[1] وُ بُلُسْ کْلَࢽِ، وُ دُوُوࢽْ ࢻُوُࢽْدُوࢽْ ࢽَیِرُو رُوکُرَ بَوُووَ، ࢽَیِࢽْ کُرُوُࢽَّ ࢽَیِرُو جَوْ ثَࢽِدْ، رُوکُرَࢽَمْبُوَ ࢽَࢽّغْلَا أَلْمَسِیوُیٜ ࢽَࢽْغَرُو لُواْࢽْجَکِّ،
[2] مَرْࢽُواْ، إِسْکِّیَ، بَرٜ سَکُّوّٜ تَیِ دُوُوࢽْ أَࢽْدِ کْلَ حَلْ تِییٜࢽْ دْغَیْیٜ ثَࢽِدْرُو ࢽَࢽْجَوْ ࢻْلٜدُوُ تْمَکّْࢽَدَ ࢻْلٜغْکّْࢽِ؞
[3] تِیلَࢽْ دْغَیْیٜ یَیٜ، کْلَ حَلْ تِییٜࢽْ غْࢽِ کْرِوُ یِکَّدِیٜ،
[4] أَوُووَ بَرِمِࢽْدٜ کْرِوُیٜدْ تِییٜ غْࢽِ، أَمَّ ࢽَࢽْجَࢽْ کْࢽْدُوُو اللَّهیٜ بْرْࢽِ غَرْغَدَا وُرْدُیٜ مبٜجِ؞ مَࢽَوَ رُوکُرَیٜیَ بَوُورُو دِیٜ،
[5] أَࢽْغْسَ سَمَّ اللَّهَ ࢽُودُ دَࢻْثِیدْࢽْ کُࢽْدٜࢽُّو؞ ࢽِیَ ࢻِ یَیٜ أَلْمَسِیوُوَ جْغَرُو، تِیَ کُوسُومَ غَیْرُو تَیْیٜ،
[6] کُورُو غَࢽْدُودْ تَبَّتِّییَ، غَࢽَمْبُ سَمَّرُو وُواْمْ غْࢽَدُوُرُو دَبَّرْدِیٜࢽَ؞
[7] أَوُو ࢻُوُࢽْدُویٜدَ رُیْوُو! کَمْ لَا کْلَࢽْجُوَ أَلْمَسِیوُیٜرُو ࢽغُوجِیَ، أَدَ تَکْثُو: تِ أَلْمَسِیوُیٜدْ غَیْ، أَࢽْدِ یٜ ࢽغَیْ؞
[8] وُدْ کْلَ کْࢽْدُوُوࢽْدٜ دُوُوࢽْ کْمَࢽْدٜ ࢽَیِیَ وُرْدُرُو غْࢽِ، دُࢽُو ࢽجُورُو سَدْࢽَدْیٜࢽْ ࢽغْوُرُو أَوُلُو بُکِّ یَیٜ، ࢽَࢽْغُکِّوَوُو؞
[9] بَرٜ وُوتِیَوَࢽِࢽْ ࢽَیِیَ رِدُرُو ࢽجَکُّو رَاکّْࢽَرُو تْمَࢽُوِّ،
[10] أَوُووَ تَیِیٜ: «وُوتِیَوَࢽْجُ کُرْوُووُ یٜ، دُࢽُووَ یٜ، أَمَّ تِ دَوُࢽْدٜࢽَّ کَمْبُویْ، مَࢽَࢽْجُ یٜ أَوِمَ غْࢽِ،» ثَࢽِ؞
[11] کَمْ جِرِ أَدْ ࢽُوجُو، جِرِ أَࢽْدِ دَوُࢽْدُوࢽْ بَوُو وُوتِیَوَیٜࢽْ مَࢽَࢽِیٜدْ غَیْرُو، إِسِیٜیَ، ࢽغَیْمَ دِیٜ؞
[12] أَمْ دُوُوࢽْ کْلَࢽْجَ جَجَکْثَیْدْرُو کْلَࢽْدٜ کَلْکَلِّیٜوَوُو بِ رَتَّلْغْیْیٜوَوُو؞ أَمَّ ࢽغَلْدُرَمْ کْلَࢽْجَیٜࢽْ ࢽغَلْدَࢽٜ کَتّٜࢽْجَࢽْ رَتَّلْدَیْیَ، حَࢽْغَلْࢽْجَ أَسُجِوَوُو؞
[13] أَࢽْدِدْ ࢽَ کُوجْࢽَرُو أَوُلُو بُیْیٜوَوُو، سَیْ ثُرُو کِدَرَمْ اللَّه أَࢽْدِرُو کَمْسَاࢽَدْیٜࢽْ، کِدَرَمْ دُوُوࢽْ حَرْ ࢽَیِ یٜیَ ࢽَࢽْجَغَیْدْ؞
[14] کِدَرَمْ کَمْسَاࢽَدَ کُوࢽِیٜوَوُو، ࢽَࢽْدُورُو إِسِیٜࢽْدٜ غَیْرُو، أَوُووَ أَࢽْدِدْ کَوُرِ کْجِ أَلْمَسِیوُیٜیَ حَرْ ࢽَࢽْدُورُو إِسِیٜࢽَ؞
[15] ࢽَ کُوجْࢽَرُو وُوتّٜ کْلَ کِدَ أَمْ غَدٜىٰࢽْ أَوُلُو بُیْیٜوَوُو، أَمَّ تْمَࢽْدٜدْ تِمَ کَمْبْرْسٜࢽْدُو ࢻُوُ جُوُیْیَ، کِدَرَمْࢽْدٜ دَوُࢽْدُوࢽْ جَوْرُو تْرْغَیْ،
[16] ࢽغَیْࢽِࢽْ کَوُرِ کْجِ حَرْ ثِدِیَ ࢽَیِࢽْ ࢻُوُࢽِّࢽْ دَسَاࢽَرُو مَوُوࢽِیٜ، کُورُو کْلَ کِدَ أَمْ غَدٜ کِدَرَمْࢽْجَࢽْ ثَدْࢽَیٜࢽْ أَوُلُو بُیْیٜوَوُو؞
[17] أَمَّ کِتَوُلَࢽْ رُوُوَدَدْ غَیْ: «کَمْ أَوُلُو جُوُیْمَدْ کْلَ کْمَࢽْدٜىٰࢽْ أَوُلُو جُوُو،»
[18] أَوُووَ کَمْ کْلَࢽْجُ جَجَکْثِمَ غْࢽِ، کَمْ کْمَࢽْدٜىٰ جَجَکْثِمَدْ أَرْدِیَدَ وُو؞