[1] وُمَ بُلُسْ عِیسَى أَلْمَسِیوُ ࢽَࢽْغَرُو کُوسُومَا تِمُوتِ کْرَمِࢽْدٜیَدْ ࢻِلِمُوࢽْ سَوَࢽْدٜ کِدَیٜ رَیِیٜࢽَدْ یٜ،
[2] یَ أَࢻِیَ کْرَمِࢽْدٜ یٜ، أَکِࢻُسْ سَوَࢽْدٜ مْلْدُیٜ یٜ، کُورُو جَمَ عِیسَىٰ غَوُ ثُرُو ࢻَࢽّْمْبٜࢽْ ثَࢻْتَیْسُودْرُو:
[3] اللَّه بَوَࢽْدٜیَ کْمَ عِیسَى أَلْمَسِیوُوَدْ ࢽَیِرُو سٜرَّ ࢽَࢽْلٜوَا ࢽجَدُو!
[4] ثُرُو مُودُوَࢽِیٜࢽْ ࢽِیَ تَࢽّجْکِّیَ، سَوِ یَیٜ اللَّهࢽِیَ وُسٜࢽْکِّ،
[5] دَلِلْࢽْجُدْ کْمَ عِیسَى یٜیَ مْرْسَࢽْمَّ، مُمِࢽَّ یٜیَ رَامَّ ࢻَکّْࢽَ ࢽَࢽْغَرُو؞
[6] کُورُو أَࢽْدِیَ رُوکُّو مُکُّوࢽْمْ ࢽجَکُّو ثُرُو کَمْبْرْسٜدْیٜࢽْ ࢻَیْدَارُو وَلْجُو، ࢽغَیْࢽِࢽْ أَوُو ࢽغْلَ ࢻِ یَیٜ أَلْمَسِیوُلَࢽْ تَیْیٜࢽَدَ أَسُࢽٜرُو اللَّهَ کُورْکِّ؞
[7] کْرَمِࢽِ، کْرَوُوࢽْمْ ثَکّٜ کَرْوُࢽِ یٜ جَوْرُو کْجِجْࢽَ، رُوࢽِ یٜ دُࢽُو ثُوَࢽْدْࢽَ، ࢽِیٜࢽْ کَرْوُ مُمِࢽَّیٜ بُوجْࢽَ ࢽَࢽْغَرُو؞
[8] أَدْمَ ࢽَࢽْغَرُو، أَلْمَسِیوُلَࢽْ ࢽِرُو وَدَ أَوُو جُسّْࢽَ دِیُویٜ ࢽجُورُو رِکّْࢽِ یَیٜ،
[9] کْلَ کْرَوُویٜࢽْ ࢽِیَ لُواْࢽْجْکِّ؞ وُ بُلُسْ کِیَرِ یٜ، کْرْمَ عِیسَى أَلْمَسِیوُ ࢽَࢽْغَرُو کُوسُومَ یٜدْ،
[10] تَدَࢽِ أُوࢽٜسِمْ ࢽَࢽْغَرُو ࢽِیَ لُواْࢽْجْکِّ، تِ دُوُوࢽْ سَرْغَࢽْ تِکّٜرْکّْࢽَلَࢽْ بَوَࢽْجُرُو وَلّْکّْࢽَدْ؞
[11] ثَلَࢽْ ࢽِرُو ࢻَیْدَࢽْجْغْࢽِّ، أَمَّ کْرْمَ وُوَ ࢽِیَ سَمَّرُو ࢻَیْدَا؞
[12] تِیَ ࢽِرُو کَلَࢽّجْغْکِّ، تِ دُوُوࢽْ کَرْوُࢽِ تِیَ ࢽغُوجْࢽَدْ؞
[13] تِیَ ࢽَࢽِࢽْ رُودُ رَاکّْࢽَ، وُ کَوُرِ کْجِ ࢽَࢽْغَرُو کُوسُولَࢽْ دُوُوࢽْ، ثُجُࢽْمْبُو وُرُو ࢻَیْدَسُوُورُو؞
[14] أَدْ یَیٜ رَوُوࢽْمْ بَوُووَلَࢽْ أَوِمَ دِیُو رَاکّْࢽِ، ࢽَࢽّغْلَࢽْمْدْ دُولٜرُو غْࢽِ، رَوُوࢽْمْبٜرُو وَلْجُو؞
[15] وَࢽٜىٰ دَلِلْ ࢽِیَ تِیَ کَوُ غَࢽَرُو ࢻَیْدُوَّدْ، کْرْمَ تِیَ سَوِسُورُو ࢻَࢽْدٜرُو،
[16] غَدٜرُو کَرٜیَ غَیْ غْࢽِ، کَرٜیَمَا کُوجْࢽَرُو کْرَمِ تْرَاࢽَ غَیْ، مَسَمَّࢽُّو ࢽَࢽِࢽْ، بَلّٜمَ ࢽَࢽْمْلَࢽْ، ࢽَࢻْتُࢽْجُ أَدَمْغْࢽَیٜ یٜࢽْ کَلْ، ࢽَࢻْتُࢽْجُ کْمَا مْرْسَدُمَیٜ یٜࢽْ کَلْ؞
[17] وُوَ سَوَࢽْمْ کِدَیٜرُو ࢽغُوسْمَّا، تِ یٜیَ وُ غَیْرُو مُکُّو یِࢽْدِࢽْ مُویٜ!
[18] کُورُو ࢽِرُو أَوُو لَا کُتُّ ࢽغِدُّووَ، بِ أَوُو لَارُو تِیَ غَمِیَ، کْلَࢽِرُو غْࢽَغْࢽٜ!
[19] وُمَ بُلُسْ، مُکُّوࢽِࢽْ أَدَ رُوُࢽْکِّ، رْمْبْکِّ یٜکُّو! کْلَ جِرِ ࢽِ کْلَࢽْمْ رُو سَوِسُویٜ وُیٜࢽْ ࢻَࢽْدْمَّدْیٜࢽْ أَوِمَ وُلْࢽْجْغْکِّوَوُو؞
[20] آه، کْرَمِࢽِ، ࢽِیٜࢽْ کْمَ ࢽَࢽْغَرُو سٜرْ أَدَ ࢻَࢽْدْکُّو، أَلْمَسِیوُلَࢽْ کَرْوُࢽِ إِسَبُوغْࢽٜ!
[21] مَࢽَࢽِ غَمِرُو مْرْسَࢽْکّْࢽَ ࢽَࢽْغَرُو ࢽِرُو رُوُࢽْجْغْکِّ، کُورُو أَوُو وُلْࢽْجْغْکّْࢽَدْمَا کُوجْࢽَا دِمِرُو ࢽُوکّْࢽَ؞
[22] کُورُو جْࢻْتُرَمْ وُرُو دَبَّرْسْغْࢽٜ، مُودُوَࢽْدُویٜࢽْ وُوَ مُکُّوࢽْدُورُو سَسَکِّرُو تْمَࢽِ مبٜجِ؞
[23] أَبَࢻَرَسْ سَوَࢽِ کُوسُویٜ عِیسَى أَلْمَسِیوُ ࢽَࢽْغَرُو ࢽِیَ لٜوَࢽْجِ،
[24] کُورُو مَرْکُسَّ أَرِسْتَرْکُسَّ دِمَسَّ لُکَا سَوَوَࢽِ کِدَیٜ یٜ لٜوَࢽْجَیْ؞
[25] سٜرْ کْمَ عِیسَى أَلْمَسِیوُیٜ ࢽَیِلَࢽْ دْغَ!