[1] کْلَ بَࢽَ مُمِࢽَّرُو کُدُودْیٜࢽْ، وُوتِیَ ࢽَیِرُو رُوُࢽْجَغَکُّورُو مْرَدُࢽْدُو بَوُو،
[2] أَوُووَ کَسَدُࢽْدُودَ ࢽُوکّْࢽَ؞ کْلَدْࢽْ ࢽَیِ ࢽَࢽْغَرُو ࢻُوُ مَکِدُوࢽِیَوُیٜࢽْ أَوُلُو بُکّٜ تَیِرُو ࢽَیِ أَکَیَوُدْ تْࢽْ مْࢽْدٜ دَبَّرْدُوَّ ࢽْکّْࢽَ، کُورُو کَسَدُࢽْدُودْ ࢽغْوُࢽْجَرُو دُࢽُو ثِࢽَ؞
[3] أَمَّ کْرَمِیَدَ جُوَغْکِّ، بَرٜ لَمَرْ أَدْلَࢽْ أَوُلُو بُوࢽْدٜ کْلَࢽْدُوࢽْ بُووُیٜرُو وَلْجْࢽِّرُو، کُورُو وُلّْکّْࢽَدْ غَیْ، ࢽَیِ دَبَّرْغَدَرُو وَلُّواْرُو؞
[4] أَمْ مَکِدُوࢽِیَیٜ وُوَ رُوکُّو إِسِیٜ ࢽَیِیَ دَبَّرْدُوِّ ࢽَࢽْجَیِیٜیَ، کْلَ مْرْسَدُࢽْدٜ أَدْیٜࢽْ ࢽَࢽْغُ ࢻَࢽِّیٜ، بَلّٜ ࢽَیِ؞
[5] أَدْ ࢽَࢽْغَرُو کْرَمِیَدْ وُوَ بُرْوُوسَ ࢽَࢽْدُورُو لٜجَ کْࢽْجُو سٜرّٜ دُوُوࢽْ یِوِ وُلُّوَّدَ دَبَّرْجَرُو تَیِیَ لُواْدُرُو ࢽغْلَرُو رُکّْࢽَ؞ ࢽغَیْࢽِࢽْ دَبَّرْغَدَرُو وَلْجِ، کُورُو أَوُو دُولٜىٰ غْࢽِ، سٜرّٜ؞
[6] أَدَ ࢽُوࢽُواْ: کَمْ غَࢽَ ثْࢽَدِدْ غَࢽَ کَلَجِ، کُورُو کَمْ ࢽغْوُ ثْࢽَدِدْ ࢽغْوُ کَلَجِ؞
[7] وُࢽْدُ یَیٜ کَرْوُࢽْجُࢽْ ࢽِیَجْࢽَدْ غَیْرُو ثُو، کَرْوُکُتَّالَࢽْ بِ جْکْتُلَࢽْ غْࢽِ، أَوُووَ اللَّه کَمْ کَرْوُ کْجِیَرُو ثِدَ ثْرَاࢽَ؞
[8] ࢽَ اللَّهیٜࢽْ کْࢽْدُوُو ࢽَیِرُو بَرْغَ سٜرّٜ سَمَّا دْࢻْتُوُیٜ مبٜجِ، کِدَ ࢽغْلَ سَمَّ ࢽَ کُوجْࢽَرُو دٜوُورُو، سَوِ یَیٜ، جِرِ ࢻِࢽْ یَیٜ مْرَدُࢽْدُو سَمَّا غَلْجِ؞
[9] کِتَوُلَࢽْ رُوُوَدَدْ غَیْ: «ࢽَࢽْجَیْجَࢽْجُࢽْ تَلَاوَرُو ثِࢽَ، ࢽَࢽْجِرٜࢽْجُ سَوِسُورُو دْغَیْ؞»
[10] تِ دُوُوࢽْ ࢽَدُومَرُو کَسُࢽِ ثِ، بُرُودِ یٜ کْمْبُورُو ثِدْ ࢽَیِ یٜرُو کَسُࢽِ ࢽجَدٜ کَوَکْثٜ ثَکّٜ ࢽٜمَ ࢽَࢽْجِرٜࢽْدُویٜ ࢽغْوُجِ؞
[11] جَیْجَرُو وَلُّواْرُو، دْلْوُ ࢻِࢽْ یَیٜ غَرِوُرُو ࢽجَدِ، کُورُو أَدْ ثَکّٜ مُمِࢽَّدْ أَࢽْدِیٜࢽْ اللَّهَ جَوْرُو وُسٜجَیْ،
[12] دَلِلْࢽْجُدْ کِدَ بَࢽَ کُدُویٜ أَدْ مْرَدُ مُمِࢽَّیٜ رُࢽْجُ غْࢽِ غَلْجِ، کُورُو أَدْ ثَکّٜ اللَّهَ وُسٜدُ جَوْرُو ࢽغْوُجِ ࢽَࢽْغَرُو؞
[13] کَوُرِ کْجِ أَلْمَسِیوُیٜ یَسَرَوٜ غَوَّدْرُو، کُورُو ࢽَࢽْجَیْجَ تَیِیَ أَمْ سَمَّارُو یِدُّوِدْرُو، کْلَ بَࢽَ کُدُو أَدْیٜࢽْ دَرَجَ اللَّهرُو ثَدِ؞
[14] سٜرْ ثِ بَوُووَ اللَّه کَرْوُࢽْدُورُو ثَکّْࢽَدْرُو، ࢽَیِ ثُرُو کَرْوُࢽْجَیٜࢽْ ࢽَࢽْغَرُو مُودُوَ ࢽجَدِّ؞
[15] کْࢽْجُوࢽْجُ وُلْدُمَا کُوجْࢽَدْرُو اللَّهَ وُسٜࢽِیُو!