُ ࢽغُوجْغْࢽَدْࢽْ، وُࢽْدُمَ تِیَ کُوجْࢽَ کْلَࢽْجُࢽْ کَࢽْسِ بُویٜ بَوُودْرُو، کْلَࢽْجُࢽْ کَࢽْسِ جْبُّوٜ:
[14] «تَبَّتُّو بَرْغَ دْمْࢽْجْغْکّٜ کَدُوُࢽْمْ إِسَࢽْغْوُغْکِّ،» یٜࢽُو؞
[15] أَدْغَیْمَ ࢽَوِ إِبْرَاهِیمْ کَࢽَدِࢽْ غُرٜجْࢽَیٜ ࢽغَوُوࢽْ، أَوُو اللَّه تِرُو وَدُرُو ࢽغُوجْغْࢽَدَ کِوَࢽْدُو؞
[16] أَوُووَ أَمْسُو کْلَ أَوُو تَیِیَ کُوجْࢽَیٜࢽْ کَࢽْسِ جَوُیْ، کُورُو کَࢽْسِ تَبَّتْدْ کَمْبِوُࢽْجَ سَمَّا بَوُورُو ثْدِ؞
[17] تُو، اللَّه ࢽَࢽْࢻَلْدُࢽَمْبُ ࢽِیَࢽْجُیٜدَ وَرَسَوُ وَدُدْیٜرُو ثَیٜمَا کُوجْࢽَرُو ࢻْلٜدُوُ کِرَاࢽِّیَ، کَࢽْسِلَࢽْ تِیَ تَبَّتْکٜىٰࢽُو؞
[18] ࢽغَیْࢽِࢽْ کْلَ أَوُو یِࢽْدِ ࢻَلْدَیْوَوُویٜࢽْ، کُورُو کْلَࢽْجَࢽْ اللَّه تْمَّرُو کَتُّوُ کَمْجِوَوُودْ، أَࢽْدِ دُوُوࢽْ غْرَدُرَمْدْرُو کَسِیٜ ࢽغَیِیٜࢽَدْ دُࢽُو کُرَ ࢻَࢽْدِیٜ تْمَ ࢻُوُࢽْدٜرُو ثَکّْࢽَدَ تَیْیٜ!
[19] تْمَ أَدَ سُࢽُ رُویٜ غَیْ تَیْیٜࢽَ؞ تِدْ تَبَّتْ یٜ، دُࢽُووَ یٜ، کُورُو ࢽغَوُو جُوَدْیٜرُو ࢽغَیِ؞
[20] عِیسَى یٜ، تِ دُوُوࢽْ رِمَࢽْ کُرَ سَوِسُویٜرُو کَالَ مَلْکِسَدَکَیٜࢽْ وَلْجْࢽَدْ، ࢻُوُࢽْدٜࢽْ لٜجٜ أَࢽْدِ ࢽَࢽْغَرُو ࢽَدْرُو ࢽغَاࢽَ؞