[1] Irrattuu nuti ragaa dila kana kanneen akka duumeeysaatti nuun marse waan qabnuuf, koottaa mee waan ba'aa nutti tahe hundumaa, dilii laaftumatti nu shakaaltuus if irraa darbinee, dorgommii nu dura jirtu tana obsaan haa fiignuu!
[2] Yesuus, jalqabaa fi ammaas fiinxaan baasaan amantii teenyaa san irratti, ija teenya haa dhaabnuu! Inni, kan gammachuu isa dura jirtuuf jecha, sablina fannoo irratti irra gahu odoo humaattuu hin lakkaawin, obsee du'ee ti, mirga harka arshii Rabbii tiin taa'e.
[3] Isin dadhabdanii hamileen akka isin hin caphne, Yesuusuma, kan mormii akkasii warri hamoon isa irraan gayan, obsaan dandaye san yaadadhaa!
[4] Dilii dhaan qabsoo qabuun teeysan, amma illee taanaan hanga dhiiga keeysan dhangalaasuu bira geeysan takka hin geenye.
[5] Qoowlii nama jajjabeeysitu, tan Rabbi akka ilmaanitti isinittiin dubbate san ni irraanfattanii? Inni, “Yaa ilma koo! Gooytaan si ibraanuuf wayta si adabu, sablatti hin ilaalin; adabee wayta si qaceelchuus, qalbiin si hin caphin!
[6] Gooytaan namuma jaalatu ibraanuuf adaba, nama akka ilmaatti fudhatuus ni garafa” jedha.
[7] Isiniis fitinama ibraanaa kana obsaan dandayaa! Rabbiis akka ilmaanitti isin lakkaawa; ilmi abbaan isaa isa hin ibraanne, kamtu jira ree?
[8] Adaba namayyuu, ibraanamuuf arkatan odoo hin arkatin yoo haftan ammoo, isin ilmaan we'ela malee, ilmaan halaalii miti.
[9] Tana malees, abboottan keenya kanneen nu adabaniif, ibraana isaanii tiif kabajaa dha qabnaafi; irrattuu Abbaa Ruuhaanii keenyaaf, hammam irra caalatti ajajamnee jiraachuu dha qabna ree?
[10] Abboottan keenya, wayta gabaabduuf gaarii akka isaanitti fakkaatetti nu adabu; Rabbi ammoo caalatti nu fayyadee akka qulqullummaa isaa keeysaa qooda qabaannuuf nu adaba.
[11] Adabni ibraanuuf kannamu wayta saniif, nama laaleeysa malee, kan nama gammachiisu hin fakkaatu; haa tahu malee, booddee warra itti baraniif faaydaa dha godhaafi; faaydaan suniis tan nagayaa tii fi tan qaceelinaa ti taati.
[12] Kanaaf jecha, harka keeysan da'iifaa fi jilba keeysan dadhabaas jajjabeeysaa!
[13] Xurree miila keeysaniin irra deemtan wal qixxeeyfadhaa; hogguus miilli naafni ni fayya malee, itti hin sharafu.
[14] Namoota hundumaan wajjiin nagayaan jiraadhaa, qulqullummatti jiraachuufiis yaalaa! Qulqullummaan maleetti namni tokko illeenuu Gooftaa arkuu hin dandayu.
[15] Isin keeysaa namni tokko illeen ni'imaa Rabbii irraa akka hin hoongooyne, ammaas hiddi hadhaawaan fiilee, rakkina kaasuun nama hedduu faaluus akka hin jiraanne, fardeeyfadhaa eegaa!
[16] Namni tokko illee nuu, akka Esaawutti kan mirga angafummaa isaa dhihana tokkotti gurguree, amantii dhabee najisummatti jiraatuu hin tahin!
[17] Booddee ammoo Esaawu, eeyba fudhachuuf wayta barbaade, akka irraa hoongeeyfame ni beeytu; deebisee arkachuuf booyu illee ammoo, gocha dabre san jijjiiruu hin dandeenye.
[18] Isin, gaara harkaan qabachuun dandayamu, ibidda bobawu, aarri gurraachi, dukkantinii fi, hobombolottiiniis jiran irra hin geenye.
[19] Isin sagalee garritti, sagalee guddoo dubbattuttiis hin dhihaanne; wayta sagaleen tun dhagayamtees, warri dhagayan sagaleen tun akka deebitee isaanitti hin dubbanne kadhatan.
[20] Ajajni, “Horiin illeen yoo gaara san tuqan, dhagaa dhaan rukutamanii haa du'anii!” jedhu san, waan isaanitti ulfaateef jecha, ba'aa isaa hin dandeenye.
[21] Haalli achitti arkame suniis, hedduu sodaachisaa waan taheef jecha, Museen illeen, “Hedduu sodaadhee tiin holladhe” jedhe.
[22] Haa tahu malee, gara gaara Xiyoon, magaalaa Rabbii Jiraataa dhaa, gara Yerusaaleem samii irraa, tuuta maleeykoota kumaatamaa kan gammachuu qabu bira gahuu keeysani.
[23] Gara kora waldaya angafoota warra maqaan isaanii samii irratti barreeyfamee, gara Rabbi daanyaa namoota hundumaa, gara lubbuu warra qaceelotaa kanneen fiinxaan bahanii bira gahuu keeysani.
[24] Gara Yesuus, araar-qaboo Rabbii fi namoota jiddutti irbuu haaraya dhaabee, gara dhiiga facaafamee, kan dhiiga Abeel irra waan caalu dubbatuu biraas gahuu keeysani.
[25] Ammaas, kan dubbachaa jiru kana jalaa akka hin dinne if eeggadhaa! Warri wayta Rabbi ergaa biyya addunyaa tana irratti isaanitti hime didan san, isa jalaa bahuu yoo hin dandayin, nutiis isa kan samii irraa nutti dubbatu irraa kan achi garagalluu yoo taane, isa jalaa bahuun caalatti irra nu dhiba.
[26] Wayta duraa san soowtiin Rabbii lafa sossooftee ti turte; ammaan tana ammoo akka inni dubbatetti, “Ammaas wayta takka lafa sossoosuu qofa odoo hin tahin, samii dhaas niin sossoosa” jedhee if dura himee ti jira.
[27] “Ammaas hoggu takka” jechuun, wanni raafamuu hin dandeenye hafee akka jiraatuuf, wanni uumame hundinuu raafamee bakkaa darbamuu isaa ti mullisa.
[28] Eegasuu, nuti mootummaa raafamuu hin dandeenye waan qabnuuf jecha, koottaa mee warra hamdeeyfatu taanee, sodaa Rabbii tii fi kabajaas isaaf qabaannee, ibaadaa isa duratti fudhatama qabdu haa dhiheeysinuu!
[29] Rabbiin keenya, bar ibidda dam nama godhuu.