[1] أَࢽْدِدْ سَوَوَ کِدَ اللَّهیٜ ࢽَࢽْغَرُو، ࢽَیِیَ لُواْࢽْجَیْیٜ، بَرٜ بُووُرُو سٜرْ اللَّهیٜدَ مُووُوِّ؞
[2] أَوُووَ تِیٜ: «سَ کَلْکَلْࢽِࢽْ ࢽِیَ کْرْࢽّجْکّْࢽَ، کُورُو یِمْ ࢽجْکَّوُویٜیَ بَࢽَࢽْجْغْکّْࢽَ؞» أَکُّو کْرْمَمَ سَ کَلْکَلْدْ وُو، کْرْمَمَ یِمْ ࢽجْکَّوُویٜ وُو!
[3] کِدَࢽْدٜ سَرِوُ بَوُووَرُو ࢽَࢻْثُورُو، جَوَلْ وُࢽْدُیٜمَرُو تَکَّلْ ࢻِمَا یَکِّیٜوَوُو،
[4] أَمَّ جَوَلْ ࢻِࢽْ یَیٜ أَࢽْدِ کِدَوُ اللَّهیٜ جِرٜىٰرُو ࢻْلٜدِیٜ، ࢽٜتُّلَࢽْ، بَسَرِ ࢽجَلَࢽْ، ثُرُو جْکْتُ سُو، مَسِوَ سُویٜࢽْ،
[5] کُواْدُلَࢽْ، کُوسُولَࢽْ، حَࢽْغَلْسَࢽْغُولَࢽْ، ࢽغْࢽْࢻْتُلَࢽْ، ࢻَادَ دْغَلَࢽْ، کْمْبُو بُوࢽَمْبُلَࢽْ،
[6] ࢽَࢽْتَیِرّٜࢽْ، إِلْمُیٜࢽْ، کَࢽَدِ تَیٜࢽْ، ࢽَࢽْدْغَلّٜࢽْ، رُحُ اللَّهیٜࢽْ، کْرَوُو ࢽَࢽْمْࢽَࢻْکْ بَوُووَیٜࢽْ،
[7] مَࢽَ جِرٜىٰࢽْ، کْࢽْدُوُو اللَّهیٜࢽْ، بَرِمِ ࢽَࢽْجِرٜىٰ مُکُّو کْمْبُورَمْبَ وَیْلَایٜࢽْ،
[8] ثُرُو دَرَجَا دَرَجَࢽَمْبُوَیٜࢽْ، ثُرُو أَدْلَمْدُوَ ࢽجُࢽْغُورُووَیٜࢽْ؞ جَمْبَوُ غَیْرُو ࢽغُوسَࢽَ یَیٜ، أَࢽْدِ جِرٜوُ،
[9] ࢽُوسَࢽِّ غَیْ یَیٜ، ࢽغْلَمَرُو ࢽُوسَࢽَ، ࢽُیْیٜࢽَ غَیْ یَیٜ، أَکُّو رُوࢽْدٜیَ، وُواْمْسَیْ غَیْ یَیٜ، رُورُو سٜىٰسْࢽِّ،
[10] کَرْوُ جَادَا غَیْ یَیٜ، سَوِ یَیٜ کَرْوُ کْجِیَ، تَلَاوَ غَیْ یَیٜ، أَمْ کَدَا غَرِوُرُو دِیٜ، أَوِمَ تَیْیٜࢽْدٜ غَیْ یَیٜ، أَوِسُو کَاࢽدٜ؞
[11] ࢽَیِ کُورِࢽْتِوُ، ࢻٜدٜرُو مَࢽَ ࢽجَدِّیٜࢽَ، کَرْوُࢽْدٜ ࢻَرَکُّو کَادَ؞
[12] أَࢽْدِ غْࢽِ ࢽَیِیَ ࢽجَسَرَیْیٜࢽْدٜ وُو، ࢽَیِمَ کَرْوُࢽْدُو کَࢽُوٜ أَࢽْدِیَ سَسَرَوِّ وُو؞
[13] تَدَوَࢽِ غَیْرُو ࢽَیِرُو جَࢽْدٜࢽْجَغَکِّ، کَلْکَلُّو کَلَࢽْسَࢽُواْ، ࢽَیِ یٜ کَرْوُࢽْدُووَ ࢻَرَکُّو کَࢽُواْ؞
[14] بَرٜ کُولُّوٜ ࢽَیِیَ غَࢽَمْبُوُوَ لَمَرْࢽْدُو تِلُوجْࢽِّ؞ ࢽَࢽّغْلَ، أَوِ لَمْبُوࢽْجُ ࢽَࢽْدِوِرُو؟ کُورُو ࢽُرْدْ، أَوِ لَمْبُوࢽْجُ دُوُرُو؟
[15] کَتّٜ أَلْمَسِیوُوَ إِوُلِیسَّیٜࢽْ کْلَکْلْ ࢻِ مبٜجِ وُو؟ رَ، أَوِ عِیسَىٰ غَمَا غَࢽَمْبُمَا کْلْجِ؟
[16] ࢻَدُو اللَّهیٜیَ غُمْکِیَا أَرْدِیَ ࢻِ ثَدَ؟ أَࢽْدِمَ ࢻَدُو اللَّه کْࢽْدْغَیْمَیٜدْ وُو؞ اللَّهیٜ وُلْجْࢽَدْ غَیْ: «دَوُࢽْجَࢽْ دْغَکّٜ دَدَࢽْکِّ، اللَّهࢽْجَرُو وَلّْکِّ، تَیِ یٜ جَمَࢽِرُو وَلْجَیْ؞»
[17] أَدْ ࢽَࢽْغَرُو کْمَࢽْدٜىٰ: «دَوُࢽْجَࢽْ لُوُواْ، سْغْرِرُو وَلْدْࢽُواْ، بَرٜ أَوِمَ تَیِرْ غْࢽِ لٜࢽُوِّ، دَجِ وُ یٜ ࢽَیِیَ أَرْدِࢽْجَکِّ؞»
[18] «وُ یٜ بَوَࢽْدُورُو وَلّْکِّ، ࢽَیِ یٜ تَدَوَࢽِیَ ࢻٜرُووَࢽِیَرُو وَلُّوِ،» یٜࢽُو کْمَࢽْدٜ مَرْتَوَمَ؞