[1] Abdiin bakka boqonnaa isaa san seenuu dhaa, amma illee waan jirtuuf jecha, eegasuu nu keeysaa namni tokko illeen boodatti hafee akka hin hanqanne, qalbiin if haa eeynuu!
[2] Oduun gammachuu dhaa tanuma nutti himamte tanaa tu isaanittiis lallabamee ture; haa tahu malee, warri dhagaye sun amantii dhaan waan hin fudhatiniif jecha, wanni dhagayan isaaniif faaydaa hin goone.
[3] Ammaas nuti warri amanne, bakka boqonnaa san ni seenna; Rabbi hojii isaa waytuma biyya addunyaa dhaa uume san raawwatu illee ammoo, isaaniin “Waytaan aare san ‘Isaan gonkumaa bakka boqonnaa tiyyaa hin seenan’ jedhee kakadhee tiin jira” jedhe.
[4] Waa'ee guyyaa torbaffaa laalchisuun ammoo bakka takkatti, “Guyyaa torbaffaa dhaa, Rabbi hojii isaa hundumaa irraa boqotee ti jira” jedha.
[5] Ammaas deebisee bakkuma kanatti, “Isaan gonkumaa bakka boqonnaa tiyyaa hin seenan” jedhee dubbatee ti jira.
[6] Ammumaa huu taanaan, warri bakka boqonnaa sanitti galuuf abdii qaban ni jiru; warri duraan Wangeelli itti himame sun ammoo waan amanuu didaniif, bakka boqonnaa san odoo hin seenin hafan.
[7] Kana irrattiis ammaas, Rabbi guyyaa “Arra” jedhamu tokko ni dhaaba; akkuma kanaan dura as keeysatti yaadachiifamee bara dheeraa booddee karaa Daawwidiin, “Arra, sagalee Rabbii wayta dhageeysan, isin mata-jabeeyyii hin tahinaa!” jedhe.
[8] Odoo waan Iyyaasuun bakka boqonnaa sanitti isaan galche tahee, Rabbi eegas booddee waa'ee guyyaa biraa hin dubbatu ture.
[9] Eegasuu, boqonnaan Sanbataa, ummata Rabbii tiif ammuma illee ol kaayamee tiifi jira.
[10] Namni bakka boqonnaa Rabbii seenu, akkuma Rabbiinuu hojii isaa irraa boqotetti, inni niis akkasumatti hojii isaa irraa ni boqota.
[11] Kanaaf jecha, nam tokko illeenuu, fakkeenya warra ajajamuu diduun kufanii jala goree akka hin hafne, koottaa mee bakka boqonnaa san seenuuf haa tattaafannuu!
[12] Qoowliin Rabbii jiraattu, qiwwaaniis hojjataa ti jirti, habalee qara lamaa irra caalaa qara qabdi; isiin keeysa lixxee lubbuu fi ruuhaa, moorgayaa fi dhuhaas gargar baafti, maalummaa yaadaa fi fedha qalbii namaa keeysa jiruus gargar baasuu dandeeysi.
[13] Waan uumame keeysaa takka illeenuu, isa duraa dhokachuu hin dandeeysu; wanti hundinuu, ija isaa duratti saaxil taatee ti mullatti; nutiis, waan goonee fi maaliif akka goonees, isa kanaafi jawaaba deebisuun nu irra jira.
[14] Irrattuu, angafa lubootaa guddicha, kan bantiiwwan samii keeysa dabre, Yesuus, Ilma Rabbii eega qabaanne, beeksisa amantii teenyaa jabeeysinee haa qabannuu.
[15] Nuti angafa lubootaa, kan dadhabbii teenyaaf nuuf nahuu hin dandeenye hin qabnu; ammoo kan waan hundumatti, akkuma keenyatti fitiname tokko qabna; haa tahu malee, inni kan dilii hin qabnee dha.
[16] Eegasuu, koottaa mee amantaa dhaan gara arshii-ni'imaatti haa dhihaannuu! Wayta dhihaannu, rahamata isaa tii fi ni'imaa isaa wayta barbaachisetti akka nu gargaaraniif ni arkanna.