[1] Bara dur Rabbi, wayta hedduuf, karaa adda addaa tiin, nabiyyootaan abbootii teenyatti dubbatee ti ture.
[2] Amma ammoo zamaan-aakir kana keeysatti, Ilma isaa kan inni, isaan samii fi lafa uumee waan hundumaa akka dhaaluuf shuumeeni nutti dubbate.
[3] Ilmi niis, walaqqisa durrii ulfina Rabbii ti, eenyummaa Rabbii tiis sirriitti ni wakkala, waanuma uumame hundumaa huu qiwwaa qoowlii isaa tiini jiraachisa. Dilii teenya irraa qulqulleeyfamuu, eega ifii isaa tiin arkamsiise booddee, ol samii irratti, gara harka mirgaa Gooytichaa ti taa'e.
[4] Kanaaf, maqaan inni dhaale kan isaanii irra caalaa waan taheef, Kiristoos maleeykoota irra kan caaluu dha.
[5] Rabbi maleeykoota isaa keeysaa eenyuuni, “Ati Ilma kiyya, ani arraan si dhalche” yookiin eenyuuni, “Ani isaaf Abbaan taha, inni niis Ilma anaaf taha” jedhee beeka?
[6] Ammaas Rabbi, Ilma isaa angafa gara biyya addunyaa wayta fidu, “Maleeykoonni Rabbii hundinuu isaaf haa sujjuudan!” jedhe.
[7] Waa'ee maleeykootaa taanaan, “Inni maleeykoota isaa akka qilleensaa, kaadamtoota isaa tiis akka arraba ibiddaa ti godha” jedhe.
[8] Waa'ee Ilma isaa ammoo, “Arshiin tee yaa Rabbi, baraa hanga baraatti, uleen mootummaa tee tiitiis, ulee qaceelummaa ti.
[9] Ati qaceelina jaalattee ti jallina jibbite; kanaaf Rabbi Gooytaan kee si dibee, dhadhaa gammachuu tiiniis si muudee saahibban kee tii oliis si kaaye” jedhe.
[10] Ammaas, “Ati yaa Gooytaa, jalqabatti bu'ura lafaa gadi jabeeysitee ti jirta, bantiileen samii hundi niis hojii harka kee tii ti.
[11] Ati haftee ti jiraatta; isaan ammoo dhabamuuf deemu, hundi isaanii tiis akka huccutti moofawu;
[12] akka bullukkoottiis isaan ni marta, akka uffatattiis ni jijjiiramu; ati ammoo hin jijjiiramtu, barri kee tiis dhuma hin qabu” jedhe.
[13] Rabbi maleeykoota isaa keeysaa eenyuuni, “Diinota kee miila kee jala hangaan ani siif kaayuu, gara harka mirgaa kiyyaan taa'i!” jedhee beeka?
[14] Isaan kun hundinuu maleeykoota, kanneen warra najaata arkachuuf deeman tajaajiluuf ergamanii mitii ree?