[1] أَدْ ࢽَࢽْغَرُو، کَࢽْجِمَرِ اللَّهیٜࢽْ کِدَ أَدَ مُویِیٜࢽَدْ، تْمَ کُولِّیٜوَوُو؞
[2] أَوُووَ غْرَادَا ࢽَࢽْغُوَا وَࢽِیٜࢽَ، جَمْبَ دِیُو یٜࢽْ دْغَیْیٜوَوُو، کُورُو مَࢽَ اللَّهیٜ یٜیَ ࢻَلِّیٜوَوُو، أَمَّ جِرٜدَ ࢻٜدٜرُو ࢻْلٜࢽِیٜ، ࢽغَیْࢽِࢽْ کَرْوُ أَمْ سَمَّیٜ ࢻُوُ اللَّهیٜࢽْ جِرٜࢽْدٜ شٜدَجَیْ؞
[3] کَوُرِࢽْدٜ جَکَّدَرُو وَلْیٜࢽُووَ، ࢽَ أَمْ ࢻَثَّغَیْدْیٜࢽْ جَکَّدَ؞
[4] إِوُلِیسْ مَیْ دُࢽِیَ أَدْیٜدْ حَࢽْغَلْ کَسَتُّࢽَمْبُوُیٜیَ إِسَکَمْبُجْغْࢽَ، بَرٜ ࢽُرْ کَوُرِ کْجِ دَرَجَ أَلْمَسِیوُیٜدَ ثَرُࢽِّرُو، تِ أَلْمَسِیوُدْ ثَمُࢽُو اللَّهیٜ؞
[5] أَࢽْدِ کْلَࢽْدٜیَ غْࢽِ، عِیسَى أَلْمَسِیوُ تِمَ کْمَ وُورُو مَوُوࢽِیٜ، أَࢽْدِ یٜ عِیسَى ࢽَࢽْغَرُو کَرٜیَوَࢽْدُو؞
[6] اللَّه دُوُوࢽْ تِیٜ: «ࢽُرْ ثُرُو دُوُیٜࢽْ یِیلْجُو!» ثْࢽَّدْ دَرَجَ اللَّهیٜ ࢻْکَّ أَلْمَسِیوُیٜࢽْ تُرُیْدْ ࢽُودُورُو کَرْوُࢽْدٜࢽْ ࢽُرْࢽْجُ یِیلْجْࢽَ؞
[7] أَرْسِیے أَدَ ثُرُو کَلْوُووَ تُلُویٜࢽْ تَیْیٜࢽَ، ࢽغَیْࢽِࢽْ کْࢽْدُوُو ثِ بَوُووَدْ ࢽَࢽْدٜࢽْ غْࢽِ، ࢽَ اللَّهیٜࢽْ إِسِرُو ࢻْلٜدِ؞
[8] کَࢽْجِ ࢻِࢽْ یَیٜ أَࢽْدِ ثُرُو جْکْتُیٜࢽْ، أَمَّ غْرْࢽٜسَࢽِّ، حَࢽْغَلْࢽْدٜ ثِجْࢽَ، أَمَّ تْمَ کُولِّیٜࢽْدٜ،
[9] بَسَرْسَیْ، أَمَّ اللَّه أَࢽْدِیَ کُولْسَࢽِّ، یَࢻْکَادَ، أَمَّ سِدِیٜࢽْدٜ؞
[10] سَوِسُو کَرْمُو عِیسَیٜ تِیلَࢽْ ࢽغُوࢽِیٜ، رُو عِیسَیٜ یٜ تِیࢽْدٜࢽْ ࢻْلٜدُوُورُو؞
[11] أَوُووَ أَࢽْدِ رُووَدَ سَوِسُو عِیسَى ࢽَࢽْغَرُو کَرْمُورُو سْرْࢽْسَغَیْ، رُو عِیسَیٜ یٜ تِیࢽْدٜ ࢽُومَیٜࢽْ ࢻْلٜدُوُورُو؞
[12] ࢽغَیْࢽِࢽْ کَرْمُودْ أَࢽْدِلَࢽْ کِدَࢽْجُ ثْدِ، أَمَّ رُودْ ࢽَیِلَࢽْ کِدَࢽْجُ ثْدِ؞
[13] کِتَوُلَࢽْ رُوُوَدَدْ غَیْ: «مْرْسَࢽْکّْࢽَ ࢽَࢽْغَرُو مَࢽَیٜکُّو؞» کْلَدْࢽْ، أَࢽْدِ یٜ رُحُ کَمْبْرْسٜىٰ أَدْمَا تَیْیٜࢽَدْ، أَࢽْدِ یٜ مْرْسَࢽِیٜࢽَ مَࢽَࢽِیٜ،
[14] دَلِلْࢽْجُدْ تِ دُوُوࢽْ کْمَ عِیسَىٰ کَرْمُولَࢽْ ثْسَࢽْغْࢽَدْ أَࢽْدِ یٜیَ عِیسَىٰ رُوکُّو سَسَࢽْغٜ ࢽَیِࢽْ کُࢽْدٜࢽُّو ࢻُوُࢽْجُرُو سَوُدِرُو ࢽُوࢽِیٜࢽَ؞
[15] أَوُو أَࢽِ سَمَّ ࢽَیِ ࢽَࢽْغَرُو، أَدْغَیْࢽِࢽْ سٜرْ اللَّهیٜ تْرْغَࢽٜ أَمْ کَدَرُو تَتَرْجِییَ، تَیِیَ ثَکّٜ اللَّهَ ࢽغْوُرُو وُسٜجَࢽٜ تِرُو دَرَجَ ثَدِ؞
[16] أَدْمَ ࢽَࢽْغَرُو تْمَ کُولِّیٜوَوُو؞ تِیࢽْدٜ سِدُوُ ثْدِ یَیٜ، رُحُࢽْدٜ کُࢽْ بَرِࢽْ بْرِࢽُّو وَلْجِ؞
[17] أَوُووَ بَسَرِࢽْدٜ کْسْکٜ کْرْمَیٜدْ أَࢽْدِرُو دَرَجَ کُرَ یٜ، سَوِسُویٜ یٜ، ثِࢽْجُمَ بَوُو یٜیَ دَبَّرْسَغَیْ؞
[18] سِمْࢽْدٜ أَوُو تُرُیْرُو غْࢽِ، أَوُو تُرُیْوَوُورُو ࢻِییٜ؞ أَیْ، أَوُو تُرُیْدْ تُسِّوَوُو، أَمَّ أَوُو تُرُیْوَوُودْ سَوِسُورُو دْغَیْ؞