[1] أَ! حَࢽْغَلْࢽَمْبُ غَࢽَ لَا ࢽَࢽْدُوࢽْ دِیُو رَاکُّو، کَࢽَدِ تَیْوُو!
[2] کْلَࢽْدُوࢽْ ࢽَࢽْدْرِ کْرَوُویٜ دِکِّ، ࢽَࢽْدْرِ کُرَ أَدْیٜ اللَّهیٜࢽْ إِسِدْ، ࢽَیِیَ کوَ ࢻَلُّو ࢽِیَدُوُرُو وَدُ ࢽغُوکّْࢽَ، ࢽَیِیَ ࢻٜرُو کْلَیَکُّ تَیِرْ کوَ ࢽُوجْࢽِّ غَیْ أَلْمَسِیوُرُو ࢽجُورُو؞
[3] أَمَّ کَدِدْ ࢽَࢽْغَࢽْجُلَࢽْ أَوْوَا جَمْبَجْࢽَدْ غَیْ، حَࢽْغَلْࢽْدُو یٜ أَلْمَسِیوُوَ کَرْوُ تِلُووَا تَیِرَّلَࢽْ غَ کُولْجٜ جَوَلْ غَدٜ جْغَیْرُو رِکّْࢽَ،
[4] دَلِلْࢽْجُدْ کَمْ لَا إِسٜ عِیسَى مَوُوࢽِیٜࢽْدٜ لَآ مَوُوجِیَ، بِ رُحُ مُووُوَّدَ غَدٜ بِ کَوُرِ کْجِ کَسَدُّوَّدَ غَدٜ مُووُوِیَ، مُکُّو یِࢽْدِࢽْ تَوِ ࢽَࢽْغَرُو؞
[5] أَدْ یَیٜ، کْࢽْغَیَمْبَ کُرَ أَࢽِ وُوَ أَوِمَࢽْ کُوسَࢽِّرُو تْمَکّْࢽَ؞
[6] مَࢽَلَࢽْ غُوࢽِ غْࢽِرُو وَلْیٜکُّو یَیٜ، ࢽُودُلَࢽْ ࢽغَیْ غْࢽِ؞ أَیْ، جَوَلْ ࢻِࢽْ یَیٜ، جِرِ ࢻِࢽْ یَیٜ أَدَ ࢽَیِرُو ࢻْلٜࢽْجَغَیْیٜࢽَ؞
[7] رَ، ࢽَیِیَ سَࢻْتُرُو کْلَࢽِیَ أَوِمَرُو ࢽغُوکّْࢽِ کَوُرِ کْجِ دٜرُو وُلْࢽْجَغَکّْࢽَدْ، بِوُ وَ دِکُّو؟
[8] کِدَ ࢽَیِرُو ࢽجَدّْکُّورُو جَمَ عِیسَىٰ غَوُ غَدٜ بْتْرْمّْکّٜ أَلْوَسِ کَسَدّْکّْࢽَ؞
[9] سَ وُ دَوُࢽْدُوࢽْ ثُرُو لَمْبِیٜࢽْ دْغَکّْࢽَدْࢽْ، وُࢽْدُمَرُو کُرْوُووُرُو وَلّْکّْࢽِ، کْرَمِیَ لَرْدُ مَکِدُوࢽِیَیٜࢽْ إِسَࢽٜ مْرَدُࢽِدَ غَلْجَࢽَ ࢽَࢽْغَرُو؞ أَوُو سَمَّࢽْ ࢽَیِرُو کُرْوُووُرُو وَلْدُوُرُو کْلَࢽِیَ کَࢽْکّْࢽَ، ࢻُوُ یٜࢽْ کَࢽْکِّ؞
[10] جِرٜ أَلْمَسِیوُیٜ وُلَࢽْ دْغَࢽَدْ ࢽَࢽْغَرُو، لَرْدُ أَکَیَیٜࢽْ أَوُلُو بُوࢽِ أَدَ وُࢽْدُمَ دَمْسِیوَوُو؞
