[1] Wanni guddoon ani jechuu barbaade, “Nuti angafa lubootaa kan bantii samii keeysa, harka mirga arshii Rabbii mulki-qabeeysaa tiin taa'e qabna” jechu.
[2] Inni, mana qulqullummaa, daasa namni dhaabe odoo hin tahin, daasicha dhugaa, kan Gooytaan dhaabe keeysatti, angafa lubootaa tahee ti kaadama.
[3] Angafa lubootaa warri tahan hundinuu, kannaa fi aarsaa dhiheeysuuf, tajaajila irratti ramadamu; kanaafi inni kuniis, waan dhiheeysu qabaachuun isa barbaachisa.
[4] Luboonni akka seerichaatti kannaa dhiheeysan waan jiraniif jecha, inni odoo jasadaan biyya addunyaa irra jiraate illee, luba hin tahu ture.
[5] Isaan daasa, akka gaaddidduu tii fi fakkii mana qulqullummaa samii keeysa jiruu keeysatti warra tajaajilu; akeekni daasni sun ittiin ijaarame Museetti agarsiifamee ti ture. Wayta inni daasa san ijaaruuf ka'e, Rabbi, “Ammaas, waan hundumaa tilmaama akeeka gaara gubbatti sitti agarsiifame saniin akka hojjattuuf akeekkadhu!” jedheeni.
[6] Hojiin lubummaa tan Yesuus fudhate, tan lubummaa isaanii irra hammuma irbuun inni jaarsa araar-qaboo taheef tun irbuu dullattii irra caaltu takka irra caalti; ammaas, abdii irra wayyaa ti irratti bu'uramte.
[7] Irbuun duraa sun waan irraa irrate odoo qabaachuu baattee, irbuun biraa hin barbaachiftu turte.
[8] Rabbi badii ummata irratti arkee ti, “‘Kunoo, guyyichi ni dhufa; guyyaa san ani mana Israa'elii fi ammaas mana Yihudaa tiin wajji irbuu haarayan gala’ jedha Gooytaan.
[9] ‘Irbuun tuniis, tan akka waytaan harka isaanii qabee biyya Misraa tii isaan baasee san hin taatu; irbuun ani abbootii isaanii tiin wajjiin seene saniif isaan amanamoo hin taaneefi; akkasittiin aniis dantaa isaan irraa dhabe’ jedha Gooytaan.
[10] Bara dhufu keeysa, irbuun ani mana Israa'el wajjiin galuuf taa'u tana, ‘Seerran kiyya qalbii isaanii keeysaan kaaya, garaa isaanii keeysattiin katabaasi; ani Rabbii isaanii tiin tahaafi, isaaniis ummata kiyya anaaf tahu’ jedha Gooytaan.
[11] Itti dabaluun, ‘Asii achi namni tokko illeenuu nama ollaa isaa tiin yookiin obboleeysa isaa tiin Gooftaa beeki! jedhanii qaraasisuun hin barbaachisu; kuniis xiqqaa isaanii irraa jalqabee hanga guddaa isaanitti hundi isaanii tuu waan ana beekaniifi.
[12] Hammeenya isaanii tiis isaanii fiin oomfii godha, dilii isaanii tiis deebi'ee hin yaadadhu’” jedha Gooytaan.
[13] Irbuu tanaan haaraya jechuu dhaan, irbuu duraa san tan waytiin itti dabarte godhe; eegaa, wanti waytiin itti dabarte, ammaas daftee ti dhabamuuf teeysi.