[1] Akka obboleeyyanitti wal jaalachuu keeysan itti furaa!
[2] Keeysummoota qeebaluus hin dagatinaa! Akkana godhuu dhaan, namoonni odoo hin beekin, maleeykoota Rabbii simatanii ti jiru.
[3] Akka waan isin, isaaniin wajjiin mana hidhaa keeysa jirtaniitti, warra hidhaman yaadadhaa! Akka waan isin isaaniin wajjiin cinqamaa jirtanitti, warra cinqii keeysa jiraniis yaadadhaa!
[4] Fuudhaa fi heerumni hunduma biratti ulfina-qabeeysa tahuu dha qaba, sireen isaanii tiis hin najifamin! Rabbi warra zinaa godhuu fi warra ejjituu itti firdii godhuufi taa'a.
[5] Horitti bololuu irraa if xaaharaa! Waan arkattaniin “Nu gaha” jedhaa! Rabbi, “Ani gonkumaa si hin hoongeeysu! Siis hin darbu!” jedhee ti jira.
[6] Kanaaf jecha amantaa dhaan, “Gooftaan gargaaraa kiyya, ani humaa hin sodaadhu; namni maal na godhuu dha dandaya?” jenna.
[7] Warra hooggantoota, kanneen Qoowlii Rabbii isin barsiisaa turan yaadadhaa! Haala jireenya isaanii irraa firii arkamte laalaa tii amantii isaanii fudhadhaa duukaa bu'aa!
[8] Yesuus Kiristoos, gonkumaa hin jijjiiramu; kaleeysa taanaan, yookiin arra, ammaas bara baraafiis inni sanuma!
[9] Reefu-dhuftee, qaraatii adda addaa hundumaan hin gowwoomfaminaa! Nyaata hoodaa nyaachuun, warra nyaatuuf humaa waan hin fayyadneef jecha, isaa mannaa, qalbiin teenya ni'imaa Rabbii tiin yoo jabina arkatte gaarii dha.
[10] Nuti, bakka aarsaa dhaa, kan warri daasa san keeysa kaadaman irraa nyaachuun hin kannaminiif qabna.
[11] Angafni lubootaa, dhiiga horii aarsaaf qalamanii, aarsaa dilii tiif, gara bakka hundumaa irra caalaa qulqulluu tahe sanitti ol galcha; foon horii sanii guutumatti ammoo, bakka qubataa keeysaa gadi baafamee ti gubama.
[12] Yesuusiis akkasumatti, dhiiga isaa tiin ummata qulqulleeysuuf jecha, karra magaalaa duubatti dararame.
[13] Eegasuu koottaa, nuti arraba isa irra gahe baadhannee, bakka qubataa duubatti isatti haa dheeynuu!
[14] Nuti magaalattii dhufa jirtu eegganna malee, biyya addunyaa tana irraa magaalaa itti waarru hin qabnu.
[15] Koottaa, karaa Kiristoosiin odoo gargar hin kutin, aarsaa galataa ti Rabbiif dhiheeysinaa! Kuniis, inni Gooytaa tahuu isaa ragaa afaaniin beeysisuu dhaan hamdii galchinuu dha.
[16] Waan gaarii dalaguu fi waan qabdaniis warra kaaniin gahuu hin irraanfatinaa! Rabbi aarsaa akkasii tanatti gammada.
[17] Hooggantoota keeysaniif ajajamaa, waan isaan isin ajajaniis godhaa! Isaan lubbuu teeysan eeguuf itti gaafatamummaa dha qaban; kanaaf hojii isaanii irratti isaan gammachiisaa malee, hin naasisinaa! Akkana tahuu baanaan, humaatuu isin gargaaruu hin dandayan.
[18] Nuti haala hundumaanuu, jireenya qaceelaa jiraachuuf, xalalii xaliilaa fi amantaa guutuu mirkaniin waan qabnuuf jecha, isiniis numaaf kadhadhaa!
[19] Keeysumaa huu, ani dafee akkaan isiniif deebi'u, jabeeysitanii akka kadhattaniin isin gorsa!
[20] Kunoo, Rabbi Abbaan nagaya kannu, dhiiga irbuu abad saniin, Gooftaa keenya Yesuus, tiiysituu hoolotaa guddicha, warra du'an keeysaa deebisee fidee ti jira.
[21] Innummaan waan isa gammachiisu Yesuus Kiristoosiin nu keeysatti hojjachuu dhaan, fedhii isaa akka gootaniif, waan gaarii hundumaan isin haa qopheeysu! Yesuus Kiristoosiif ulfinni bara baraaf haa tahu! Aammiin.
[22] Yaa obboleeyyan kiyya! Ergaa tana gabaabsee isinuma jajjabeeysuufiin katabe; waaniin isin gorsees obsaan akka gaaritti akka hubattaniin isin kadhadha!
[23] Obboleeysi keenya Ximotewoosiis, hidhaa keeysaa gadi dhiifamuu isaa beekaa! Inni dafee yoo dhufe, aniis isin laaluuf dafee tiin isumaan wajjiiniin dhufa.
[24] Warra hooggantoota keeysan hundumatti, warra amantoota hundumattis, nagaya keenya nuuf himaa! Obboleeyyan biyya Ixaaliyaa tii dhufaniis nagaya isiniif dhaamu.
[25] Ni'imaan Rabbii, hunduma keeysanii wajjiin haa taatu!