[11] أَوِرُو أَدَ وُلْیٜکُّو؟ ࢽَیِیَ ࢽجَرَاکّْࢽِرُو وَ؟ أَعَ، ࢽَیِیَ ࢽجَرَاکّْࢽَرُو اللَّهدْمَ ࢽُوجْࢽَ؞
[12] أَوُو دِکِّدَ کُورُومَ دِکِّ، ࢽغَیْࢽِࢽْ أَمْ دُوُوࢽْ أَوُلُو بُوࢽْجَࢽْ دَمَ أَࢽْدِیَ کَلْکَلُّو وَلْدُیٜ مَجَیْدْرُو دَمَ ࢻَࢽْدُو دَࢻْکْکِّ؞
[13] أَوُووَ أَمْ أَࢽِ غَیْ کْࢽْغَیَمْبَ کَتُّوُیٜ، کِدَوُ جَمْبَوُ، کْلَࢽْجَا کْࢽْغَیَمْبَ أَلْمَسِیوُیٜرُو کَلَکْثَیْ؞
[14] کُورُو أَدْ أَوُو أَجَبّٜ غْࢽِ، إِوُلِیسْدْمَ کْلَࢽْجُوَ مَلَیْیَ ࢽُرّٜرُو کَلَکْثِ ࢽَࢽْغَرُو؞
[15] کِدَوُࢽْجُ یٜ کْلَࢽْجَا کِدَوُ ࢽَࢽْجِرٜىٰ غَیْرُو کَلَکْثَیْیَ، أَوِمَ غْࢽِ؞ ࢽجٜرُورَمْࢽْجَ کْࢽْدُوࢽْجَا کَلْکَلُّو وَلْجِ؞
[16] کُورُو وَلْدْکّٜ وُلّْکِّ، بَرٜ وُࢽْدُمَ وُوَ حَࢽْغَلْࢽَمْبُمَرُو ࢽغُوسْࢽِّ؞ أَدْ غْࢽِیَ، حَࢽْغَلْࢽَمْبُمَ غَیْرُو کَسَࢽْسْࢽُواْ، ࢽغَیْࢽِࢽْ وُ یٜ غَࢽَ لَارُو أَوُلُو بُکِّ؞
[17] أَوُو کْلَ لَمَرْ أَوُلُو بُو أَدْیٜࢽْ وُلّْکِّدْ، کْمَࢽْدٜ غَیْرُو غْࢽِ، حَࢽْغَلْࢽَمْبُمَ غَیْرُو وُلّْکِّ؞
[18] أَمْ کَدَ کْلَ حَلْ تِییٜࢽْ أَوُلُو جَوُیْدْرُو، وُ یٜ أَوُلُو بُکِّ؞
[19] ࢽَیِ رَشِدُوَ دُوُوࢽْ، کَرْوُ کْجِیَرُو حَࢽْغَلْࢽَمْبُوُوَ کَسَدُّوِ،
[20] أَوُووَ کَمْ لَا ࢽَیِیَ کَرٜیَرُو کَلَࢽّجَیْیَ، بِ کْࢽْدَࢽْدُو جُوُیْیَ، بِ ࢽَیِلَࢽْ ࢻَیْدَدِیَ، بِ کْلَࢽْجُ جَجَکْثِیَ، بِ ࢽَیِیَ مَرِࢽْ بَکْثِیَ، أَسٜ کَسَدُّوِ؞
[21] وُلْدُࢽِدْ ࢽَࢽْغُوَ یَیٜ، أَࢽْدِدْ دُࢽُوࢽْدٜ ࢽغَیْ دِیُویٜ بَوُو؞ أَوُو دُوُوࢽْ کَمْ لَا غَدٜ تِلَࢽْ رِدُ بَوُووَرُو أَوُلُو جُوُیْدْ، حَࢽْغَلْࢽَمْبُمَ غَیْرُو وُلّْکِّ، وُ یٜ رِدُ بَوُووَرُو تِلَࢽْ أَوُلُو بُکِّ؞
