[1] وُمَ بُلُسْ کْࢽْغَیَمْ أَمْبٜ غْࢽِ، بِ أَدَمْغْࢽَ لَایٜࢽْ غْࢽِ، وُدْ عِیسَى أَلْمَسِیوُوَ اللَّه بَوَ تِیَ کَرْمُولَࢽْ ثْسَࢽْغْࢽَایٜࢽْ کْࢽْغَیَمْبُو وَلْیٜکُّو؞
[2] وُوَ کْرَمِیَ سَمَّ وُوَ رُوکُّودَ جَمَ عِیسَىٰ غَوُ لَرْدُ غَلَتِیَیٜسُورُو:
[3] اللَّه بَوَࢽْدٜیَ کْمَ عِیسَى أَلْمَسِیوُوَ ࢽَیِرُو سٜرَّ ࢽَࢽْلٜوَا ࢽجَدُو!
[4] أَلْمَسِیوُدْ بِوُوَࢽْدٜ ࢽَࢽْغَرُو جَمَࢽْ دِوِ أَدْرُو أَࢽْدِیَ سَکَّوُورُو کْلَࢽْجُ کَیْࢽُو، جِرِ اللَّه بَوَࢽْدٜ ثْرَاࢽَدْ غَیْ؞
[5] اللَّهدْمَرُو حَرْ أَبَدَ أَبَدِࢽُّو دَرَجَ تِیُو! أَمِࢽْ؞
[6] جِرِ دُوَمَࢽْ تِ دُوُوࢽْ ࢽَیِیَ سٜرْ أَلْمَسِیوُیٜࢽْ بُواْࢽْجَࢽَدَ کُولُّوٜ کَوُرِ کْجِ غَدٜیَ غَ مَࢽُوِدَ أَجَمّْکّْࢽَ؞
[7] أَیْ، کَوُرِ کْجِ غَدٜ بَوُو، أَمَّ أَمْ لَا حَࢽْغَلْࢽْدُو ثَسَࢽْغٜ کَوُرِ کْجِ أَلْمَسِیوُیٜدَ ࢻَلْدُ ثَرَاࢽَ مبٜجِ؞
[8] أَمَّ وُࢽْدُ دُوُوࢽْ کَوُرِ کْجِ وُلْࢽْجَغَیْیٜࢽَدَ غَدٜ وُلْࢽْجَغَیْدْ، أَࢽْدِ بِ مَلَیْیَ سَمٜىٰرُو وَلْیٜࢽُو یَیٜ، بَسْکُوَدَرُو وَلْجُو!
[9] ثَمَࢽْ وُلِّیٜࢽَدْ غَیْ، کُورُو کْرْمَ یٜ وَلْدْکّٜ وُلّْکِّ: کَمْ لَا ࢽَیِرُو کَوُرِ کْجِ مُووُوَّدَ غَدٜ وُلْدُوُ ثْدِیَ، بَسْکُوَدَرُو وَلْجُو!
[10] کْرْمَ أَرْدِیَ کَمْبٜ رَ اللَّهیٜ مَکِّ؟ رَ، کْرَوُو أَمْبٜ مَکِّ؟ ثَ کْرَوُو أَمْبٜ کُوَ یَیٜ مَکِّیَ، وُولُودِ أَلْمَسِیوُیٜرُو وَلّْکِّوَوُو؞
[11] کْرَمِیَࢽِ، ࢽَیِرُو إِسَࢽُوࢽْجَغَکِّ، کَوُرِ کْجِ وُلّْکّْࢽَدْ کَمْبٜࢽْ غْࢽِ کَدِیُو؞
[12] کَمْبٜࢽْ غْࢽِ تِیَ کِوَࢽْدْکُّو بِ کِرْکُّو، أَمَّ عِیسَى أَلْمَسِیوُ وَحَیِلَࢽْ بَیِࢽْسُوُو؞
[13] ࢽَࢻْتُࢽِ ثَیٜ ثُرُو أَدِࢽْ یَوْدِیَیٜࢽْ، جِرِ جَمَ اللَّهیٜیَ بَسَرْدُࢽْ بَسَرْࢽْکّٜ سِدُوُرُو مَکِّدَ ࢻَࢽُّوَّ؞
[14] أَدَ کَارِیَࢽِیٜ جَوْمَرُو رَاکّٜ رُوࢽِ یِکّْࢽَدْرُو، ثُرُو جَمَࢽْدٜىٰࢽْ أَمْ ࢽغْوُ کَوُࢽْدٜ تِلُووَا أَدِࢽْ یَوْدِیَیٜࢽِࢽْ کُوکّْࢽَ؞
[15] أَمَّ اللَّه تْࢽْ ثُرُو یَࢽِیٜࢽْ وُوَ کْرٜسٜ سٜرْࢽْجُࢽْ بُواْسْࢽَ؞ أَیْ، سَ دُوُوࢽْ أَرْدِجٜ
[16] تَدَࢽْجُوَ کْرْدِیَرُو مَوُوغْکُّورُو تِیَ وُرُو بَیِࢽْسْغْࢽَدْࢽْ، غَࢽّْکّٜ أَمْسُووَ سَوَرْࢽْکّْࢽِ،
[17] بِ جٜرُجَلٜمْبُو ࢽَ تَیِ وُࢽْ بُرْوُوࢽُّو کْࢽْغَیَمْبَرُو وَلْجَࢽَدْرُو لٜکّْࢽِ، أَمَّ ثِدِ أَرَبِیَیٜرُو لٜکّٜ دَجِ وَلْدْکّٜ بْرْࢽِ دَمَسّٜرُو ࢽَࢽْغَدٜمْبُو کْرْغَاکُّو؞
[18] کُورُو ࢽغَوُو سَا یَکُّیٜࢽْ جٜرُجَلٜمْبُو کٜࢻَسَّ ࢽُودُرُو لٜکّٜ تِیَ رُوکُّو کَوُ وُرِرُو ࢽَࢻْکٜیْیٜ؞
[19] یَعْࢼُوبَ یَاࢽَ کْمَیٜرُو کَجِیَ، کْࢽْغَیَمْ غَدٜ ࢻِمَا رُکّْࢽِ؞
[20] أَوُو رُوُࢽْجَغَکِّ أَدْ کَتُّوُ غْࢽِ، ࢻُوُ اللَّهیٜࢽْ تَبَّتْکْکِّ؞
[21] دَجِ ثِدِ سِرِیٜیَ کِلِکِیَیٜیَرُو لٜىٰکُّو؞
[22] جَمَ عِیسَى أَلْمَسِیوُوَ غَوُ ثِدِ یَحُدِیَیٜدْ سَدْࢽْ وُوَ ࢽُوسَࢽِّ،
[23] أَدْ رُࢽْجُمَا وُلْجَیْ ࢻَࢽْجَ: «کَمْ ثَلَࢽْ أَࢽْدِیَ بَسَرْسَࢽَدْ کْرْمَ کَمْبْرْسٜ دُوُوࢽْ تِیَ سِدُوُرُو مَجِدَ أَمْبُو وُلْجِیے؞»
[24] أَدْغَیْمَ وُ ࢽَࢽْغَرُو اللَّهَ ثُوࢽْغُورِ؞