[1] ࢽُوࢽِیٜࢽَ، کْࢽْدْغَیْرَمْ دُࢽِیَ أَدْیٜ وُوتّٜ تِیࢽْدٜ أَدْ سِدِییَ، سَمٜلَࢽْ کْࢽْدْغَیْرَمْ سَوِسُویٜ مُکُّو کَمْبٜࢽْ تْدَࢽْدْࢽَ غْࢽِ ࢽَ اللَّهیٜࢽْ تَیْیٜࢽَ؞
[2] أَیْ، کْࢽْدْغَیْرَمْࢽْدٜ أَدْلَࢽْ ࢽجْمِّیٜ، کْࢽْدْغَیْرَمْ سَمٜىٰلَࢽْ جَکْتِیٜرُو مْرَدُࢽْدٜیَ،
[3] جَکْتِیٜیَ، دٜرُو وَلِّیٜوَوُو؞
[4] أَیْ، جْکْتُࢽْدٜ ࢽَࢽْغَرُو کْࢽْدْغَیْرَمْ أَدْلَࢽْ ࢽجْمِّیٜ، رِࢽْدِیُورُو غْࢽِ، ثَیٜیَ کُوجْࢽَرُو جَکْتِیُورُو رَیِیٜࢽَ ࢽَࢽْغَرُو، أَوُو کَرْمُویٜدَ رُودْ ثُࢽْدُورُو؞
[5] اللَّهدْمَ أَࢽْدِیَ أَوُو أَدْرُو دَبَّرْسَا، تِ دُوُوࢽْ رُحُࢽْجُ رَࢽْ غَیْرُو أَࢽْدِرُو سَدْࢽَدْ؞
[6] أَدْ ࢽَࢽْغَرُو سَوِسُو کَرْوُࢽْدٜ غٜرِیٜ؞ ࢽُوࢽِیٜࢽَ، تِیلَࢽْ دْغَیْیٜیَ، أَࢽْدِ ࢽَ کْمَࢽْدٜىٰࢽْ بَوُو،
[7] أَوُووَ کُرُولَࢽْ غْࢽِ، کَمْبْرْسٜلَࢽْ دْغَیْیٜ؞
[8] أَیْ، کَرْوُࢽْدٜ تِکّٜرْࢽَ، تِیلَࢽْ دْغَیْیٜ یَیٜرُو ࢽَ کْمَࢽْدٜىٰࢽْ دْغَیْیٜیَ، رَیِیٜ؞
[9] أَمَّ أَࢽْدِ تِیلَࢽْ یٜࢽْ کَلْ، تِیلَࢽْ غْࢽِ یٜࢽْ کَلْ، ࢽِیَࢽْدٜدْ تِمَ کْمَࢽْدٜ کْجِࢽْدٜ ࢻَࢽْجُو،
[10] أَوُووَ أَࢽْدِ سَمَّ کَدُ بَوُورُو ࢻُوُ شَرَرَمْ أَلْمَسِیوُیٜࢽْ دَࢽِیٜ، ࢽغَیْࢽِࢽْ وُࢽْدُࢽْدٜ یَیٜ أَلْوَسِ أَوُو تِیلَࢽْ ثْدْࢽَیٜ ثُوَࢽْدِ، ࢽغْلَ یٜࢽْ کَلْ، دِوِ یٜࢽْ کَلْ؞
[11] أَدْ ࢽَࢽْغَرُو، مَاࢽَ کْمَࢽْدٜ رِدَیٜ ࢽُوࢽِیٜࢽَدْ، أَمْبَ جَوَلُّو ࢽجَکُّو مَࢽِیٜ؞ ࢽَ اللَّهیٜࢽْ أَࢽْدِ ࢻٜدٜرُو ࢽُووَدَ، کُورُو کَرْوُࢽْدُو یٜࢽْ ࢽغَیْرُو تْمَکّْࢽَ؞
