[1] Irbuun duraa lafa tana irratti sirna ibaadaa tii fi galma daasaa tiis ni qabdi turte.
[2] Daasni tokkoos dhaabamee ti ture; daasicha keeysaa kutaan duraa, “Bakka qulqulluu” jedhama; achi keeysa, qabduu ibsaa, gabatee fi biddeena laalchaaf Rabbi duratti dhihaatu, kanneen tu kaayama.
[3] Golga lammaffaa duubaan kutaan jiru, “Bakka hundumaa irra caalaa qulqulluu ti” jedhama.
[4] Achi keeysa ammaas bakka aarsaa ziqeeya irraa hojjatamte, tan libaanatni irratti aarfamuu fi ammaas sanduuqa irbuu kan qaamni isaa guutumatti ziqeeyaan gonfamee tu jira; killi ziqeeyaa kan maannaa qabu, uleen Aaron tan fiiltees, akkasumatti ammaas loohaan dhagaa lamaan kanneen seerri irratti katabamaniis, sanduuqa san keeysa kaayamu.
[5] Sanduuqa san gubbaa, Kiruubel ulfinaa kanneen gooblaa isaanii tiin, bakka diliif aarsaan itti godhamu san hagooganii tu ture; ammaan tana waan kanneen laalchisuun ballinaan irratti dubbachuu hin dandeenyu.
[6] Eegaa, wanti kanneen hundinuu, haala kanatti eega qopheeyfaman booda, luboonni guyyuu sirna hojii ibaadaa isaanii raawwachuuf, daasicha keeysaa, kutaa fuula dura jiru ni seenu turan.
[7] Angafni lubootaa ammoo kophaa isaa, daasicha keeysaa kutaa gara duubaatti, amata keeysaa guyyaa tokko qofa ol seena; kuniis dhiigaan maletti hin tahu; dhiiyni niis, dilii mataa isaa tii fi dilii ummanni dogongoraan dalaganiif jecha aarsaaf dhiheeyfama.
[8] Kanaan Ruuhal Qudus, hanga daasni duraa sun dhaabbatee jirutti, bakka hundumaa irra caalaa qulqullutti dabruuf, amma illee karaan namaaf akka hin banamin agarsiisa.
[9] Kun fakkeenya bara ammaa ti; kannaawwanii fi ammaas aarsaawwan dhiheeyfamaniis, xalalii namticha ibaadu sanii guutummatti qulqulleeysuu akka hin dandeenye agarsiisa.
[10] Isaan kun waa'ee nyaataa tii fi dhugaatii, ammaas waa'ee dhiqachuu sirna xaaharummaa adda addaa qofaaf waan tahaniif, sirna namni alaan itti dalagu kanneen, hanga wayta Rabbi sirna haaraya dhaabutti warra hojjatanii dha.
[11] Kiristoos ammoo waan gaggaarii kanneen dhufa jiraniif, angafa lubootaa tahee wayta mullate, gara daasa caalaa guddaa fi guutummatti raawwatamaa tahe keeysa dabre; daasichi niis namaan hin dhaabamne, tana jechuun uumama kana keeysaa kan humaa hin qabne jechuu dha.
[12] Kiristoos, aarsaaf dhiiga re'ootaa tii fi dhiiga dibootaa fudhatee odoo hin tahin, dhiiga ifii isaa dhangalaasuuni, bara baraaf waytuma takka qofa bakka hundumaa irra caalaa qulqulluu ti ol seene; akkasitti najaata bara baraa nuuf arkamsiise.
[13] Eega dhiiga re'ee tii fi kormootaa, daaraan foon goromsa aarfamee namoota najifamootti facaasuun, najisummaa foon isaanii kan irraa xaaharu yoo tahe,
[14] dhiiyni Kiristoos, Ruuhaa bara baraa tiin aarsaa illaa hin qabne godhee ifuma isaa kan Rabbiif dhiheeyse sun, akka Rabbii Jiraataa kaadamuu dandeenyuuf, gocha du'atti nama geeysu irraa, xalalii teenya daran calchisee xaliileeysuu ni dandaya.
[15] Kanaaf jecha Kiristoos, araar-qaboo irbuu haarayaa tahee, warri yaamaman sun dhaalmaya bara baraa kan abdachiifame san, arkachuu akka dandayaniif, amma kunoo dilii irbuu duraa jalatti hojjatamte irraa isaan najaa baasuuf jecha gumaa if kannee ti du'e.
[16] Dhaamsi dhaalaa jiraannaan, hojii irra ooluuf, duuti namticha dhaammatee mirkanaawuu dha qabdi.
[17] Dhaamsi dhaalaa, eega namtichi dhaala dhaammatee kanne sun du'e booda qofa hojii irra oola malee, odoo inni lubbuun jiruu, hojii irra ooluu hin dandayu.
[18] Kanaaf jecha, irbuun durattii illeen, dhiigaan maleetti hojii irra wanni hin ooliniif.
[19] Museen ajaja seeraa tokko tokkoon, ummata san hundumatti eega labse booddee, dhiiga dibootaa tii fi kan re'ee ti, bishaaniin wajjiin fuudhee, baala hisoophii kan suufni diimaan itti marameen, kitaabaa fi ummata san hunduma irratti facaase.
[20] Itti furuun, “Kuni dhiiga irbuu kan Rabbi akka eeydaniif isin ajaje” isaaniin jedhe.
[21] Haaluma sanitti ammaas daasichaa fi meeshaa hooda ibaadaa hundumatti dhiiga facaase.
[22] Isuma dhugaa, akka seerichaatti wanti hundinuu dhiigaan xaaharama jechuun ni dandayama; dhiiyni odoo hin dhangala'in ammoo, oomfiin dilii dhaa hin jirtu.
[23] Eegaa, kanneen akeeka waan samii irraa tahan akkanatti xaaharamuun isaan irra jiraate, warri asliin samii irra jiran ammoo aarsaa kana irra caaluun qulqulleeyfamuun isaan irra jira.
[24] Kiristoos galma fakkii garagalcha bakka hundumaa irra caalaa qulqulluu dhaa, kan harka namaa tiin dalagame keeysa hin seenne; inni bantii samii aslii bakka amma Rabbi duratti itti nuuf maganfatu seene.
[25] Achi seenuun isaa tiis, irra deddeebi'ee ifii isaa aarsaa dhiheeysuuf, akka angafni lubootaa dhiiga biraa fuudhee baruma baraan, bakka hundumaa irra caalaa qulqulluu tahe san kan seenuu miti.
[26] Odoo akkas tahuu baate, inni uumamuu biyya addunyaa irraa jalqabee, irra deddeebi'ee hiraaramuun isa irra ni gaha ture; amma ammoo dhuma barichaatti, wayta hundumaaf akka tahutti wayta takkittii qofaaf, ifuma isaa aarsaa dhiheeysuu isaa tiin, dilii dhabamsiisuuf jecha mullatee ti jira.
[27] Namayyuu irratti huggu takka du'uun, achiin booda ammoo firditti dhihaachuun herregamee ti jira.
[28] Akkasumatti Kiristoos dilii namoota hedduu irraa fuudhuuf wayta takka aarsaa tahee ti dhiheeyfame; ammaas, lammaffaa mullachuun isaa, dilii baadhachuuf odoo hin tahin, warra dhufa isaa eeggataniif najaata fiduuf mullata.