[1] Angafni Lubootaa tokko, bakka namootaa bu'ee kannaa fi aarsaa dilii dhiheeysuuf, namoota jidduu dhaa fuudhamee ti hojii ibaadaa Rabbii irratti ramadama.
[2] Inni ifumaa fuu dadhabbii akkasii jala waan jiruuf jecha, warra wallaalotaa fi warra karaa irraa maqaniif beekee, rahamataan isaan qabuu ni dandaya.
[3] Kana waan taheef jecha, inni dilii mataa isaa tii fi, ammaas dilii ummataa tiif aarsaa dhiheeysuun isa irra jira.
[4] Akkuma Aaron Rabbiin yaamametti, yaamamuu dha qaba malee, namni tokko illeen ulfina angafa lubummaa dhaa ifumaan fudhachuu hin dandayu.
[5] Eegaa, Kiristoosuu ulfina angafa lubootaa tahuu, ifumaan if irra hin keenye; ammoo Rabbuma kan isaan: “Ati Ilma kiyya, ani arraan si dhalche!” jedheen sanii tu ulfina san kanneefi.
[6] Bakka biraattiis ammaas, “Akkuma lubummaa Malkiisedeeqitti, ati luba bara baraaf taata” jedha.
[7] Yesuus, biyya addunyaa tana irra wayta jasadaan jiraachaa ture, sagalee guddoo fi imimmaaniin, kadhataa fi yaammata gara Rabbii kan du'a irraa isa eewaluu dandayutti dhiheeyse; waan inni ulfina Rabbii tiif if kanneef jecha, kadhanni isaa ni dhagayameefi.
[8] Inni, ilma Rabbii tahu illee ammoo, hiraar isa irra gaheen, ajajamuu dha bare.
[9] Inni, eega takka guutummatti fiixa baafame, warra isaaf ajajaman hundumaa fuu burqaa najaata abad taheefi.
[10] Rabbiis akkuma lubummaa Malkiisedeeqitti, angafa lubootaa godhee ti isa ramade.
[11] Waan kana laalchisuun silaa waaniin jechuu dandayu, hedduu dhaan qabaan ture; ammoo isin hubachuu waan hin dandeenyeef jecha, sirriitti ibsuu tu na dhiba.
[12] Isuma dhugaa, silaa isin wayta tana warra barsiisuu, tahuu tu isin irra ture; ammoo, ammuma illee taanaan, nama jalqaba Qoowlii Rabbii irra deebi'ee isin qaraasisu barbaaddan. Aananuma isin dheengiyyuu malee, nyaata cimaaf hin geenye.
[13] Namni aananumaan jiraatu, amma illee daa'ima waan taheef jecha, barsiisa jireenya qaceelummaa irratti kannamu hubachuun, itti ulfaata.
[14] Nyaanni jabaan ammoo kan warra waatara, kanneen gaarii fi hamaa gargar baasuuf, dandeeyyii fi muuxannoo dheeraa qabaniifi.