[1] Eegasuu yaa obboleeyyan koo qulqulloota, isin warri waamicha samii irraa tahe keeysatti hirmaattan, Yesuus, ergamaa fi angafa lubootaa tahuu isaa, kan amantii teenyaan beeysifnu sanuma irra qalbii teeysan kaayadhaa!
[2] Akkuma Museen guutummaa mana Rabbii keeysatti amanamaa tahetti, inni niis Rabbi, kan hojii tana isa irra kaayeef, amanamaa kan ture.
[3] Akkuma namtichi mana ijaaru, manicha irra caalaa ulfina qabutti, Yesuusiis, akkasumatti Musee irra caalaa ulfina guddaa arkachuun kan male tahee ti jira.
[4] Manneen hundinuu adduma addaan nama isaan ijaare qabu; ammoo kan waa hundumaa ijaare Rabbuma.
[5] Museen, amanamaan kaadamaan hunduma mana Rabbii keeysaa ture, waan hegere himamuuf taa'uufi, ragaa bahuuf ture.
[6] Kiristoos ammoo akka ilmaatti, mana Rabbii irratti amanamaa dha; eegaa, yoo ija-jabinaa fi ammaas abdii dhaadannuun san jabeeyfannee qabanne, numaatu mana isaa ti.
[7] Kanaaf, akkuma Ruuhal Qudusuu jedhu, “Arra, sagalee Rabbii wayta dhageeysan,
[8] akkuma gaafa fitinaa huffee gammoojjii keeysatti warra Rabbi jalaa didanii sanitti isiniis qalbii hin jabaatinaa!
[9] Rabbi, ‘Wayta san abbootiin teeysan bara afurtamaaf hojii tiyya arkanii ti jiru, ammoo fitinanii ti na jarraban.
[10] Kanaaf jechaan, ani dhaloota sanitti aare, qalbiin isaanii tiis wayta hundumaa karaa irraa mayxi, isaan karaa kiyyaas hin beeyne.
[11] Eegaa, waytaan aare san, isaan gonkumaa bakka boqonnaa tiyyaa hin seenan! jedhee kakadhee tiin jira’ jedhe”.
[12] Yaa obboleeyyan kiyya! Isin keeysaa namni tokko illeen, qalbii hamtuu hin amanne, tan Rabbii jiraataa irraa garagaltuus, akka hin qabaanneef if eeggadhaa!
[13] Ammoo isin keeysaa nam tokko illeenuu, gowwoomsaa dilii tiin mata-jabeeysa akka hin taane, guyyaa “Arraa” jedhamu hunduma keeysatti, guyyuu wal jajjabeeysaa!
[14] Nuti amantaa teenya tan duraa san, hanga dhumaatti jabeeysinee yoo qabanne, warra Kiristoos keeysatti qooda qabani taana.
[15] Barreeyfamni Qulqulluun, “Arra sagalee Rabbii hogguu dhageeysan, akkuma warra isa jalaa didanii sanitti isiniis mata-jabeeyyii hin tahinaa!” jedha.
[16] Warri sagalee Rabbii dhagayanii isa jalaa didan sun eenyu? Warruma geggeeysaa Musee tiin biyya Misraa tii bahan hundumaa mitii ree?
[17] Rabbi bara afurtamaaf eenyutti aare? Warruma dilii hojjatanii, huffee gammoojjii keeysatti kufanii, reefki isaanii dirreetti hafe sanii mitii ree?
[18] Warruma isaaf ajajamuu didan saniif yoo hin tahin, bakka boqonnaa isaa gonkumaa akka hin seenne, eenyuuf kakate ree?
[19] Eegaa, isaan amantii dhabuu irraa kan ka'e, bakka boqonnaa san seenuu akka dadhaban, nuti ni arkina.