[1] وُ کْلَࢽِ غَدٜرُو ࢽَࢽْغِ رْࢻْتَ کَرْوُکُتَّ کُدُومَ ࢽجَدّْکِّوَوُورُو ࢽِیَ ࢽغُویٜکُّو؞
[2] کَرْوُࢽْدُووَ یَکّْکّٜ کُتَّجِیَ، وُࢽْدُ غْلٜ ثَکّٜ کَرْوُࢽِ کْجِجِ، کَمْ یَکّْکّٜ کَرْوُࢽْجُ کُتَّجْࢽَدْ غْࢽِیَ؟
[3] دَلِلْ ࢽغَیْࢽِࢽْ رُوُࢽْکّْࢽَدْ، تِمَ ࢽَࢽْدُورُو إِسْکِّیَ، بَرٜ کْلَ أَمْ تَیِرُو کَرْوُࢽِیَ إِسَکْجِدُوُ وَجِࢻْثْغْࢽَدْیٜࢽْ کَرْوُکُتَّ دِکّْࢽِ؞ أَوُووَ کْلَ ࢽَیِ سَمَّیٜࢽْ کَرْوُکْجِ ࢻَکِّدَ ࢽَیِ یٜ ࢻَࢽُّوِرُو مْرْسَࢽْکّْࢽَ؞
[4] بَسَرِ کَدَا جْکْتُ کَرْوُیٜیَ سِمَلُو ࢽغْوُوَاࢽْ ࢽَیِرُو رُوُࢽْغٜىٰرَکُّو، کَرْوُکُتَّ ࢻَࢽُّواْرُو غْࢽِ، ࢽَیِیَ دَمَ بَوُورُو ࢽجَرَاکّْࢽَرُو ࢽُوࢽُواْرُو؞
[5] کَمْ لَا کَرْوُکُتَّ کِوُدُووَ، بَرٜ لَمَرْدَ ࢽَ کُوجْࢽَرُو وُلّْکّْࢽِرُو وُ رُࢽِرُو غْࢽِ، جِرِ لَاࢽْ ࢽَیِ سَمَّرُو ࢽغٜکُّدُو؞
[6] وُواْمْ جَمَ مٜوُ کَمْ أَدْغَیْدْرُو غْࢽَجَاࢽَدْ ثْدْࢽَ،
[7] کْرْمَ ثُجُ أَدْیٜرُو تِیَ غَوُرْࢽُواْ رُوࢽْجُوَ یَکُّواْ بُوجُو، بَرٜ ࢽَ کُوجْࢽَرُو کَرْوُکُتَّ ثَࢽِّرُو؞
[8] أَدْ ࢽَࢽْغَرُو لُواْࢽْجَکِّ، کْرَوُوࢽْدُو تِرُو ࢻْلٜغْࢽُواْ،
[9] أَوُووَ دَلِلْ رُوُࢽْجَغَکّْࢽَدْ، تِمَ جَرَمْࢽْجَکُّو غَࢽْدُو ثُرُو لَمَرْ سَمَّیٜࢽْ رُکُّورُو؞
[10] وُࢽْدُ دُوُوࢽْ غَوُرْࢽُوَّدَ وُ یٜ غَوُرْࢽْکّْࢽَ؞ کُورُو أَوُو دُوُوࢽْ غَوُرْࢽْکّْࢽَدْ، أَوُو لَا غَوُرْࢽْکّْࢽَرُو وَلْیٜࢽُووَ، ࢽَیِ ࢽَࢽْغَرُو ࢻُوُ أَلْمَسِیوُیٜࢽْ غَوُرْیٜکُّو،
[11] بَرٜ إِوُلِیسْ أَࢽْدِیَ جَمْبَسَࢽِّرُو، أَوُووَ ࢽَࢽْغَࢽْجُ ࢽُوࢽِیٜࢽَ؞
[12] بْرْࢽِ تَرُوَسّٜرُو کَوُرِ کْجِ أَلْمَسِیوُیٜ مَوُودُرُو لٜىٰکّْࢽِیَ، کْمَࢽْدٜ وُرُو ثِࢽَّ کَسْغْࢽَ یَیٜ،
[13] کْرَمِࢽِ تِتُسَّ ࢽَدْࢽْ ࢽَغْکّْࢽِ ࢽَࢽْغَرُو رُوࢽِ بُوجْࢽِّ، دَجِ تَیِیَ أَلَکْلٜوَکّٜ لَرْدُ مَکِدُوࢽِیَیٜرُو کُویٜکُّو؞
[14] أَمَّ اللَّهَ وُسٜࢽِیُو، تِ دُوُوࢽْ سَوِ یَیٜ أَࢽْدِیَ کْࢽَّسَرْ أَلْمَسِیوُیٜࢽْ ࢻُوُرُو سَادِ یٜ، کُورُو ࢽدَرَ یَیٜرُو أَࢽْدِیٜࢽْ کَلَ أَلْمَسِیوُوَ ࢽُودُیٜ تَتَرْجِیے یٜدْ!
[15] أَوُووَ ࢽَ اللَّهیٜࢽْ دَوُ أَمْ ࢽجْکَّوُو ثَوَࢽْدِیٜ یٜࢽْ، کُورُو دَوُ أَمْ ࢻَثَّغَیْیٜ یٜࢽْ أَࢽْدِمَ کَوُدِ أَلْمَسِیوُیٜ وُو،
[16] أَمْ لَارُو أَࢽْدِ کَلَ کَرْمُویٜ کَرْمُو کُدُومَ، أَمْ لَا غَدٜرُو کَلَ رُویٜ رُو کُدُومَ؞ وُࢽْدُ غْلٜ مَرْتَوَ أَوُو أَࢽِیَ دِیُویٜ ࢽَجْغْࢽَ وُو؟
[17] ࢽُوࢽُواْ، أَࢽْدِدْ أَمْ ࢽغْوُ مَࢽَ اللَّهیٜࢽْ رِوَ مَجَیْدْ غَیْ غْࢽِ، أَمَّ أَمْ ࢽَ اللَّهیٜࢽْ إِسَࢽَ غَیْ، ࢻُوُ اللَّهیٜࢽْ کُورُو أَلْمَسِیوُلَࢽْ مَࢽَدَ ثُرُو تِلُووَࢽْ مَوُوࢽِیٜ؞