[1] کُورُو یَیٜ کْلَࢽْدٜ جَجَکْتُ بَدِࢽِیٜ وَ؟ رَ، أَمْ لَا غَیْ وُوتِیَوَ شٜدَیٜ مُکُّوࢽْدُوࢽْ رُوُوَدَ بِ ࢽَیِرُو رُوُوَادَلَࢽْ مْرَدُࢽْدٜیَ وَ؟
[2] ࢽَیِمَ وُوتِیَࢽْدٜدْ وُو، کَرْوُࢽْدٜࢽْ رُوُوَدَ، ࢽَ أَمْ سَمَّیٜࢽْ ࢽُووَدَ یٜ، کْرَادَ یٜ؞
[3] ࢽَیِدْ ࢻَرَکُّو وُوتِیَ أَلْمَسِیوُیٜ کِدَࢽْدٜىٰࢽْ إِسْࢽَ، تَدُّوَلَࢽْ غْࢽِ، رُحُ اللَّه کْࢽْدْغَیْمَیٜࢽْ رُوُوَدَ، أَلُّووَ کَوْیٜࢽْ غْࢽِ، کَرْوُ کَمْبٜࢽْ رُوُوَدَ؞
[4] ࢻُوُ اللَّهیٜࢽْ کْلَ عِیسَى أَلْمَسِیوُیٜࢽْ أَدْمَ مْرْسَدُࢽْدٜ وُو؞
[5] أَࢽْدِ کْلَࢽْدٜ رَࢽْغِیٜ أَوُو لَا رَکْتُࢽْدٜࢽْ تْدْࢽَرُو وُلِّیٜوَوُو، رَکْتُࢽْدٜدْ ࢽَ اللَّهیٜࢽْ إِسِ،
[6] تِ دُوُوࢽْ أَࢽْدِرُو رَکْتُ کِدَ أَمَࢽْ بْرِࢽْ دِیُویٜ سَدْࢽَدْ؞ أَمَࢽْدْ أَرَوُیٜ غْࢽِ، رُحُیٜ، أَوُووَ أَرَوُدْ کَرْمُو ثُوُدِ، أَمَّ رُحُدْ رُو ثُوُدِ؞
[7] وَدَ کَرْمُو کُدُومَ أَرَوُلَࢽْ کْلَ أَلُّو کَوْیٜࢽْ رُوُوَدَدْ دَرَجَارُو وَلْجٜ حَرْ إِسْرَاءِیلَوُ ࢻْکَّ ࢽَوِ مُوسَیٜ یِیلْجِدَ رَکْثَࢽٜ ثَࢻُّو ثَرُیْوَوُورُو وَلْجْࢽَدْ، یِیلْدُدْ کُوجِ یَیٜ،
[8] ࢽدَیِࢽْ غْلٜ کِدَ رُحُ اللَّهیٜدْ تِیَ کُوجْࢽَرُو دَرَجَارُو وَلْجِوَوُو؟
[9] وَدَ وُواْمْ غْࢽَدُمَدْ دَرَجَارُو وَلْیٜࢽُووَ، کِدَ ࢽَࢽْجِرٜ کُدُومَدْ تْرْغَࢽٜ تِیَ دَرَجَلَࢽْ جَوْرُو کُوجِ؞
[10] أَدْغَیْمَ کْلَ دَرَجَ دَمَ بَوُو أَدْیٜࢽْ دَرَجَ ثَلَࢽْ یِیلْجِدْ أَوِمَ غْࢽِ؞
[11] أَوُو کُودُمَدْ دَرَجَآ، أَوُو دْغَیْدْ تِیَ دَرَجَلَࢽْ کُوجِ؞
[12] تْمَ أَدْ غَیْ تَیْیٜࢽَدْ، رِدُ ࢻَلْمَ تَیْیٜࢽْدٜ،
[13] ࢽَوِ مُوسَى غَیْ غْࢽِ، تِ دُوُوࢽْ بَرٜ إِسْرَاءِیلَوُ ࢽجٜرُورَمْ أَوُو کُودُمَیٜدَ ثَرُࢽِّرُو ࢻْکَّࢽْجُ بَتَّلَࢽْ جَکْثْࢽَدْ؞
[14] أَمَّ حَࢽْغَلْࢽْجَدْ کِبَّجْࢽَ، حَرْ کُرُو سَ أَمَࢽْ ثَیٜ کْرَجَیْیَ، بَتَّ أَدْمَ دْغَ، کَدِوَوُو، أَلْمَسِیوُ بَسْلَࢽْ بَوُورُو وَلْجِ ࢽَࢽْغَرُو؞
[15] آه، حَرْ کُرُو أَتَّوْرَ ࢽَوِ مُوسَیٜیَ کْرَجَیْیَ، بَتَّ لَا کَرْوُࢽْجَ جَکْثِ؞
[16] أَمَّ کَمْ تْمْجٜ کْمَࢽْدٜرُو وَلْدِییَ، بَتَّدْ کَدِ؞
[17] کْمَࢽْدٜدْ تِمَ رُحُدْ وُو، کُورُو ࢽَ رُحُ کْمَࢽْدٜىٰ دْغَࢽَدْࢽْ ࢽَࢽْکَمْ کْلَیٜ کْرْغَ؞
[18] أَࢽْدِ سَمَّ ࢻْکَّ کَادَا کُدْرَمْ غَیْ دَرَجَ کْمَࢽْدٜىٰ ࢻْلٜࢽِیٜ، دَرَجَلَࢽْ دَرَجَ تْرْغَیْیَرُو ࢻَلْدِیٜ ثَمُࢽُوࢽْجُرُو وَلِّیٜ؞ کْمَࢽْدٜ تِ رُحُدْ ثَکّٜ أَوُو أَدْ تْدِ؞