[1] کْرَمِیَ، سٜرْ اللَّهیٜ جَمَ عِیسَىٰ غَوُ لَرْدُ مَکِدُوࢽِیَیٜرُو ثَدْࢽَدَ ࢽَیِرُو إِسَࢽُودُوُ رَیِیٜ؞
[2] ثُرُو رِجَࢻْتُ کَدَ جَوْ ࢻِتّٜࢽْ کَرْوُکْجِࢽْجَ ثِ بَوُووَ ࢽَࢽْتَلَاࢽجَ دُࢽُو کُوجْࢽَا تَسَرْغَࢽٜ حَرْ ࢽَࢽْکْرٜ تَیْ دَجَࢽٜ ࢻْلٜىٰرَ؞
[3] أَوُو ثَدْࢽَدْ دُࢽُوࢽْجَلَࢽْ حَرْ دُࢽُوࢽْجَمَا کُوجْࢽَرُو ثَدُورُو تَیِیَ شٜدَࢽْکِّ، کُورُو رَوُوࢽْجَࢽْ
[4] تَیِ یٜ بَࢽَ مُمِࢽَّرُو کُدُودْرُو کَࢽْغُرْࢽُو مُکُّوࢽْجَ ࢽجَکُّویٜ ثَوَࢽْدُورُو جَوْرُو أَࢽْدِیَ لُواْسٜرَ؞
[5] أَوُو تْمَࢽِیٜࢽَمَا کُوجْࢽَرُو بُرْوُوࢽْ کْمَࢽْدٜرُو، کُورُو رَوُو اللَّهیٜ کْلَࢽْ أَࢽْدِ یٜرُو کْلَࢽْجَ کٜدُو؞
[6] أَدْ ࢽَࢽْغَرُو، تِتُسْ کِدَ سٜرّٜ أَدَ ࢽَࢽْدُوࢽْ بَدِجْࢽَدْ غَیْ، تُمُوجُوُورُو تِیَ لُواْیٜیْیٜ؞
[7] تُو، ࢽَیِدْ کَمْبْرْسٜ سُو، کَوُرِ سُو، ࢽُودُ سُو، کَسَدُ سُو، کْرَوُو ࢽَࢽْدٜࢽْ مُووُوَّ سُولَࢽْ، وُوتّٜ أَوُو سَمَّلَࢽْ ࢻُوُࢽُوِدْ غَیْ، سٜرْ أَدْ یٜلَࢽْ ࢻُوُࢽُواْ!
[8] وَدَرُو غْࢽِ وُلّْکِّ، أَمَّ کَسَدُ أَمْ غَدٜىٰࢽْ کْرَوُوࢽْدُودْ جِرٜىٰرُو تَبَّتْکْکِّ،
[9] أَوُووَ سٜرْ کْمَࢽْدٜ عِیسَى أَلْمَسِیوُیٜ ࢽُوࢽُوَّ، تِ غَرِوُ دُوُوࢽْ، ࢽَیِ ࢽَࢽْغَرُو ࢽغُدِرُو وَلْیٜࢽُو، ࢽَیِ یٜ ࢽَࢽّغُدِࢽْجُدْیٜࢽْ غَرِوُرُو وَلُّواْرُو؞
[10] کْلَ لَمَرْ أَدْیٜࢽْ غَلَࢽِ یِکِّ، أَوُووَ ࢽَیِرُو ࢻَیْدَا، ࢽَیِ دُوُوࢽْ تْࢽْ مْࢽْدٜ أَوُو أَدَ دِیُو رُࢽْجُ غْࢽِ، تِیَ دِیُو رَوُو بَدِࢽُوَّدْ،
[11] کْرْمَ یٜ دِیُوࢽْجُ تُمُوغْࢽُواْ؞ جِرِ کَرْوُࢽْدُو سَمَّࢽْ رَاوَّدْ غَیْ، ࢽغَیْࢽِࢽْ کْلَ أَوُو تَوَّدْیٜࢽْ تُمُوغْࢽُواْ؞
[12] کَرْوُ سَمَّࢽْ ࢽجُودْ کْلَ أَوُو کَمْ ثْدَࢽِّیٜࢽْ غْࢽِ، کْلَ أَوُو ثْدَࢽَیٜࢽْ اللَّه أَرْدِجِ؞
[13] ࢽَیِدْ بَسَرِ یَوٜ أَمْ غَدٜ کَسَمْ ثَوَࢽْدِ غْࢽِ، لَمَرْ ࢽَࢽْکَلْکَلّٜ؞