[22] تَیِدْ یَوْدِیَ وَ؟ وُ یٜ ࢽغَیْ؞ تَیِدْ إِسْرَاءِیلَوُ وَ؟ وُ یٜ ࢽغَیْ؞ تَیِدْ کَدُوُ ࢽَوِ إِبْرَاهِیمْبٜ وَ؟ وُ یٜ ࢽغَیْ؞
[23] تَیِدْ کِدَوُ أَلْمَسِیوُیٜ وَ؟ جُورِ غَیْ وُلّْکِّ! وُ یٜ تَیِیَ کُوکّْࢽَرُو ࢽغْࢽْࢻْتُ سُو، کُوسُو سُو، کُواْدُ سُو یَکّْࢽَ، کُورُو ࢽغْوُرُو تَجِرْوَ کَرْمُویٜࢽْ کَدْکّْࢽَ؞
[24] غَدٜغَدٜ أُوُرُو بَکْتُ ࢻِدٜوُرُو ࢻَلْ بَوُو مُکُّو یَوْدِیَیٜࢽْ یَکّْࢽَ،
[25] یَکُّرُو کَلَࢽْ بَࢽْسَࢽَ، ࢻَلُّو دُوࢽْغُرْ کَوْیٜ غْغْمْسَاࢽَ، یَکُّرُو لْࢻْتُ مَارَیٜ یَکّْࢽَ، بُࢽٜ ࢻَلَّ دَبْدُ ࢻَلَّ ثُرُو تٜکُیٜࢽْ دِکّْࢽَ؞
[26] سِلَࢽْ بْلَوُرُو ࢽغْوُ دِکّْࢽَ، أَکُّو مَسِوَ بْرْمْبٜیَ جَوَلْکُورْجِمَسُویٜیَ مبٜجِ، مَسِوَ دَوُ کْرَمِیَࢽِ جِرِࢽْدٜ تِلُووَا کْرْدِیَایٜࢽْ، مَسِوَ ثُرُو بْرْࢽِیَ کَرَآیٜࢽْ، مَسِوَ کْلَ تٜکُیٜࢽْ، مَسِوَ دَوُ کْرَمِیَ کَتُّوُیٜࢽْ؞
[27] ࢽجْمْبَرُووَ ࢽغْࢽْوُوَ، ࢽغْوُرُو ࢻَادَ دْغَا، کْࢽَا ࢽغُدُوَ، ࢽغْوُرُو کْمْبُو بُوࢽَمْبُوَ، کَکُوَ کَجْمُࢽَمْبُوَ،
[28] أَوُووَ غَࢻْثَࢽَ غَدٜ دَوُࢽْ بَوُو، وَدُ ࢽغُسُوࢽْ کُرْوُووُ جَمَ عِیسَىٰ غَوُ سَمَّرُو کِسْتُوُیٜ کْلَࢽِࢽْ مبٜجِ؞
[29] وُࢽْدُ لَوُجُو، وُ یٜ لَوُࢽْکّْࢽِ وُو؟ وُࢽْدُوَ ثَسَکّٜ تَلْجُو، وُدْ جَوْࢽْجُ ࢻَکّْࢽِ وُو؟
[30] دُولٜ أَوُلُو بُکِّرُو وَلْیٜࢽُووَ، کْلَ ࢽَࢽْلَوُࢽِیٜࢽْ أَوُلُو بُکِّ؞
[31] اللَّه بَوَ کْمَࢽْدٜ عِیسَیٜ سَوِسُورُو بَرْغَادْ کَتُّوُ غْࢽِ کَمّْکِّرُو ࢽُوجْࢽَ؞
[32] بْرْࢽِ دَمَسّٜࢽْ مَیْ أَرٜتَسْ غُومْࢽَࢽْجُدْ ثَکّٜ وُوَ تَرُو بْرْࢽِ دَمَسْوُیٜدَ غُرٜىٰرَ،
[33] أَمَّ تَکَ لَا غَرُیٜࢽْ ثُرُو جُواْیٜࢽْ تَلَرْسَࢽٜ مُکُّوࢽْجُࢽْ ࢻْرْسْکٜکُّو؞