[1] تُو، أَدْ کْࢽْیَکُّیٜرُو ࢽَࢽْدُورُو إِسْکِّدْ؞ «مَࢽَ ࢻِ یَیٜ ثِ شٜدَ یِࢽْدِ بِ یَکُّیٜࢽْ تَبَّتِّیے؞»
[2] ثَمَࢽْ کْࢽْدٜࢽِ کْࢽْیِࢽْدِیٜࢽْ وُلّْکّْࢽَدْ غَیْ، کْرْمَ وُ بَوُودْࢽْ أَمْ ثَلَࢽْ بِوُ ثَدْࢽَا أَمْ غَدٜ سَمَّارُو ثَیٜ بَوُورُو وُلْغْکِّ: وَلْدْکّٜ إِسْکِّیَ، تَیِیَ کُولّْکِّوَوُو،
[3] أَلْمَسِیوُ وُلَࢽْ مَࢽَجِدْیٜ شٜدَࢽْجُ مَࢽُوِدْ؞ تِدْ دَوُࢽْدُوࢽْ لَوُ غْࢽِ، کْࢽْدُوُووَ؞
[4] ثُرُو ࢽَࢽْلَوُیٜࢽْ تِیَ کْسْکَ کَرْمُویٜرُو جَجَاࢽَ، أَدْ یَیٜ کْࢽْدُوُو اللَّهیٜࢽْ رُووَ دْغَیْ؞ أَࢽْدِ یٜ تِلَࢽْ لَوُ، أَمَّ کْࢽْدُو ࢽَیِرُو ࢽجَدِّیٜلَࢽْ کْࢽْدُوُو اللَّهیٜࢽْ تِیَ رُوکُّو رُووَ دْغَیْیٜرُو رُوِ؞
[5] کْلَࢽْدُووَ رِجَمُّواْ، کَمْبْرْسٜلَࢽْ دْغَوِرُو کْلَࢽْدُو رُیْوُو! عِیسَى أَلْمَسِیوُ ࢽَیِلَࢽْ دْغَیْرُو أَسُࢽُوِّ وَ؟ رَ، ࢽَیِدْ أَرْدِیَدَ غْࢽِ؟
[6] أَࢽْدِدْ أَرْدِیَدَرُو أَسُࢽُوِرُو تْمَکّْࢽَ؞
[7] بَرٜ أَوُو دِوِ دِوِّرُو اللَّهَ کُورِیٜ؞ ࢽِیَࢽْدٜدْ کْلَࢽْدٜ أَرْدِیَدَرُو بَیِࢽْدُ غْࢽِ، أَمَّ أَمْسُو أَࢽْدِیَ أَرْدِدْࢽِّرُو سَرُیْرُو وَلْیٜࢽُو یَیٜ، أَوُو ࢽغْلَ دٜوُورُو؞
[8] رَࢽْغِیٜ جِرٜدَ أَࢽْغْرْࢽِیٜوَوُو، أَمَّ کْلَ جِرٜدْیٜࢽْ دَࢽِیٜ؞
[9] سَ أَࢽْدِ یٜ لَوُ، ࢽَیِ یٜ دُࢽُووَدْ، کَرْوُࢽْدٜ کْجِجْࢽَ؞ کُورُو کْࢽْدْغَیْࢽْدُو کَلْکَلْجُورُو مُودُوَ دِیٜ؞
[10] دَلِلْ وُ ࢽَࢽْدُوࢽْ بَوُولَࢽْ أَوُو أَࢽِیَ رُوُࢽْکِّدْ، تِمَ إِسْکِّیَ، بَرٜ کْࢽْدُوُو دُوُوࢽْ کْمَࢽْدٜ وُرْدُرُو غْࢽِ، دُࢽُو ࢽجُورُو سِࢽَدْࢽْ ࢽَࢽْجَوْࢽِࢽْ ࢻَیْدَدْکّْࢽِرُو؞
[11] دَرْیٜرَمْبُو، کْرَمِیَ، کَرْوُࢽْدُو کْجِجُو! کْࢽْدْغَیْࢽْدُولَࢽْ جَوَلُّو وَلْدْࢽُواْ، کَرْوُࢽْدُوࢽْ دُࢽُووَدْࢽُواْ، حَࢽْغَلْࢽْدُو تِلُوجُو، ࢽَࢽْلٜوَࢽْ دْغَیْوُو؞ أَدْغَیْمَ اللَّه کْرَوُووَ ࢽَࢽْلٜوَایٜ دَوُࢽْدُوࢽْ دْغَیْ؞
[12] کَتّٜࢽْدُوࢽْ لٜوَ کْرَوُویٜࢽْ لٜوَدْࢽُواْ؞
[13] مُمِࢽَّ سَمَّ ࢽَیِیَ لٜوَࢽْجَیْ؞
[14] سٜرْ کْمَࢽْدٜ عِیسَى أَلْمَسِیوُیٜیَ کْرَوُو اللَّهیٜیَ ࢽَࢻْتُ ࢽَࢽْیَاࢽَ رُحُ اللَّهیٜیَ ࢽَیِ سَمَّلَࢽْ دْغَ!