[1] أَوُلُو بُودْ دُولٜ؞ ࢻَیْدَࢽْجُ بَوُو یَیٜ، ࢻُوُ بُکّٜ کْلَ کُرُووَ وَحَیِیَ کْمَࢽْدٜىٰࢽْ مَࢽَ دِکِّ؞
[2] کَمْ لَا أَلْمَسِیوُلَࢽْ کْرْغَ ࢽُوکّْࢽَ، کُ کْرْوُ مٜوُ دٜرِ تِیَ حَرْ سَمٜ کْࢽْیَکُّیٜرُو کٜسَدُو؞ تِیلَࢽْ بِ تِیلَࢽْ غْࢽِ ࢽُوکّْࢽِ، اللَّه ࢽُوجُو؞
[3] کُورُو کَمْ أَدْ، تِیلَࢽْ بِ تِیلَࢽْ غْࢽِ ࢽُوکّْࢽِ، اللَّه ࢽُوجُو،
[4] تِیَ جَࢽَّرُو ثَادٜ مَࢽَ بَیِࢽْدُرُو یُوجِوَوُو وُلْدُࢽْجَ کَمْبُو دَࢻْتْغْࢽَ ࢻَࢽْغٜࢽُو؞
[5] کْلَ کَمْ أَدْ غَیْیٜࢽْ أَوُلُو بُکِّ، أَمَّ ࢽَࢽْلَوُࢽِرُو کَجِیَ، کْلَࢽِࢽْ أَوُلُو بُکِّوَوُو؞
[6] أَ! ثَ أَوُلُو بُو رَاکّْࢽَا، جِرٜ وُلّْکِّدْرُو، حَࢽْغَلْࢽَمْبُمَرُو وَلّْکِّوَوُو؞ أَمَّ کُولّْکّْࢽَ، بَرٜ أَوُو ࢽِلَࢽْ تُرُیْ بِ وُلَࢽْ ࢻَࢽْدِ کُوجْࢽَرُو وُوَ أَوُو لَارُو ࢽغُوسَࢽِّ؞
[7] بَرٜ کْلَ وَحَیِ جَوْرُو أَجَبَّدْیٜࢽْ کْلَࢽِ ࢽَ کُوجْࢽَرُو جَجَࢽْغْکّْࢽِرُو، کَرِیے لَا تِیࢽِرُو ثَسَکّْࢽَ، وُوتّٜ کَدُࢽُومَ إِوُلِیسّٜ وُوَ بَبَکْتُمَ، بَرٜ کْلَࢽِ ࢽَ کُوجْࢽَرُو جَجَࢽْغْکّْࢽِرُو؞
[8] کْلَ أَدْیٜࢽْ وُࢽْ تِیَ ثُتُّلُوُورُو یَکُّرُو کْمَࢽْدٜیَ لُواْیٜکُّو،
[9] أَمَّ تِیٜ وُرُو: «سٜرْࢽِ ࢽجْدْࢽَ، ثُرُو ࢽَࢽْلَوُیٜࢽْ کْࢽْدُوُوࢽِ کَلْکَلُّو ࢻْلٜدِ،» یٜࢽُو؞ أَدْ ࢽَࢽْغَرُو کَرْوُ کْجِیَلَࢽْ ثَیٜمَا کُوجْࢽَرُو کْلَ ࢽَࢽْلَوُࢽِیٜࢽْ أَوُلُو بُکِّ، ࢽغَیْࢽِࢽْ کْࢽْدُوُو أَلْمَسِیوُیٜ وُلَࢽْ دْغَیْ؞
[10] تُو، أَلْمَسِیوُ ࢽَࢽْغَرُو ࢽَࢽْلَوُ سُو، مَࢽَکُتُّ سُو، مَسِوَ سُو، بَسَرِ سُو، کُتُّ سُو کَرْوُ کْجِیَلَࢽْ کَسَدّْکّْࢽَ، أَوُووَ سَ وُ لَوُدْ، سَدْࢽْ وُ دُࢽُووَ؞
[11] حَࢽْغَلْࢽَمْبُمَرُو وَلّْکّْࢽَ، ࢽَیِمَ وُوَ سَکُّوْ! ثَ وُوَ جَجَࢽْسُوَّمَ وَجِࢻْثُو، أَوُووَ وُدْ أَوِمَ غْࢽِ یَیٜ، کْࢽْغَیَمْبَ کُرَ أَࢽِ وُوَ أَوِمَࢽْ کُوسَࢽِّ؞
[12] کَࢽَدِلَࢽْ شٜدَوَ کْࢽْغَیَمْبٜ أَلَمَ سُو، أَوُو أَجَبَّ سُو، کْࢽْدُوُو سُو دَوُࢽْدُوࢽْ تْدْࢽَ؞
[13] جِرِ ࢻِࢽْ غْلٜ ࢽَیِیَ کُوجْࢽَرُو جَمَ عِیسَىٰ غَوُ غَدٜدَ ࢽغُرْࢽُویٜکُّو، ࢽَیِرُو کُرْوُووُرُو وَلْࢽْجَغَکّْࢽِ غْࢽِیَ؟ جِرٜࢽَمْبُ أَدَ غَوُرْسْغْࢽُواْ!
