[1] أَدْ ࢽَࢽْغَرُو کْرَوُووُࢽِ، وَدُ أَࢽِیَ ࢽغُوسَاࢽَدْ، کَدَوُ تِییٜیَ رُحُیٜیَ ࢻِ یَیٜࢽْ کْلَࢽْدٜ تُلِّیُو، اللَّه رِدَلَࢽْ تَیِرْ سْرَمْبُو وَلِّیُو!
[2] کَرْوُࢽْدُو کَسَغَࢽُواْ؞ وُࢽْدُمَرُو جِرٜࢽَمْبُ یِدِّیٜࢽْدٜ، وُࢽْدُمَرُو دِوِ یِدِّیٜࢽْدٜ، وُࢽْدُمَا جَمْبَࢽِیٜࢽْدٜ؞
[3] أَدَ وُلْدُࢽِدْ، ࢽَیِرُو وُواْمْ غْࢽَدُوُرُو غْࢽِ، ثَلَࢽْ وُلّْکّْࢽَدْ غَیْ، ࢽَیِدْ ثُرُو کَرْوُࢽْدٜىٰࢽْ، کَرْمُو یٜࢽْ کَلْ، رُووَ یٜࢽْ کَلْ، رُوکُّو دْغَیْیٜ؞
[4] أَمَࢽْ ࢽجَدْکّْࢽَدْ کُرَ، أَوُلُو بُوࢽِ کْلَࢽْدُوࢽْ یٜ کُرَ، کَرْوُࢽِ دُࢽُووَجْࢽَ، بَسَرِࢽْدٜ سَمَّࢽْ تَیْ دَکّٜ کَرْوُکْجِ ࢻَکِّ؞
[5] لَرْدُ مَکِدُوࢽِیَیٜرُو کَدِیٜࢽْدٜیَ، تِیࢽْدٜ تُسْتُ ثُوَࢽْدْࢽِّ، ࢽدَرَࢽْ یَیٜ بَسَرِ یَیْیٜࢽَ، دٜیَࢽْ سَیْ لَوَلَ، ثُرُوࢽْ سَیْ رِدُ؞
[6] أَمَّ اللَّه تِ دُوُوࢽْ رُو أَمْ کَرْوُࢽْجَ دُࢽُو بَوُووَیٜ إِسَبُوجِیمَدْ کْࢽْدٜ تِتُسّٜࢽْ رُوࢽْدٜ إِسَبُویٜىٰࢽُو،
[7] کُورُو کْࢽْدٜࢽْجُ رُࢽْجُࢽْ غْࢽِ، رُو بُودَ کْلَࢽْدُوࢽْ ثُوَࢽْدْࢽَدْ یٜلَࢽْ؞ تِتُسْدْ أَࢽْدِرُو مْرَدُࢽْدُو وُوَ کُرُویٜیَ سُوࢽْدُووَ کْلَ وُیٜࢽْ کُواْرِࢽْدُووَا وُلْسَاࢽَ؞ أَدْ ࢽَࢽْغَرُو ثَیٜیَ کُوجْࢽَرُو کَرْوُکْجِ دِکّْࢽَ؞
[8] وُوتِیَࢽِ یَکّْکّٜ کَرْوُࢽْدُو کُتَّجْࢽَ یَیٜ، ࢽَدِمّْکّْࢽِ؞ ثَلَࢽْ ࢽَدِمّْکّْࢽَ، وُوتِیَدْ سَمْ غَࢽَرُو رُوࢽْدُو کُتَّجْࢽَرُو رُکّْࢽَ ࢽَࢽْغَرُو؞
[9] أَمَّ کْرْمَ کَرْوُࢽِ کْجِجْࢽَ، کَرْوُࢽْدُو کُتَّجْࢽَدْرُو غْࢽِ، أَمَّ کَرْوُکُتَّࢽْدُو ثَکّٜ تْمُّوَّدْرُو؞ أَوُووَ رَوُو اللَّهیٜ کْلَࢽْ کُتُّ ࢻَࢽُّوَّ، ࢽغَیْمَ أَࢽْدِ ࢽَࢽْغَرُو أَوِمَ أَسَرْࢽُوِّ؞
[10] أَوُووَ کَرْوُکُتَّ کْلَ رَوُو اللَّهیٜدْ کَمْبَ ثَکّٜ ࢽَدِمْجْࢽِّࢽْ تْمْجٜ ࢽجْکَّوُو ثُوَࢽْدِ، أَمَّ کَرْوُکُتَّ دُࢽِیَیٜدْ کَرْمُو ثُوُدِ؞
[11] أَکُّو رُیْوُو، کَرْوُکُتَّࢽْدُو کْلَ رَوُو اللَّهیٜدْ ࢽَیِیَ ࢽجَسَکّٜ کَسَدُوَ کْلَࢽْدُو مُواْا دِوَّ! کُورُو ࢽجَسَکّٜ غْرْغَࢽُوَّ، رِࢽُوَّ! أَسٜ، مْرَدُوَ کُواْرِیَ شَرَ رَوُووَ جَوْرُو ࢻْلٜࢽُوَّ! أَدْغَیْمَ جِرِ ࢻِࢽْ یَیٜ لَمَرْ أَدْلَࢽْ ࢽَیِ بِوُ بَوُووَرُو کْلَࢽْدُو ࢻْلٜࢽُوَّ؞
[12] تُو، وُوتِیَ رُوُࢽْجَغَکّْࢽَ یَیٜ، کَمْ بِوُ ثْدْࢽَدْ بِ کَمْ تِرُو بِوُ ثَدّْࢽَدْ غْࢽِ ࢽَࢽْغَرُو رُوُیٜکُّو، أَمَّ ࢻُوُ اللَّهیٜࢽْ کَسَدُ أَࢽْدِرُو سَدُّوِدَ ࢽُوࢽُوِرُو؞
[13] أَدْ ࢽَࢽْغَرُو رُوࢽْدٜ بُوجْࢽَ؞ رُو بُودَࢽْدٜ أَدْ ࢽغَوُوࢽْ، کْلَ کَرْوُکْجِ تِتُسّٜࢽْ أَࢽْدِ یٜ کَرْوُکْجِ ثَیٜمَا کُوجْࢽَرُو دِیٜࢽَ، ࢽَیِ سَمَّ حَࢽْغَلْࢽْجُوَ إِسَبُوغْوَّ ࢽَࢽْغَرُو؞
[14] وُدْ ࢻُوُࢽْجُࢽْ کْلَࢽْدُوࢽْ أَوُلُو بُو غَࢽَ دِکّْࢽَ یَیٜ، ࢽَࢽْغُرُو سَکُّوِّ؞ جِرِ أَوُو ࢽَیِرُو وُلْࢽْجَغَیْیٜࢽَ سَمَّ جِرٜدْ غَیْ، ࢽغَیْمَ أَوُلُو بُو ࢻُوُ تِتُسّٜࢽْ دِیٜࢽَدْ یٜ جِرٜرُو وَلْجْࢽَ؞
[15] ࢽَیِ سَمَّیٜ غَࢽْدُودَ تَکْثِیَ، جِرِ رِدُوَ لُولُودُوَࢽْ تِیَ کَࢻْکْوَّدْ، کْرَوُوࢽْجُ ࢽَیِ ࢽَࢽْغَرُو تَیْ دَجٜ تْرْغَیْ؞
[16] أَوِࢽْ یَیٜ ࢽَیِیَ مْرْسَࢽْجَکّْࢽَدْرُو کَرْوُکْجِ دِکِّ؞