[14] کْرْمَ لْمَࢽْ ࢽغْوُ غَࢽْدُوَّدْ، أَوُو تَیِیَ مَوْجْࢽَدَ یِرْغَوِ، یِمْ لَا یٜ ࢽغْوُدُ لْمَࢽّجَیٜࢽْ أَوُو ࢽَیِیَ مَوْࢽْجَࢽَدَ ثَسَرْغَیْ، أَدْغَیْࢽِࢽْ لَمَرْدْ کَلْکَلْجِ،
[15] کِتَوُلَࢽْ رُوُوَدَدْ غَیْ: «کَمْ ࢽغْوُ ثَࢻْثْࢽَدْ تِرُو ࢽغْوُجْغْࢽِّ، کُورُو کَمْ غَࢽَ ثَࢻْثْࢽَدْ یٜ تِیَ مَوْجْࢽِّ؞»
[16] اللَّهَ وُسٜࢽِیُو، تِ دُوُوࢽْ، کَسَدُ ࢽَیِرُو ࢽجَدّْکِّدْ غَیْ، کَرْوُ تِتُسّٜ یٜرُو ࢽِیَ ࢽَیِرُو ࢽجْدُّویٜ ثَکّْࢽَدْ؞
[17] أَوُووَ تِتُسْ لُواْࢽْدٜدَ کَسَثّٜ تِ کْلَࢽْجُ جَوْرُو کَسَدُوَدْرُو رَوُوࢽْجُمَࢽْ ࢽَࢽْدُورُو لٜجِ؞
[18] کُورُو کْرَمِ دُوُوࢽْ دَوُ جَمَ عِیسَىٰ غَوُ سَمَّیٜࢽْ کِدَࢽْجُ کَوُرِ کْجِیٜ ࢽَࢽْغَرُو ࢽُووَدَدْ تِیَ رُوکُّو جُوَغْیْیٜ؞
[19] أَدَ کُوجْࢽَرُو، بَࢽَ سٜرّٜ أَدَ یَدِیٜیَ، جَمَ عِیسَىٰ غَوُدْ أَࢽْدِیَ سَسَدُّوُورُو تِیَ غَلَیٜرَ، بَࢽَ سٜرّٜ دُوُوࢽْ کْمَࢽْدٜیَ ࢽجُࢽْغُورُورُو یٜ، ࢽِیَࢽْدٜ ࢽغْلَ ࢻْلٜجُورُو یٜ تِرُو کِسِّییٜدْ؞
[20] أَدَ دِیُوࢽْدٜدْ، بَرٜ وُࢽْدُمَ کْلَ کْࢽْجُو ࢽَࢽْکْرٜىٰ أَدْرُو کِسْتُوُࢽْدٜىٰࢽْ سَرِوُسَࢽِّ،
[21] أَوُووَ ࢻُوُ کْمَࢽْدٜىٰ رُࢽْجُࢽْ غْࢽِ، ࢻُوُ أَمْبٜ یٜࢽْ أَوُو ࢽغْلَ دِیُورُو رَیِیٜ؞
[22] کُورُو کْرَمِࢽْدٜ دُوُوࢽْ غْࢽَغْࢽِرُو لَمَرْ کَدَࢽْ رِجَمِّیٜ کَسَدُوَرُو تَبَّتْکْیْیٜࢽَدَ تَیِیَ رُوکُّو جُوَࢽِیٜ، کُورُو کْرْمَ ࢽَیِیَ جَوْرُو مْرْسَࢽْجَࢽَ ࢽَࢽْغَرُو ثَیٜمَا کُوجْࢽَرُو کَسَدُࢽْجُوَ؞
[23] تِتُسْدْ، تِ سَوَࢽِ کِدَیٜ، وُوَ تِیَ ࢽَیِ ࢽَࢽْغَرُو کِدَ أَدَ دِیٜ؞ کْرَمِیَࢽْدٜدْ، تَیِ دَرَجَ أَلْمَسِیوُیٜرُو کَدُࢽُووُ جَمَ عِیسَىٰ غَوُیٜ؞
[24] أَدْ ࢽَࢽْغَرُو ࢻُوُ جَمَ عِیسَىٰ غَوُدْیٜࢽْ أَمْ أَࢽِرُو شٜدَ کْرَوُوࢽْدُویٜ سُو، دَلِلْ کْلَ ࢽَیِیٜࢽْ أَوُلُو بُوࢽْدٜىٰ سُووَ ࢻْلٜغْࢽُواْ؞