[14] أَکُّو ࢽَࢽْدُورُو کْࢽْدٜࢽِ کْࢽْیَکُّیٜرُو دَبَّرْدْکّْࢽَ، ࢽَیِرُو کُرْوُووُرُو وَلّْکِّوَوُو؞ کْࢽْدَࢽْدُو غْࢽِ، ࢽَیِمَا مَکِّ، أَوُووَ یَلَّ غْࢽِ یَࢽْجَا بَوَࢽْجَایٜ کُرْوُووُ ࢽغُوجَیْ، أَمَّ یَا بَوَا کُرْوُووُ یَلَّیٜ ࢽغُوجَیْ؞
[15] وُدْ، رُوࢽْدُو ࢽَࢽْغَرُو جَوْرُو کَرْوُ کْجِیَرُو کْࢽْدَࢽِیَ کْلَࢽِیَ یِکِّ؞ ࢽَیِیَ رَوُوࢽِدْ تْرْغَیْیَ، وُوَ رَوُوࢽْدُو ࢻُلُدِ وَ؟
[16] ࢽغَیْرُو وَلْیٜࢽُو یَیٜ، ࢽَیِرُو کُرْوُووُرُو وَلْࢽْجَغَکّْࢽِ، أَمَّ وُ بُرْوُووَدْ، ࢽَࢽْغَلَࢽْ ࢽَیِیَ ࢽغٜدَکُّو ثَࢽِ؞
[17] أَمْ جُوَࢽْجَغَکّْࢽَدْیٜࢽْ ࢽَیِلَࢽْ ࢻَیْدَدْکّْࢽَ وَ؟
[18] تِتُسَّ ࢽَࢽْدُورُو لٜجُورُو لُواْکّٜ کْرَمِدَ تِیَ رُوکُّو جُوَࢽْغٜىٰرَکُّو؞ تِتُسْ ࢽَیِلَࢽْ ࢻَیْدَدْࢽَ وَ؟ وُوَ تِیَ حَلْ تِلُوࢽْ دْغَیْیٜࢽْدٜ وَ؟ جَوَلْࢽْدٜ تِلُوجْࢽِّ وَ؟
[19] تُسّْࢽَ أَࢽْدِ ࢻُوُࢽْدُوࢽْ کْلَࢽْدٜ مُویِیٜ تْمَࢽُوَّ؞ تُو، کْرَوُووُࢽْدٜ، ࢻُوُ اللَّهیٜࢽْ أَلْمَسِیوُلَࢽْ مَࢽَࢽِیٜ، أَوُو دِیٜ سَمَّ ࢽَیِیَ إِسَدُࢽُووَدُوُرُو دِیٜ؞
[20] إِسْکِّیَ، وَࢽٜىٰ ࢽَیِیَ جِرِ رَاکّْࢽَدْ غَیْرُو غْࢽِ ࢽجَوَࢽْدْکِّ، ࢽَیِ یٜ وُوَ جِرِ رَاوَّدْ غَیْرُو غْࢽِ سُوَࢽْدُوِرُو رِکّْࢽَ؞ وَࢽٜىٰ لَوَلَا ࢽَࢽْدْرِیَ غْرْغَدُوَ کْلَ رَوُووَ یَرْسْمْبَ تَرْوَا رُوکُرَا حَࢽْغَلْسَࢽْغُووَ مبٜجِ؞
[21] أَیْ، وَلْدْکّٜ إِسْکِّیَ، اللَّهࢽِ ࢻُوُࢽْدُوࢽْ ࢽَࢽْغُرُو سَکّٜ أَمْࢽْدُو کَدَ دُوُوࢽْ ثَلَࢽْ بِوُ ثَدْࢽَ، کُورُو تْمْجَࢽٜ تَیِرْࢽَمْبُ سُو، کْࢽْجْࢽَ سُو، ࢽَࢽْجَࢽٜ سُو کُولْجَࢽِّدْ ࢽَࢽْغَرُو کَرْوُࢽِ کُتَّجِرُو رِکّْࢽَ؞