[12] کُورُو یَیٜ ࢻُوُࢽْدُوࢽْ کْلَࢽْدٜ جَجَࢽْغِیٜوَوُو، أَمَّ ࢽَیِرُو دَلِلْ کْلَ أَࢽْدِیٜࢽْ أَوُلُو بُویٜ ࢽجَدِیٜ؞ ࢽغَیْࢽِࢽْ أَمْ دُوُوࢽْ کْلَ أَوُو کَرْوُیٜࢽْ غْࢽِ، کْلَ أَوُو سِمْ ثُرُیْیٜࢽْ أَوُلُو جَوُیْدْرُو أَوُو کَلَکْتُوُیٜ ࢻَࢽْدُوِ؞
[13] حَࢽْغَلْࢽْدٜ بَوُورُو وَلْیٜࢽُووَ، اللَّهدْمَ ࢽَࢽْغَرُو؞ حَࢽْغَلْࢽْدٜ کَلْکَلْجْࢽَرُو وَلْیٜࢽُووَ، ࢽَیِ ࢽَࢽْغَرُو؞
[14] أَوُووَ کْرَوُو أَلْمَسِیوُیٜدْ أَࢽْدِیَ سِمُوسَیْ، أَدَ تَبَّتُّو ࢽُوࢽِیٜࢽَ: کَمْ ࢻَلْ أَمْ سَمَّ ࢽَࢽْغَرُو ࢽُࢽَدْ، أَمْ سَمَّ سَࢽُࢽَ،
[15] کُورُو أَمْ سَمَّرُو ࢽُوࢽْجُدْ، تَیِ رُووَدْ غَدٜرُو کْلَࢽْجَرُو غْࢽِ، تِ دُوُوࢽْ تَیِ ࢽَࢽْغَرُو ࢽُࢽٜ کَرْمُولَࢽْ ثِجْࢽَدْرُو کْࢽْدْغَیْ ثَدُورُو؞
[16] أَدْغَیْمَ أَدْࢽْ ࢻُوُࢽْ وُࢽْدُمَا کْلَ کُرُو أَدَمْغْࢽَیٜࢽْ رُیْیٜوَوُو؞ أَلْمَسِیوُوَ ثَلَࢽْ کْلَ کُرُو أَدَمْغْࢽَیٜࢽْ رُیْیٜࢽَ یَیٜ، کْرْمَ غَدٜرُو تِیَ ࢽغَیْࢽِࢽْ رُیْیٜوَوُو؞
[17] أَدْ ࢽَࢽْغَرُو وُࢽْدُ دُوُوࢽْ أَلْمَسِیوُلَࢽْ دْغَࢽَمَدْ أَلَکْتُ بْرِࢽْ؞ أَوُووَ دِࢽَدْ کُوجَࢽَ، أَکُّو بْرِࢽْ إِسَࢽَ؞
[18] أَدْ سَمَّ ࢽَ اللَّهیٜࢽْ إِسِ، تِ دُوُوࢽْ أَلْمَسِیوُیٜࢽْ کْلَࢽْجُرُو سُولُوسَغَࢽٜ کِدَ سُولُویٜ أَࢽْدِرُو سَدْࢽَدْ؞
[19] اللَّهدْمَ أَلْمَسِیوُیٜࢽْ أَمْ دُࢽِیَیٜرُو بِوُوَࢽْجَ غْࢽَجْغْࢽِّࢽْ تَیِیَ کْلَࢽْجُوَ سُولُوجٜ کَوُرِ سُولُویٜ مُکُّوࢽْدٜرُو ثَکُّو؞
[20] أَدْ ࢽَࢽْغَرُو أَࢽْدِ وَکِّلَّ أَلْمَسِیوُیٜ، اللَّه أَࢽْدِیٜࢽْ بُواْدُ ثْدِ غَیْ؞ أَلْمَسِیوُ ࢽَࢽْغَرُو لُواْࢽْجَیْیٜ، اللَّهَ سُولُودْࢽُواْ!
[21] اللَّه کَمْ دُوُوࢽْ بِوُ ثْدْࢽِّدَ أَࢽْدِ ࢽَࢽْغَرُو بِوُرُو کَلَکّٜࢽُو، ࢽَࢽْجِرٜ اللَّهیٜدَ تِلَࢽْ ࢻَࢽْدِیُورُو؞